Ndima Ya 130

Lwanzheni lwa Galilea

ZWINO vhaapostola vha vhuyelela Galilea, samusi u thomani Yesu o vha laedza uri vha ite nga u ralo. Fhedzi a vha ḓivhi zwine vha fanela u zwi ita henengei. Nga murahu ha tshifhinganyana, Petro u vhudza Thoma, Nathanaele, Yakobo na mukomana wawe Yohane, na vhaṅwe vhafunziwa vhavhili uri: “Nṋe ndi yo rea khovhe.”

Vha rathi vha fhindula: “Na riṋe ri ya na iwe.”

Vhusiku hoṱhe, vha si kone u fasha tshithu. Naho zwo ralo, nga maḓautsha, Yesu u bvelela vhugabeloni, fhedzi vhaapostola a vha ṱalukanyi uri ndi Yesu. U a vhidzelela: “Vhana’nga, naa a ni na zwa u ḽa naa?”

Vha huwelela vhe maḓini vha ri: “Aiwa!”

U ri: “Ṱharamudzani mammbule nga thungo ya tsha u ḽa tsha gungwa, ndi hone ni tshi ḓo fasha.” Nahone musi vha tshi ita nga u ralo, vha a kundwa u hoha mambule avho nga ṅwambo wa vhunzhi ha khovhe.

Yohane u a kanuka: “Ndi Murena!”

Petro a tshi pfa zwenezwo, u ambara khanzu yawe, ngauri o vha o bvula zwiambaro zwawe, nahone a fhufhela lwanzheni. Zwenezwo u bambela mithara dzine dza ṱoḓa u vha 90 u swika vhugabeloni. Vhaṅwe vhaapostola vha tevhela vhe gungwani ḽiṱuku, vha tshi khou hoha mambule o ḓalaho khovhe.

Musi vha tshi swika vhugabeloni, vha vhona hu na mulilo wa mahale na khovhe khao, na tshinnkwa. Yesu u ri: “Ḓisani dziṅwe khovhe dze na fasha zwino.” Petro u kokodzela mambule vhugabeloni. O hwala khovhe khulwane dza 153!

Yesu u a vha ramba: “Iḓani ni swiṱule.”

A huna na muthihi wavho a re na tshivhindi tsha u vhudzisa uri “U nnyi?” ngauri vhoṱhe vha a zwi ḓivha zwa uri ndi Yesu. Holwu ndi lwa vhusumbe a tshi vhonala tshee a vuswa vhafuni, nahone ndi lwa vhuraru kha vhaapostola vho kuvhangana. Zwino u vha fha zwiḽiwa zwa nga matsheloni, a tshi ṋea muṅwe na muṅwe wavho tshinnkwa na khovhe.

Musi vha tshi fhedza u ḽa, zwi vhonala zwi tshi nga Yesu u sedza khovhe nnzhi dze vha fasha, u vhudzisa Petro: “Simoni murwa wa Yona, U tshi mpfuna U fhira avha naa?” Lu sa timatimisi u amba uri, Naa u funesa mushumo wa u rea khovhe u fhirisa mushumo we nda u lugiselela uri u ḓo u ita?

Petro u a aravha: “U a zwi ḓivha zwauri ndi a U funa.”

Yesu u a fhindula: “Lisa ngwana dzanga.”

U dovha a vhudzisa lwa vhuvhili: “Simoni murwa wa Yona, U a mpfuna naa?”

Petro u fhindula o tou ḓiimisela: “Iina Murena, U a zwi ḓivha zwauri ndi a U funa.”

Yesu u a mu laya hafhu: “Lisa nngu dzanga.”

Naho zwo ralo, u vhudzisa lwa vhuraru: “Simoni murwa wa Yona, U a mpfuna naa?”

Zwa zwino Petro o ṱungufhala. A nga vha a tshi vho vhilaela arali Yesu a tshi timatima u fulufhedzea hawe. Naho zwo ralo, musi Yesu e mulingoni wa vhutshilo hawe, Petro o mu landula kararu a ri ha mu ḓivhi. Ngauralo Petro u ri: “Murena! Zwithu zwoṱhe U a zwi ḓivha; U ḓivha na zwauri ndi a U funa.”

Yesu u mu laedza lwa vhuraru: “Lisa nngu dzanga.”

Nga zwenezwo Yesu u shumisa Petro u ṱuṱuwedza vhaṅwe nga ha mushumo we a vha a tshi ṱoḓa uri vha u ite. Hu si kale u ḓo ṱutshela ḽifhasi, nahone u ṱoḓa vha tshi ranga phanḓa kha u shumela vhane vha ḓo kungelwa dangani ḽa nngu dza Mudzimu.

Vhunga samusi Yesu o vhofhiwa nahone a haṱulwa nge a ita mushumo we Mudzimu a mu laedza uri a u ite, ngauralo, zwino u dzumbulula uri Petro u ḓo ṱangana na zwithu zwi fanaho na zwenezwi. Yesu u mu vhudza uri: “Zwiḽa Ú kha ḓi vha muswa wo vha U tshi ḓi-vhofha iwe muṋe, wa ya huné wa funa. U tshi vhó ḓo kalaha, U ḓo ṋekedza zwanḓa zwau; muṅwe a U vhofha a U isa huné wa sa ḓo hu funa.” Hu sa londwi uri Petro o vha a tshi ḓo fela lutendo lwawe, Yesu u a mu khadeledza: “Ntevhele.”

Huno Petro a tshi rembuluwa, u vhona Yohane nahone u a vhudzisa: “Murena, uyu-ha?”

Yesu u a fhindula: “Arali ndi tshi funa uri uyu, musi ndi tshi vhuya, ndi wane á kha ḓi vha hone, a si mafhungo au. Iwe ntevhele.” Haya maipfi a Yesu o ḓo pfeseswa nga vhunzhi ha vhafunziwa uri a amba zwa uri muapostola Yohane o vha a sa nga fi. Naho zwo ralo, samusi muapostola Yohane o ṱalutshedza nga murahu, Yesu ho ngo amba uri ha nga fi, fhedzi zwe Yesu a amba ndi hezwi: “Arali ndi tshi funa uri uyu, musi ndi tshi vhuya, ndi wane e hone, a si mafhungo au.”

Nga murahu Yohane na ene o ita heyi ṱhogomelo i swayeaho: “Hu kha ḓi vha na maṅwe mafhungo manzhi a zwe Yesu a ita, zwine​—arali zwó ṅwalwa nga u tevhekana hazwo​—nṋe nda ri: shango ḽi nga si ṱanganye maṅwalo ane a ḓo ṅwalwa.” Yohane 21:1-25; Mateo 26:32; 28:7, 10.

▪ Ndi mini zwi sumbedzaho uri vhaapostola a vha ḓivhi zwine vha fanela u zwi ita Galilea?

▪ Vhaapostola vha ḓivha hani Yesu Lwanzheni lwa Galilea?

▪ Yesu u vhonala lungana zwino u bva tshee a vuwa vhafuni?

▪ Yesu u ombedzela hani zwine a ṱoḓa vhaapostola vha tshi zwi ita?

▪ Yesu u sumbedza hani nḓila ine Petro a ḓo fa ngayo?

▪ Ndi ṱhalutshedzo dzifhio dza Yesu nga ha Yohane dze dza si pfeseswe nga vhunzhi ha vhafunziwa?