Ndima Ya 63

Iṅwe Nyeletshedzo I Khakhululaho

MUSI Yesu na vhaapostola vha tshee nḓuni henefho Kapernaume, zwiṅwe nga nnḓa ha u ṱaṱisana ha vhaapostola uri ndi nnyi a re muhulwane zwi a haseledzwa. Hetshi tshi nga kha ḓi vha tshiitea tshe tsha itea musi vha tshi khou vhuyelela Kapernaume, musi Yesu e siho nga dzawe. Muapostola Yohane u a vhiga: “Mufunzi, ro wana muṅwe muthu a tshi pandela mimuya mivhi nga dzina ḽau, ngeno á sa tshimbili na riṋe; ra mu dzivhisa nge a vha a sa tshimbili na riṋe.”

Zwi tou vha khagala uri Yohane u dzhia vhaapostola vhe tshone tshigwada tsha vha konaho u fhodza fhedzi. Nga zwenezwo u ḓipfa uri onoyo munna o vha a tshi khou ita mishumo ya maanḓa zwi songo fanela ngauri o vha e si tshipiḓa tsha tshigwada tshavho.

Naho zwo ralo, Yesu u a eletshedza: “Ni songo mu dzivhisa; ngauri haho’ ané a ri u ita vhuṱolo nga dzina ḽanga, a dovha a ntshinya. A sa lwiho na riṋe, u ima na riṋe. Ngauri na ane a ḓo ni kela khavho nthihi ya maḓi a tshi ita nge na pfi vha Kristo, ngoho ndi a ni vhudza, ha nga dzimiwi malambá awe.”

Zwo vha zwi sa ṱoḓei uri hoyu munna nga ṋama a tevhele Yesu a vhe thungo hawe. Tshivhidzo tsha Vhukriste tsho vha tshi sa athu u imiswa, ngauralo u sa vha tshipiḓa tsha tshigwada tshavho zwo vha zwi sa ambi uri o vha e wa tshiṅwe tshivhidzo tshi re thungo. Onoyo munna, vhukuma o vha e na lutendo kha dzina ḽa Yesu nahone nga zwenezwo o bvelela kha u pandela mimuya mivhi. O ita zwe zwa vha zwi tshi fana zwavhuḓi na zwe Yesu a ri zwo vha zwi tshi fanelwa nga malamba. Yesu u sumbedza uri nga u ita nga u ralo, ha nga kundwi u wana malamba awe.

Fhedzi hu pfi mini arali onoyo munna o khukhuliswa nga maipfi na zwiito zwa vhaapostola? Hezwi zwo vha zwi tshi ḓo vha zwivhi vhukuma! Yesu u a ṱhogomela: “Huno ane a ḓo khakhisa muthihi wa avha vhaṱuku vha ntendaho, kha ene ndi khwine a tshi vhofhelwa guyo mukuloni wawe, a poswa lwanzheni.”

Yesu u amba uri vhatevheli vhawe vha fanela u bvisa vhutshiloni havho naho tshi tshini tshine vha tshi funesa tshi ngaho tshanḓa, mulenzhe, kana iṱo tshine tsha nga vha ita uri vha khukhulisee. Ndi khwine u sa vha na hetshi tshithu tshi funwaho wa dzhena Muvhusoni wa Mudzimu nṱhani ha u tshi farelela wa powa Gehenna (mathukhwini a ṱwaho a tshi swa tsini na Yerusalema), hune ha fanyisela u fheliswa tshoṱhe.

Yesu u dovha a sevha: “Ni vhone ni sa ḓo nyadza muṅwe wa avha vhaṱuku; ngauri nṋe ndi ri: Vharuṅwa vhavho ngei ṱaḓulu vha dzula vha tshi vhona tshifhaṱuwo tsha khotsi-anga wa ṱaḓulu.” Zwenezwo a sumbedza u vha ha ndeme ha avha “vhaṱuku” musi a tshi amba nga ha munna ane a vha na nngu dza ḓana, fhedzi a xedza nthihi. Onoyo munna u ḓo litsha dza 99 a tshi ya u ṱoḓa yo xelaho, Yesu u a ṱalutshedza uri musi o no i wana u ḓo i takalela vhukuma u fhira dza 99. Zwenezwo Yesu a phetha nga uri: “Na khotsi-aṋu wa ngei ṱaḓulu ha funi hu tshi xela na muthihi wa avha vhaṱuku.”

A tshi humbula u ṱaṱisana ha vhaapostola vhawe, Yesu u a ombedzela: “Dzulani ní na muṋo; noṱhe ni vhe vhadzia-mulalo.” Zwiḽiwa zwi sa ḓifhi zwi ḓifhiswa nga muṋo. Nga zwenezwo, muṋo wa pfanyisedzo u ita uri zwine muthu a amba zwi ṱanganedzee nga hu leluwaho. U vha na muṋo wo raloho zwi ḓo thusa uri hu vhulungwe mulalo.

Fhedzi nga ṅwambo wa u sa fhelela ha muthu, nga zwiṅwe zwifhinga hu ḓo vha na phambano khulwane. Yesu u ita na u ṋea nyeletshedzo dza u dzi piringulula. Yesu u ri: “Arali wa haṋu a tshi tshinya, U mu rovhedze ní vhavhili fhedzi. Arali a tshi U pfa, wo pfuma murathu.” Arali a sa thetshelesi, Yesu u a eletshedza, “iyá khae’ na muṅwe namusi vhe vhavhili, uri mafhungo a dzule é na ṱhanzi mbili kana tharu.”

Arali zwo kunda, Yesu u ri, isani eneo mafhungo kha “tshivhidzo,” ndi uri, kha vhalavhelesi vha re na vhuḓifhinduleli tshivhidzoni vhane vha nga ṋea phetho ya khaṱulo. Arali mutshinyi a sa tendelani na yeneyo phetho, Yesu u phetha nga uri, “hone U mu ite wa nnḓa na ḽishandukwa.”

Musi vha tshi ita phetho yo raloho, vhalavhelesi vha fanela u farelela tshoṱhe kha ndaela dzi re Ipfini ḽa Yehova. Nga zwenezwo, musi vha tshi wana muthu e na mulandu une a fanela u ṱarafelwa wone, khaṱulo ‘i ḓo vha yo no vhoxwa ngei ṱaḓulu.’ Nahone musi vha tshi “vhofholola fhano shangoni,” ndi uri, musi vha tshi wana e si na mulandu, “zwi ḓo vhofhololwa na ngei ṱaḓulu.” Musi hu tshi itwa phetho dzo raloho dza khaṱulo, Yesu u ri, “ngauri a huna vhavhili kana vhararu vha kuvhanganaho nga dzina ḽanga huné nṋe ndi si vhe vhukati havho.” Mateo 18:6-20; Marko 9:38-50; Luka 9:49, 50.

▪ Ndi ngani zwo vha zwi sa ṱoḓei misini ya Yesu u tshimbila nae?

▪ U khukhulisa vha re vhaṱuku ndi zwivhi lungafhani, nahone Yesu u fanyisa hani vhuhulwane ha vhenevho vhaṱuku?

▪ Ndi mini zwi vhonalaho zwo ṱuṱuwedza Yesu u khuthadza vhaapostola uri vha vhe na muṋo vhukati havho?

▪ Ndi mini tshi re tshihulwane kha u “vhofha” na u “vhofholola”?