Ndima Ya 49

Luṅwe Lwendo lwa U Funza lwa Galilea

HU ṰOḒAHO u vha nga murahu ha miṅwaha mivhili ya u funza ha maanḓa, naa zwino Yesu u ḓo thoma u litshelela nahone a si tsha ḓidina? Zwo fhambanaho na zwenezwo, u ṱanḓavhudza mushumo wawe wa u funza nga u thoma luṅwe lwendo, lwa vhuraru lu yaho Galilea. U dalela miḓi na miḓana yoṱhe henefho fhethu, a tshi funza zwikoloni nahone a tshi funza mafhungo maḓifha a Muvhuso. Zwine a zwi vhona kha holu lwendo zwi mu khwaṱhisela tshoṱhe uri hu na ṱhoḓea khulwane ya u khwaṱhisa mushumo wa u funza.

Huṅwe na huṅwe hune Yesu a ya, u vhona magogo a tshi khou shaya u fhodzwa muyani na u khuthadziwa. Vha nga nngu dzi si na mulisa, dzo ondaho na dzo balanganaho, nahone u vha pfela vhuṱungu. U vhudza vhafunziwa vhawe uri: “Khaṋo ndi khulu, vhakaṋi vhone a si vhanzhi. Ndi zwone humbelani Muṋe wa khaṋo uri a rume vhakaṋi khaṋoni yawe.”

Yesu u na zwine a khou humbula u ita. U ruma vhaapostola vha 12, vhe a vha nanga hu ṱoḓaho u vha ṅwaha wo fhiraho. U vha fhandekanya vha vha vhavhili-vhavhili, vha tshi ita zwipano zwa rathi zwa vhahuweleli, nahone a vha ṋea dzindaela. U a ṱalutshedza: “Ni songo pambutshela kha nḓila i yaho ha vha nnḓa; ni songo dzhena muḓini wa Vha-Samaria; khwine iyani ha nngu dzo xelaho dza nnḓu ya Isiraele. Tshimbilani ni huwelele ni ri: Muvhuso wa ṱaḓulu u tsini!”

Hoyu Muvhuso une vha fanela u funza nga hawo ndi we Yesu a vha funza uri vha u rabelele kha thabelo ya tsumbo. Muvhuso u tsini nga muhumbulo wa uri Khosi yo nangiwaho nga Mudzimu, Yesu Kristo, i henefho. U itela u khwaṱhisa vhafunziwa vhawe sa vhaimeleli vha wonoyo hulumeni u fhiraho wa vhathu, Yesu u vha ṋea maanḓa a u fhodza vhalwadze na u vusa vho faho. U vha laedza uri vha ite heyi mishumo nga fhedzi.

Lu tevhelaho u vhudza vhafunziwa vhawe uri vha si ite ndugiselelo dza zwithu zwi vhonalaho dza lwendo lwavho lwa u ya u funza. “Ni songo ṱuwa ní na tsimbi naho é maseṱha naho ú musuku dzikhuḓoni dzaṋu. Hu’ tshikwama tsha mbuvha, hu’ nguvho mbili, hu’ zwienda, na lubaḓa ni songo ṱuwa nazwo’. Ngauri mushumi tshawe nga hu vhe u ṋewa zwiḽiwa zwawe.” Vhane vha takalela mulaedza vha ḓo aravha nahone vha vha ṋea zwiḽiwa na vhulalo. Samusi Yesu a tshi ri: “Ni tshi swika muḓini naho hu muḓanani ni vhudzise arali hú na muthu we a fanela u iwa khae’, ni dzule muṱani wawe, ni vhuye ni fhirele phanḓa.”

Zwenezwo Yesu u ṋea ndaela dza u amba na vhaṋe vha miḓi nga ha mulaedza wa Muvhuso. U a laedza: “Ni tshi dzhena nḓuni ni i fhaṱutshedze. Arali yeneyo nnḓu yó zwi fanela, mulalo waṋu u ḓo ḓa kha yone; arali í so ngo fanela, mulalo waṋu u ḓo vhuyelela kha inwi. Arali muthu á sa ni ṱanganedzi, a hana na u pfa mafhungo aṋu, ni ṱutshele nnḓu yawe naho u muḓi wawe, ni fhufhure na luruli lwa kha milenzhe yaṋu.”

Nga ha muḓi une wa si ṱanganedze mulaedza wavho, Yesu u dzumbulula uri khaṱulo yawo i ḓo vhavha vhukuma. U a ṱalutshedza: “Ngoho, ndi a ni vhudza, muḓi uyo nga ḓuvha ḽa khaṱhulo​—shango ḽa Sodoma na ḽa Gomora ḽi ḓo vhona zwi re khwine.” Mateo 9:35–10:15; Marko 6:6-12; Luka 9:1-5.

▪ Yesu u thoma lini lwendo lwa vhuraru lwa u funza lwa Galilea, nahone lu mu khwaṱhisela mini?

▪ Musi a tshi rumela vhaapostola vhawe vha 12 u ya u funza, u vha ṋea ndaela dzifhio?

▪ Ndi ngani zwo tea uri vhafunziwa vha funze uri Muvhuso u tsini?