Ndima Ya 65

Lwendo lwa Tshiphiri lwa U Ya Yerusalema

NDI tshifhefho tsha 32 C.E., nahone Vhuṱambo ha Mishasha vhu tsini. Yesu o vha a tshi khou ḓi ita tshumelo yawe zwihuluhulu Galilea u bva nga Paseka ya 31 C.E., musi Vhayuda vha tshi lingedza u mu vhulaha. Zwi vhonala uri u bva tsheetsho Yesu o dalela Yerusalema fhedzi u itela u ya vhuṱamboni vhuraru ha ṅwaha muṅwe na muṅwe ha Vhayuda.

Zwino vharathu vha Yesu vha a mu kombetshedza: “Takuwa U ṱuwe afha U ye Yudea.” Yerusalema ndi muḓi muhulwane wa Yudea na fhethu huhulwane ha vhurereli ha ḽeneḽo shango ḽoṱhe. Vharathu vhawe vha ri: “Ngauri a huna muthu a shumaho ó dzumbama, ngeno a tshi ṱoḓa uri a ḓihwe.”

Naho Yakobo, Simoni, Yosefa, na Yuda vha sa tendi uri mukomana wavho, Yesu, ndi Messia zwa vhukuma, vha ṱoḓa a tshi sumbedza maanḓa awe a vhuṱolo kha vhoṱhe vho kuvhanganaho vhuṱamboni. Naho zwo ralo, Yesu u vhona hu na khombo. U ri: “Inwi shango a ḽi koni u ni vhénga; nṋe hone ḽi a mbénga ngauri ndi khou ḽi ṱanziela zwauri mishumo yaḽo ndi mivhi.” Ngauralo Yesu u vhudza vharathu vhawe uri: “Gonyani inwi ni ye vhuṱamboni; nṋe a thi athu u gonya vhuṱamboni uvhu.”

Vhuṱambo ha Mishasha ndi tshimima tsha maḓuvha a sumbe. Nga ḽa vhumalo vhu fhedziselwa nga maitele a vhurereli. Honoho vhuṱambo vhu swaya u fhela ha ṅwaha wa vhulimi nahone ndi tshifhinga tsha dakalo-fulu na dzindivhuho. Maḓuvha a si mangana musi vharathu vha Yesu vho no ṱuwa u ya vhuṱamboni na tshiṅwe tshigwada tshi yaho henengei, ene na vhafunziwa vhawe vha ya nga u tou ḓidzumba, vha sa vhonwi nga vhathu. Vho fara nḓila ya Samaria, nṱhani ha u fara ine vhathu vhanzhi vha tshimbila ngayo tsini na Mulambo wa Yorodane.

Samusi Yesu na vhe a vha a tshi khou tshimbila navho vho vha vha tshi ḓo ṱoḓa vhulalo muḓini wa Samaria, a ruma vhaḓinḓa vha mu ranga phanḓa u ita ndugiselelo. Naho zwo ralo, vhathu vha hana u ṱanganedza Yesu nge vha vhona o livha Yerusalema. Vho sinyuwa, Yakobo na Yohane vha ri: “Murena, arali U tshi funa, ri amba ra ri, mulilo u bvaho ṱaḓulu, u tse u vha fhedze.” Yesu a vha sola nge vha humbulela zwithu zwo raloho, vha fhirela kha muṅwe muḓi.

Vhe nḓilani, muḓivhi wa maṅwalo a ri kha Yesu: “Mufunzi, ndi ḓo U tevhela hoṱhe huné wa ya.”

Yesu u a fhindula: “Dziphunguhwe dzi na milindi yadzo, zwiṋoni zwa ṱaḓulu zwi na zwiṱaha; Murwa-muthu ene ha na huné a siamedza ṱhoho.” Yesu u khou ṱalutshedza uri onoyo muