Ndima Ya 36

Lutendo Luhulwane lwa Nduna ya Mmbi

MUSI Yesu a tshi ṋekedza Pfunzo yawe ya Thavhani, o vha a tshi vho ṱoḓa u fhedza tshumelo yawe ya khagala. Hezwi zwi amba uri o vha e na ṅwaha kana miṅwedzi ya ṱahe kana u fhira, yo salaho uri a fhedze mushumo wawe kha ḽifhasi.

Zwino Yesu u dzhena muḓini wa Kapernaume, mufuda wa haya he a vha a tshi ita mishumo yawe hone. Hafha vhanna vhahulwane vha Vhayuda vha ḓa khae na khumbelo. Vho vha vho rumiwa nga nduna ya mmbi ya Vharoma ine ya vha wa Vhannḓa, munna ane a si vhe Muyuda.

Muḓinḓa a funwaho wa yeneyo nduna ya mmbi u vho ṱoḓa u fa nga vhulwadze vhu vhavhaho, nahone i ṱoḓa Yesu a tshi fhodza muḓinḓa wayo. Vhayuda vha humbelela nduna vha tshi tou kwengweledza: “Zwo mu fanela U tshi mu ita zwiné a humbela. Ngauri lushaka lwashu u a lu funa; na tshikolo tshashu ndi ene o tshi fhaṱaho.”

A sa lenga-lengi, Yesu u ṱuwa na vhenevho vhanna. Naho zwo ralo, musi vha tshi swika tsini, nduna ya mmbi i ruma khonani uri dzi ri: “Murena, U songo ḓi-netisa, a tho ngo fanelwa U tshi dzhena tsini ha ṱhanga ya nnḓu yanga. Ndi zwone zwe nṋe ndi si ḓe ha iwe ngazwo’.”

Iyi nduna i dzhiiwaho i tshi vhusa vhaṅwe i amba nga u ḓiṱukufhadza lungafhani! Fhedzi khamusi i dovha ya humbula nga ha Yesu, i tshi ṱhogomela uri mukhuvha u thivhela Muyuda uri a konane na vha si Vhayuda. Na Petro o ri: “Ni a ḓivha zwauri kha munna wa Mu-Yuda ndi tshithu tshi so ngo fanelaho a tshi dzula na muthu u sili na u ḓa ha ene.”

Khamusi i tshi ṱoḓa uri Yesu a si pfiswe vhuṱungu nga u vunḓa hoyu mukhuvha, yeneyo nduna i ruma khonani dzayo uri dzi mu humbelele: “Amba fhungo ḽithihi fhedzi, muṱhannga wanga a fhole. Ngauri na nṋe, naho ndí muthu a vhuswaho, ndi vhusa vhadzia-mmbi vhanga. Ndá vhudza uno nda ri: Iyá! u a ya; ndá vhudza uyo nda ri: Iḓá! u a ḓa. Huno mulanda wanga ndá mu vhudza nda ri: Itá izwi! u a ita.”

Ee, musi Yesu a tshi pfa izwi, u a kanuka. U ri: “Ngoho ndi a ni vhudza, na kha Isiraele a thi athu u wana u tenda hungafha.” Musi o no fhodza muḓinḓa wa yeneyo nduna, Yesu u shumisa tshenetsho tshifhinga u anetshela nḓila ine vhatendi vhane vha si vhe Vhayuda vha ḓo thakhiwa ngayo nga phaṱutshedzo dzine dza laṱiwa nga Vhayuda vhane vha si vhe na lutendo.

Yesu u ri: “Vhubvaḓuvha na Vhukovhela hu ḓo bva vhanzhi vha ḽa muthathe-ndilo na Abrahamu na Isaka na Yakobo muvhusoni wa ṱaḓulu. Hone vhakololo vha ḓo bviselwa swiswini ḽa nnḓa-nnḓa, huné ha ḓo vha na tshililo na u shenganya maṋo.”

‘Vhakololo vhane vha bviselwa swiswini ḽa nnḓa-nnḓa’ ndi Vhayuda vha vhukuma vhane vha si ṱanganedze tshibuli tshe vha tshi ṋewa u thoma tsha u vha vhavhusi na Kristo. Abrahamu, Isaka, na Yakobo vha imela nzudzanyo ya Muvhuso wa Mudzimu. Nga zwenezwo Yesu u khou anetshela nḓila ine Vhannḓa vha ḓo ṱanganedza ngayo u dzula vhuḽeloni ha ṱaḓulu, “muvhusoni wa ṱaḓulu.” Luka 7:1-10; Mateo 8:5-13; Mishumo 10:28.

▪ Ndi ngani Vhayuda vha tshi kwengweledzela nduna ya mmbi ya Vhannḓa?

▪ Ndi mini zwine zwa nga ṱalutshedza uri ndi ngani nduna i songo tendela Yesu a tshi dzhena nḓuni yayo?

▪ Yesu u amba mini nga maipfi awe a u fhedza?