Ndima Ya 115

Hu Vuwa Khani

ḼI TSHI kha ḓi bva u kovhela, Yesu o funza ngudo yavhuḓi nga tshumelo ya u ḓiṱukufhadza nga u ṱanzwa milenzhe ya vhaapostola vhawe. Nga murahu, o thoma Khumbudzo ya lufu lwawe lune lwa khou sendela. Zwino, zwihuluhulu hu tshi vhonwa zwine zwa kha ḓi bva u itea, hu itea tshiitea tshi mangadzaho. Vhaapostola vhawe vha ṱanganela kha khani khulwane ya uri ndi nnyi ane a vhonala e muhulwanesa khavho! Zwi vhonala uri ndi tshipiḓa tsha khani ine ya kha ḓi bvela phanḓa.

Elelwani uri musi Yesu o no shandukiswa thavhani, vhaapostola vho ṱaṱisana nga uri ndi nnyi we a vha e muhulwanesa khavho. Zwiṅwe hafhu, Yakobo na Yohane vho humbela vhuimo vhuhulwane Muvhusoni, zwi tshi bveledza u ṱaṱisana hafhu vhukati ha vhaapostola. Zwino, kha vhusiku hawe ha u fhedza e navho, Yesu u fanela u vha o ṱungufhala lungafhani a tshi vha vhona vha tshi khou semana hafhu! U ita mini?

Nṱhani ha u sema vhenevho vhaapostola nga nḓila ine vha ḓifara ngayo, Yesu u dovha a amba navho nga vhulenda: “Mahosi a dzitshakha a a vhusa; na vha vhusaho vhathu nga vhuhali vha loshwa vha pfi: Vhavhuya! Inwi ni songo ralo. . . . Ngauri muhulwane naa ndi ufhio? Ndi uyo kani a dzulaho vhuḽeloni, kani ndi uyo a ḓisaho zwiḽiwa? Naa a si uyo a dzulaho vhuḽeloni?” Nga zwenezwo, musi a tshi vha humbudza nga tsumbo yawe, u ri: “Nṋe-ha kha inwi ndi nga mulanda.”

Hu sa londwi u sa fhelela havho, vhenevho vhaapostola vho konḓelela na Yesu milingoni yawe. Ngauralo u ri: “Huno nṋe ndi ḓo ni kumedza muvhuso vhunga Khotsi-anga ó u kumedza nṋe.” Hoyu mulanga wa muthu nga eṱhe vhukati ha Yesu na vhatevheli vhawe vha fulufhedzeaho u vha ṱanganyisa nae u itela u ṱanganela nae muvhusoni wawe wa vhuhosini. Ndi tshivhalo tshiṱuku tsha vha 144 000 fhedzi vhane mafheleloni vha iswa kha hoyu mulanga wa Muvhuso.

Naho vhaapostola vho ṋewa hetshi tshilavhelelwa tshi takadzaho tsha u ṱanganela na Kristo vhuvhusini ha Muvhuso, zwino vha shaya nungo muyani. Yesu u ri: “Vhusiku ha ṋamusi noṱhe ni ḓo khakhiswa ni tshi vhona zwiné nda itwa.” Naho zwo ralo, a tshi vhudza Petro uri O mu rabelela, Yesu u a khadeledza: “Musi U tshi ḓo rembuluwa, U khwaṱhise vharathu vhau.”

Yesu u a ṱalutshedza: “Vhana vhanga, ndi kha ḓi vha ndí na tshifhinganyana tshiṱuku ndí na inwi. Ni ḓo nṱoḓa; huno zwe nda vhudza Vha-Yuda nda ri: Huné nda ya a ni nga koni u swika, ndi zwe inwi zwino nda ni vhudza. Ndi ni ṋea mulayo muswa wa uri ni funane vhunga nṋe ndo ni funa, uri na inwi ni funane-vho. Ndi zwiné vhathu vhoṱhe vha ḓo ḓivha ngazwo’ zwauri ni vhafunziwa vhanga arali u funana hu hone kha inwi.”

Petro u a vhudzisa: “Murena, U ya ngafhi?”

Yesu u a fhindula: “Huné nda ya hone a U koni u ntevhela zwino; U ḓo vhuya wa ntevhela ngavhuya.”

Petro u ṱoḓa u ḓivha: “Murena, ndi mini tshi nkundisaho u U tevhela zwino? Na vhutshilo hanga ndi nga vhu ṅaledza ndi tshi itela iwe.”

Yesu u a vhudzisa: “U ri U nga ṅaledza vhutshilo hau U tshi itela nṋe?” “Ngoho ndi a U vhudza, vhusiku hovhu ha ṋamusi, mukukulume ú sathu lila ka-vhili, U ḓo vha wó landula ka-raru wa ri: A thi mu ḓivhi, U tshi amba nṋe.”

Petro u a hanedza: “Naho hu tshi pfi ndi fe na iwe, ndi nga si landule nda ralo.” Nahone musi vhaṅwe vhaapostola na vhone vha tshi amba ngauralo, Petro u a zuwa: “Naho vhoṱhe vha tshi khakhiswa vha tshi vhona zwiné wa itwa, nṋe a thi nga vhuyi nda khakhiswa na ka-thihi.”

A tshi ambela kha tshifhinga tshe a rumela ngatsho vhaapostola kha lwendo lwa u huwelela kha ḽa Galilea vha si na khedzi na tshikwama, Yesu u a vhudzisa: “No vhuya na shaya tshithu naa?”

Vha a fhindula: “Na ka-thihi!”

U ri: “Hone zwino, a re na khedzi, a bve nayo’; na a re na tshikwama, a ralo; a sí na pfumo, nga a rengise nguvho a renge ḽone. Ngauri ndi a ni vhudza ndi ri: kha nṋe hu kha ḓi yo khunyelela na zwiḽa zwo ṅwaliwaho zwa pfi: O baḓakanywa na vha-ita-zwivhi. Ngauri zwo ṅwaliwaho zwi tshi amba nṋe, zwi a vuledzwa.”

Yesu u khou sumba kha tshifhinga tshine a ḓo vhambiwa na vha-ita-zwivhi, kana vhathu vhavhi. U khou dovha a sumbedza uri vhatevheli vhawe nga murahu vha ḓo sedzana na u tovholwa hu vhavhaho. Vha ri: “Murena vhona, mafumo mavhili ngea.”

U a fhindula: “Ndi one.” Samusi ri tshi ḓo zwi vhona, u vha havho na mafumo hu si kale zwi ḓo tendela Yesu u funza iṅwe ngudo ya ndeme. Mateo 26:31-35; Marko 14:27-31; Luka 22:24-38; Yohane 13:31-38; Ndzumbululo 14:1-3.

▪ Ndi ngani khani ya vhaapostola i tshi mangadza nga u rali?

▪ Yesu u dzudzanya hani yeneyo khani?

▪ Ndi mini tshine tsha ḓadziswa nga mulanga une Yesu a u ita na vhafunziwa vhawe?

▪ Ndi mulayo ufhio muswa une Yesu a u ṋea, nahone ndi muhulwane lungafhani?

▪ Ndi u ḓifulufhelesa hufhio hune Petro a hu sumbedza, nahone Yesu u ri mini?

▪ Ndi ngani ndaela dza Yesu dza u fara khedzi na tshikwama dzo fhambana na dze a dzi ṋea u thomani?