Ndima Ya 104

Ipfi ḽa Mudzimu ḽo Pfala lwa Vhuraru

MUSI e thembeleni, Yesu o vha o ṱungufhalela lufu lune a fanela u sedzana nalwo hu si kale. Ṱhogomelo yawe khulwane ndi ya nḓila ine dzina ḽa Khotsi awe ḽa ḓo kwamea ngayo, ngauralo u a rabela: “Khotsi, ṋea dzina ḽau vhugala!”

Nga zwenezwo, ipfi ḽa maanḓa ḽi bva ṱaḓulu, ḽi tshi ḓivhadza uri: “Ndo no ḽi ṋea vhugala, huno ndi ḓo dovha nda ḽi ṋea vhugala.”

Gogo ḽo imaho henefho ḽo mangala. Vhaṅwe vha thoma uri: “Ndi Muruṅwa a ambaho nae’.” Vhaṅwe vha amba uri ho bvuma. Fhedzi, vhukuma, ndi Yehova Mudzimu we a amba! Naho zwo ralo, holu a si lwa u thoma ipfi ḽa Mudzimu ḽi tshi pfala malugana na Yesu.

U lovhedzwani ha Yesu, miṅwaha miraru na tshipiḓa yo fhiraho, Yohane Mulovhedzi o pfa Mudzimu a tshi amba nga ha Yesu uri: “Ndi ene Murwa-mufunwa wanga uyu, ané nda mu takalela.” Nga zwenezwo, tshiṅwe tshifhinga nga murahu ha Paseka yo fhiraho, musi Yesu a tshi shanduka phanḓa havho, Yakobo, Yohane, na Petro vho pfa Mudzimu a tshi ḓivhadza uri: “Hoyu ndi Murwa wanga, ané nda mu funa, ané nda mu takalela; ni mu thetshelese!” Nahone zwino, lwa vhuraru, nga ḽa 10 Nisan, maḓuvha maṋa nga phanḓa ha lufu lwa Yesu, ipfi ḽa Mudzimu ḽi dovha ḽa pfiwa nga vhathu. Fhedzi zwino Yehova u khou amba u itela uri vhathu vha zwi pfe!

Yesu u a ṱalutshedza: “Iḽo ipfi a ḽo ngo ḓela nṋe; ḽo ḓela inwi.” Zwi ṋea vhuṱanzi ha uri Yesu ndi Murwa wa Mudzimu zwa vhukuma, Messia o fulufhedziswaho. Yesu u a bvela phanḓa: “Zwino ndi hone khaṱhulo ya shango ḽino yó swika; zwino ndi hone muvhusi wa shango ḽino a tshi ḓo kudzwa nnḓa.” Zwihuluhulu ndi uri matshilele a Yesu a u fulufhedzea, a khwaṱhisa uri Sathane Diabolo, muvhusi wa ḽino shango, o fanelwa nga u “kudzwa nnḓa,” ó vhulahwa.

A tshi sumba mvelelo dza u sendela hawe lufuni, Yesu u ri: “Huno nṋe musi ndi tshi ḓo ṱuswa shangoni nda takulelwa nṱha, ndi ḓo kokodzela vhoṱhe ha nṋe.” U fa hawe a si u kundwa na kathihi, ngauri nga u fa, u ḓo ḓidzhiela vhaṅwe uri vha ḓiphine nga vhutshilo vhu sa fheli.

Fhedzi gogo ḽi a vhilaela: “Riṋe mulayoni ro pfa hu tshi pfi, Kristo u ḓo vha hone lini na lini; iwe zwino U amba hani wa ri: Murwa-muthu u ḓo takulelwa nṱha? Murwa-muthu uyo ndi nnyi?”

