Ndima Ya 79

Lushaka lwo Xelaho, fhedzi Hu Si Lwoṱhe

NGA u ṱavhanya musi Yesu o no haseledza na vhe vha vha vho kuvhangana nnḓa ha nnḓu ya Mufarisei, vhaṅwe vha mu vhudza “mafhungo a vhaḽa vhathu vha Galilea vhe Pilato [Pontio muvhusi wa Roma] a ṱanganya malofha avho na malofha a zwidzimu zwavho.” Khamusi havha Vhagalilea ndi vhe vha vhulahwa musi Vhayuda vha zwigidi vha tshi lwela u shumisa ha Pilato tshelede i bvaho mbulungeloni ya thembele u itela u fhaṱa mugero wa u ḓisa maḓi Yerusalema. Vhane vha khou anetshela Yesu haya mafhungo vha nga kha ḓi vha vho vha vha tshi khou amba uri Vhagalilea vho wela kha ḽeneḽo dziedzi nga ṅwambo wa mishumo yavho mivhi.

Naho zwo ralo, Yesu u a vha khakhulula, a tshi vhudzisa: “Naa ni ri avho vhathu vha Galilea vha tshi vhona vhuṱungu vhungafho, vho vha vhe vha-ita-zwivhi vha fhiraho Vha-Galilea vhoṱhe naa? Nṋe ndi ri, aiwa,” Yesu u a fhindula. Zwenezwo a shumisa tshiitea tshenetsho u sevha Vhayuda: “Arali ná sa shanduka, ni ḓo lovha noṱhe ngauralo.”

A tshi bvela phanḓa, Yesu u humbula maṅwe makhaulambilu e a itea henefho, khamusi a tshimbidzanaho na u fhaṱiwa ha mugero. U a vhudzisa: “Na vhaḽa vhathu vha fumi na vhaṱanu-na-vhararu vho welwaho nga mutsheṱo wa Siloa, ni ri vho vha vhe vhatshinyi vha fhiraho vhathu vhoṱhe vha Yerusalema naa?” Hai, ho vha hu si nga ṅwambo wa vhuvhi ha havha vhathu he ha vha ita uri vha fe, Yesu u ralo. Nṱhani hazwo, “tshifhinga na zwiitea zwi songo lavhelelwaho,” (NW) ndi zwone zwi re na mulandu wa makhaulambilu eneo. Naho zwo ralo, Yesu u dovha a shumisa tshenetsho tshiitea u itela u sevha: “Ná sa shanduka, ni ḓo lovha noṱhe ngauralo.”

Zwenezwo Yesu u bvela phanḓa u ita tshifanyiso tsho teaho, a tshi ṱalutshedza: “Muṅwe muthu o vha e na muhuyu wo ṱavhiwaho tsimuni yawe; a ḓa a ṱoḓa mitshelo khawo’, a si i wane. A vhudza mulindi wa tsimu a ri: Vhona, zwino yo no vha miṅwaha miraru ndi tshi ḓa nda ṱoḓa mitshelo kha uyu muhuyu, ndi si wane tshithu. U reme, ngauri u kha ḓi vhivhela’ni tsimu. Uḽa a fhindula a ri: Murena, u litshe ṋaṅwaha; ndi range u bwa ndi mone nawo’, ndi u shele mupfudze. Ndi hone khamusi u tshi ḓo aṋwa. Arali zwá kunda, ndi hone U tshi ḓo u rema zwau.”

Yesu o lingedza miṅwaha i fhiraho miraru u ṱahulela lutendo kha lushaka lwa Vhayuda. Fhedzi ndi vha maḓana a si gathi a vhafunziwa vhane vha vhaliwa sa zwiaṋwiwa zwa mushumo wawe. Zwino, vhukatini ha hoyu ṅwaha wa vhuṋa wa tshumelo yawe, u khou khwaṱhisa vhuḓidini hawe, nga lwa pfanyisedzo a tshi bwa na u shela mupfudze kha muri wa Tshiyuda nga u swela u huwelela na u funza Yudea na Perea. Fhedzi naho zwo ralo zwi sa shume! Lushaka lu hana u shanduka, nga zwenezwo lwo lindela u fheliswa. Ndi vha masalela fhedzi vha lwonolwo lushaka vhane vha aravha.

Nga murahu Yesu u khou funza tshikoloni nga Sabatha. Henefho u vhona musadzi we nga ṅwambo wa mimuya mivhi, a fhedza miṅwaha ya 18 o kotama a sa onyolowi. Nga u mu pfela vhuṱungu, Yesu a amba nae a ri: “Musadzi, wo vhofhololwa vhuṱunguni hau.” Zwenezwo a vhea zwanḓa zwawe khae, nahone nga u ṱavhanya a onyolowa a thoma u renda Mudzimu.

Naho zwo ralo, muhulwane wa tshikolo, a sinyuwa. U a semana: “Maḓuvha a u shuma ndi maṱanu-na-ḽithihi. Iḓani ni fhodzwe nga eneo; ni litshe u ḓa nga Sabatha.” Nga zwenezwo onoyo muhulwane u a tenda maanḓa a Yesu a u fhodza, fhedzi u sasaladza musi vhathu vha tshi ḓa nga Sabatha u ḓo fhodzwa!

Yesu u a fhindula: “U mudzia-u-ḓi-fhura; noṱhe ni vhofholola phulu dzaṋu na mbongola dzaṋu mikungwani nga Sabatha na dzi isa huné dza nwa; zwino uyu muthu a re ṅwananyana wa Abrahamu, we a fhedza miṅwaha ya fumi na miṱanu-na-miraru ó vhoxwa nga Sathane, a nga litshwa hani u vhofhololwa dzimbofho idzi nga ḓuvha ḽa Sabatha.”

Ee, vha tshi pfa izwi, vhane vha khou hanedza Yesu vha shona. Naho zwo ralo, gogo ḽi takalela zwithu zwa vhugala zwine Yesu a zwi ita. A tshi vhona zwenezwo, Yesu a dovholola zwifanyiso zwivhili zwa vhuporofita malugana na Muvhuso wa Mudzimu, zwe a vhuya a zwi amba musi e gungwani Lwanzheni lwa Galilea hu ṱoḓaho u vha ṅwaha wo fhiraho. Luka 13:1-21; Muhuweleli 9:11; Mateo 13:31-33.

▪ Ndi makhaulambilu afhio o ambiwaho afha, nahone ndi ngudo ifhio ine Yesu a i ita ngao?

▪ Ndi tshumiso ifhio ine ya nga itwa nga ha muhuyu u sa aṋwi, khathihi na ndingedzo dza u u ita uri u aṋwe?

▪ Muhulwane wa tshikolo u tenda hani vhukoni ha Yesu ha u fhodza, naho zwo ralo Yesu u bvukulula hani u ḓiitisa ha onoyo munna?