Ndima Ya 22

Hu Vhidziwa Vhafunziwa Vhaṋa

NGA murahu ha ndingedzo ya u ṱoḓa u vhulaha Yesu ḓoroboni ya hayani hawe ya Nazareta, u ya muḓini wa Kapernaume tsini na Lwanzhe lwa Galilea. Hezwi zwi ḓadzisa vhuṅwe vhuporofita ha Yesaya. Ndi he ha dzula ho amba uri vhathu vha Galilea vhane vha dzula tsini na lwanzhe vho vha vha tshi ḓo vhona tshedza tshihulu.

Musi Yesu a tshi khou ita mushumo wawe wa u vhonetshela wa u huwelela Muvhuso henefha, u vhidza vhaṋa vha vhafunziwa vhawe. Vhenevha vho tshimbila nae kale, fhedzi vha humela kha mushumo wavho wa u rea khovhe musi vha tshi vhuya na Yesu vha tshi bva Yudea. Zwi vhonala uri zwino Yesu u a vha ṱoḓa, samusi tshi tshifhinga tsha u vha na vhathusi vho khwaṱhaho, vha tshifhinga tshoṱhe vhane a nga vha gudisa u bvela phanḓa na vhuḓinḓa musi o no ṱuwa.

Ngauralo musi Yesu a tshi khou tshimbila vhugabeloni ha lwanzhe u vhona Simoni Petro na khonani dzawe vha tshi khou ṱanzwa mambule avho, u ya khavho. U ṋamela gungwa ḽa Petro nahone u mu humbela uri a ḽi sendedze kulenyana ha philiphili. Musi vha tshi tou tshimbilanyana, Yesu u dzula fhasi gungwani nahone u thoma u funza magogo a re vhugabeloni.

Nga murahu, Yesu u vhudza Petro uri: “Sendedza he ha ita tivha, ni ṱharamudze mammbule aṋu uri ni fashe.”

Petro u a fhindula: “Thovhela, ro ḓi-netisa vhusiku hoṱhe ri si wane tshithu. Huno vhunga wó no amba, mammbule ndi a a ṱharamudza.”

Musi vha tshi tsitsa mambule, vho fasha khovhe nga vhunzhi lwe mambule a thoma u kheruwa. Nga u ṱavhanya, vhanna vha ya kha khonani dzavho gungwani ḽi re tsini u itela u thusa. Nga u ṱavhanya magungwa oṱhe a a ḓala khovhe nnzhi-nnzhi lwe a thoma u mbwandamela. A tshi vhona zwenezwi, Petro u wela phanḓa ha Yesu nahone u ri: “Ibvá kha nṋe, ngauri ndi munna wa mu-ita-zwivhi, Murena!”

Yesu u a fhindula: “U songo ofha; zwino U ḓo thoma u vha mufashi wa vhathu.”

Yesu u ramba na Andrea murathu wa Petro. U a vha khadeledza: “Ntevheleni, ndi ḓo ni ita vharei vha u ḓo fasha vhathu.” Vhe vha vha vha tshi khou fasha navho khovhe, Yakobo na Yohane, vharwa vha Sebedeo, na vhone vho rambiwa-vho, nahone na vhone vho aravha vha sa timatimi. Ngauralo havha vhaṋa vha litsha mushumo wavho wa u rea khovhe nahone vha vha vhatevheli vha Yesu vhaṋa vha u thoma vho khwaṱhaho vha tshifhinga tshoṱhe. Luka 5:1-11; Mateo 4:13-22; Marko 1:16-20; Yesaya 9:1, 2.

▪ Ndi ngani Yesu a tshi vhidza vhafunziwa vhawe uri vha mu tevhele, nahone ndi vhonnyi vhenevha?

▪ Ndi vhuṱolo vhufhio vhune ha tshuwisa Petro?

▪ Ndi mufuda-ḓe wa u rea khovhe une Yesu a rambela vhafunziwa vhawe u u ita?