Ndima Ya 68

Iṅwe Pfunzo nga Ḓuvha ḽa Vhusumbe

ḒUVHA ḽa u fhedza ḽa Vhuṱambo ha Mishasha, ḓuvha ḽa vhusumbe, ḽi kha ḓi bvela phanḓa. Yesu u khou funza o ima kha tshiṅwe tshipiḓa tsha thembele tshine tsha pfi ndi “mbulungelo ya mali.” Hafha hu vhonala hu fhethu hune ha vhidzwa Khoroni ya Vhafumakadzi hune ha vha na dzimbulungelo dzine khadzo vhathu vha posa mali.

Vhusiku vhuṅwe na vhuṅwe vhukatini ha vhuṱambo, hu fungwa mbone dzo khetheaho hafha fhethu ha thembele. Henefho hu vhewa zwiṱomambone zwihulwane, tshiṅwe na tshiṅwe tshi na masambelo mahulwane maṋa o ḓalaho nga mapfura. Tshedza tshi bvaho kha hedzi mbone, dzi dugaho mapfura a tshi bva masambeloni a 16, ndi tshihulwane vhukuma lune tsha nga vhonetshela na kule vhusiku. Zwine zwino Yesu a zwi amba zwi nga humbudza vhathetshelesi vhawe nga ha hedzi mbone. Yesu u ri: “Ndi nṋe tshedza tsha shango; a ntevhelaho ha nga tshimbili swiswini; u ḓo vha na tshedza tsha vhutshilo.”

Vhafarisei vha a hanedza: “U khou ḓi-ṱanziela; vhuṱanzi hau ndi ha u zwifha.”

A tshi fhindula Yesu u ri: “Naho nda ḓi-ṱanzielela, vhuṱanzi hanga ndi ha ngoho, ngauri he nda bva hone na huné nda ya ndi a hu ḓivha, ngeno inwi ni sa ḓivhi he nda bva hone na huné nda ya.” U a engedza: “Ndi nṋe ndi ḓi-ṱanzielelaho, huno na Khotsi-anga o nthumaho u a nṱanzielela.”

Vhafarisei vha ṱoḓa u ḓivha: “Khotsi-au u ngafhi?”

Yesu u a fhindula: “Nṋe a ni nḓivhi, na Khotsi-anga a ni mu ḓivhi. Ngavhe ni tshi ḓivha nṋe, ndi misi na Khotsi-anga ni tshi mu ḓivha.” Naho Vhafarisei vha tshi ṱoḓa Yesu a tshi farwa, a hu na a mu kwamaho.

Yesu u dovha a ri: “Nṋe ndi a ṱuwa . . . Huné nṋe nda ya hone, inwi ni nga si swike.”

Vha tshi pfa zwenezwi Vhayuda vha ḓivhudzisa: “Naa u ḓo ḓi-vhulaha kani, a tshi ri: huné nṋe nda ya, inwi ni nga si swike?”

Yesu u a ṱalutshedza: “Inwi ni vha fhasi; nṋe ndi wa ṱaḓulu. Inwi ni vha shango ḽino, huno nṋe a thi wa shango ḽino.” Zwenezwo a engedza: “Ngauri ná sa tenda zwauri ndi nṋe, ni ḓo fela zwivhini zwaṋu.”

Vhukuma, Yesu u khou ambela kha vhutshilo hawe musi a sa athu u vha muthu fhano shangoni na u fulufhedziswa hawe u vha Messia, kana Kristo. Naho zwo ralo, vha a vhudzisa, lu sa timatimisi nga u nyadza huhulu vha tshi ri: “U nnyi-ha iwe?”

O sedzana na u mu landula havho, Yesu u a fhindula: “Ndi kha ḓi ambelani na inwi.” (NW) Naho zwo ralo u bvela phanḓa uri: “Hone o nthumaho ndi wa ngoho; huno nṋe zwe nda pfa ene ndi zwiné nda amba fhano shangoni.” Yesu u bvela phanḓa: “Musi Murwa-muthu ni tshi ḓo mu imisela nṱha, ndi hone ni tshi ḓo ṱalukanya zwauri ndi nṋe, na uri a thi iti tshithu nga nṋe muṋe; zwiné nda amba ndi zwe Khotsi a mpfunzedza. Huno o nthumaho u na nṋe, ha ndaṱedzi, ngauri ndi dzula ndi tshi ita zwi mu takadzaho.”

Musi Yesu a tshi amba hezwi zwithu, vhanzhi vha a mu tenda. A amba navho a ri: “Arali inwi na dzula ní kha fhungo ḽanga, ndi hone ní vhafunziwa vhanga nga ngoho. Ndi hone ni tshi ḓo ḓivha mafhungo-ngoho, huno mafhungo-ngoho a ḓo ni vhofholola.”

Vhahanedzi vhawe vha dzhenelela vha ri: “Ri vhana vha Abrahamu, huno a ri athu u vha phuli dza muthu tsha kale na kale. U amba hani U tshi ri: ri ḓo vhofhololwa?”

Naho Vhayuda kanzhi vho vha vha tshi vha nga fhasi ha vhuvhusi ha vhatsinda, a vha dzhii mutsikeledzi naho e ufhio sa muṋe wavho. Vha hana u vhidzwa dziphuli. Fhedzi Yesu u sumbedza uri vhukuma ndi dziphuli. Nga nḓila-ḓe? Yesu u ri: “Ngoho, ngoho, ndi a ni vhudza, a itaho zwivhi ndi phuli ya zwone zwivhi.”

U hana u tenda uri ndi dziphuli dza tshivhi zwi vhea Vhayuda khomboni. Yesu u a ṱalutshedza: “Phuli yone a i nga dzuli nḓuni lini na lini; wa u dzula ndi murwa.” Samusi wa phuli a si na ndugelo dza ifa, a nga kha ḓi vha khomboni ya uri a pandelwe naho hu lini. Ndi murwa o bebelwaho henefho muḓini ane a dzula “lini na lini,” ndi uri tenda a tshi kha ḓi tshila.

Yesu u bvela phanḓa: “Arali zwino Murwa a tshi ni vhofholola, ndi hone na-ngoho nó vhofhololwa.” Nga zwenezwo, mafhungo-ngoho ane a vhofholola vhathu ndi mafhungo-ngoho malugana na Murwa, Yesu Kristo. Ndi nga tshiṱhavhelo tsha vhutshilo hawe ho fhelelaho hune naho e nnyi a nga vhofhololwa kha tshivhi tshi vhulayaho. Yohane 8:12-36.

▪ Yesu u funza ngafhi nga ḓuvha ḽa vhusumbe? Ndi mini zwine zwa itea vhusiku henefho, nahone izwi zwi tshimbidzana hani na pfunzo ya Yesu?

▪ Yesu u ri mini nga vhubvo hawe, nahone izwi zwi fanela u dzumbulula mini nga ha u ḓiṱalula hawe?

▪ Ndi nga nḓila ifhio ine Vhayuda vha vha dziphuli ngayo, fhedzi ndi mafhungo-ngoho afhio ane a ḓo vha vhofholola?