Ndima Ya 92

Hu Fhodzwa vha Mapele vha Fumi Lwendoni lwa Yesu lwa u fhedza lwa u ya Yerusalema

YESU u fhelisa vhuḓidini ha Gota ha u mu vhulaha nga u ṱuwa Yerusalema a ya muḓini wa Efuremu, khamusi u tou vha khilomithara dza 24 kana u fhira devhula-vhubvaḓuvha ha Yerusalema. U dzula henefho na vhafunziwa vhawe, kule na maswina awe.

Naho zwo ralo, tshifhinga tsha Paseka ya 33 C.E. tshi khou sendela, nahone nga u ṱavhanya Yesu u lwendoni hafhu. U tshimbila kha ḽa Samaria na u gonya kha ḽa Galilea. Holu ndi lwendo lwawe lwa u fhedza hafha fhethu a sa athu u fa. Musi e Galilea, zwi vhonala uri ene na vhafunziwa vhawe vha ṱanganela na vhaṅwe vha re lwendoni lwavho lwa u ya Yerusalema vhuṱamboni ha Paseka. Vha fara nḓila i bvaho nga vhukati ha dzingu ḽa Perea, vhubvaḓuvha ha Mulambo wa Yorodane.

Mathomoni a lwonolu lwendo, musi Yesu a tshi khou dzhena muḓini naho hu kha ḽa Samaria kana kha ḽa Galilea, u ṱanganedzwa nga vhanna vha fumi vha re na mapele. Hovhu vhulwadze vhu ofhisaho vhu ḽa miraḓo ya muvhili wa muthu nga zwiṱuku nga zwiṱuku​—minwe yawe, zwikunwane zwawe, nḓevhe dzawe, ningo yawe, na milomo yawe. U tsireledza vhaṅwe uri vha si farwe nga honoho vhulwadze, Mulayo wa Mudzimu u amba malugana na muthu a re na mapele uri: “Dzindebvu dzawe a dzi fukedze, a vhidzelele a ri: Dzitshikha! Dzitshikha! Arali a tshee ó nambatelwa nga honoho vhulwadze, u na tshikha; . . . nga a dzule thungo.”

Vhenevho vha mapele vha fumi vha tevhedza zwine Mulayo wa zwi thivhela nga vha re na mapele nahone vha vha kule na Yesu. Naho zwo ralo, vha a vhidzelela nga maipfi mahulu: “Yesu, Thovhela, ri khathutshele!”

A tshi vha vhonela kule, Yesu u a laedza: “Tshimbilani ni yo ḓi-sumbedza kha vho-tshifhé.” Yesu u amba hezwi ngauri Mulayo wa Mudzimu u tendela vho-tshifhe u ḓivhadza vha mapele uri vho fhodzwa. Nga yeneyi nḓila vhenevho vhathu vha wana thendelo ya u tshila hafhu na vhathu vho takalaho.

Vhenevho vha mapele vha fumi vha fulufhela maanḓa a Yesu a vhuṱolo. Ngauralo vha gidimela u yo vhona vho-tshifhe, naho vha sa athu u fhodzwa. Musi vhe nḓilani, u tenda havho kha Yesu hu ṋewa malamba. Vha thoma u vhona na u pfa mutakalo wavho wo vusuluswaho!

Vha ṱahe vha vha re na mapele vho fhodzwaho vha bvela phanḓa na lwendo lwavho, fhedzi muṅwe wa vha mapele, Musamaria, u huma u yo ṱoḓa Yesu. Ndi ngani? Ngauri u livhuha nga maanḓa zwe zwa itea khae. U renda Mudzimu nga ipfi ḽihulu, nahone musi a tshi wana Yesu, u wela milenzheni yawe, a tshi mu livhuha.

Yesu a tshi fhindula u ri: “Naa a ho ngo fhodzwa vha re na fumi kani? Vhaṱanu-na-vhaṋa vha ngafhi? A ho ngo wanala vhané vha huma vha ḓa vha ṋea Mudzimu thendo na uyu mutsinda naa?”

Zwenezwo u vhudza munna wa Musamaria uri: “Takuwa U tshimbile, u tenda hau ho U tshidza.”

Musi ri tshi vhala nga ha u fhodza ha Yesu vha re na mapele vha fumi, ri fanela u humbula mbuno yo bveledzwaho nga mbudziso yawe: “Vhaṱanu-na-vhaṋa vha ngafhi?” U sa livhuha he ha sumbedzwa nga vha ṱahe ndi vhushayanungo vhuhulwane. Naa riṋe, u fana na Musamaria, ri ḓo sumbedza u livhuha zwithu zwine ra zwi ṱanganedza zwi tshi bva ha Mudzimu, u katela na ḽiṅwe fulufhedziso ḽa vhutshilo vhu sa fheli shangoni ḽiswa ḽa Mudzimu ḽo lugaho? Yohane 11:54, 55; Luka 17:11-19; Levitiko 13:16, 17, 45, 46; Ndzumbululo 21:3, 4.

▪ Yesu u fhelisa hani vhuḓidini ha u mu vhulaha?

▪ Yesu u ya ngafhi lu tevhelaho, nahone u guma ngafhi?

▪ Ndi ngani vha re na mapele vha tshi imela kule, nahone ndi ngani Yesu a tshi vha vhudza uri vha ye ha vho-tshifhe?

▪ Ndi ngudo ifhio ine ra fanela u i guda kha iyi tshenzhelo?