Hu sa londwi vhuṱanzi hoṱhe, u katela na u pfa ipfi ḽa Mudzimu nga dzawe, vhanzhi a vha tendi uri Yesu ndi Murwa-muthu wa ngoho, Messia o fulufhedziswaho. Naho zwo ralo, sa zwe a ita miṅwedzi ya rathi nga phanḓa Vhuṱamboni ha Mishasha, Yesu u dovha a ḓiamba sa “tshedza” nahone u ṱuṱuwedza vhathetshelesi vhawe: “Tendani tshone tshedza zwino ní kha ḓi vha natsho’, uri ni vhe vhana vha tshedza.” Musi o no amba hezwi zwithu, Yesu a ṱuwa a ya u dzumbama, zwi vhonala uri nga nṱhani ha uri vhutshilo hawe vhu khomboni.

U sa tenda ha Vhayuda kha Yesu hu ḓadzisa maipfi a Yesaya nga ha ‘maṱo a vhathu o swingiswaho na mbilu dzavho dzo rindidzwaho uri vha si rembuluwe vha tshidzwa.’ Yesaya o vhona khuluṋoni ya Yehova ya ṱaḓulu bononi, u katela na Yesu e vhugalani musi a sa athu u vha muthu e na Yehova. Naho zwo ralo, hu tshi ḓadzea zwe Yesaya a ṅwala, Vhayuda vha hanedza nga tshipimbi vhuṱanzi ha uri Uyu ndi ene Muvhofhololi wavho o fulufhedziswaho.

Kha ḽiṅwe sia, vhanzhi naho vhe vhavhusi (zwi vhonala uri miraḓo ya khothe khulwane ya Vhayuda, ya Gota) vho tenda kha Yesu zwa vhukuma. Nikodemo na Yosefa wa Arimathia ndi vhavhili vha vhenevha vhavhusi. Fhedzi vhavhusi, zwino, vha kundwa u sumbedza lutendo lwavho, nga u ofha u pandelwa vhuimoni havho tshikoloni. Vhenevho vhathu vha khou xelelwa vhukuma!

Yesu u bvela phanḓa u ṱhogomela: “A ntendaho ha tendi nṋe, u tenda o nthumaho. A vhonaho nṋe, u vhona o nthumaho. . . . Huno a pfaho fhungo ḽanga a si ḽi londe, a si uri u ḓo haṱulwa nga nṋe; ngauri a tho ngo ḓela u haṱula shango, ndo ḓela u tshidza shango. . . . Tshine tsha ḓo mu haṱula nga ḓuvha ḽa vhufhelo, ndi fhungo ḽe nda amba.”

U funa ha Yehova shango ḽa vhathu ho mu sudzulusela u rumela Yesu uri vhane vha mu tenda vha tshidzwe. Uri vhathu vha tshidzwe zwi ḓo sumbedzwa nga uri vha a tevhedza zwe Mudzimu a laedza Yesu uri a zwi ambe. Khaṱulo i ḓo vha hone “nga ḓuvha ḽa vhufhelo,” vhukatini ha Vhuvhusi ha Kristo ha Miṅwaha ya Tshigidi.

Yesu u phetha nga uri: “A tho ngo amba zwi bvaho kha nṋe; Khotsi o nthumaho ndi ene o ndayaho zwiné nda amba na zwiné nda bula. Huno ndi a ḓivha zwauri mulayo wawe ndi hone vhutshilo vhu sá fheli; zwino, zwiné nṋe nda amba, ndi amba zwe Khotsi a mbudza.” Yohane 12:28-50; 19:38, 39; Mateo 3:17; 17:5; Yesaya 6:1, 8-10.

▪ Ipfi ḽa Mudzimu ḽo pfala kha zwiitea zwifhio zwiraru malugana na Yesu?

▪ Muporofita Yesaya o vhonisa hani vhugala ha Yesu?

▪ Ndi vhafhio vhavhusi vhe vha tenda kha Yesu, fhedzi ndi ngani vha songo mu amba khagala?

▪ “Ḓuvha ḽa vhufhelo” ndi mini, nahone nga tshenetsho tshifhinga vhathu vha ḓo haṱulwa kha mutheo ufhio?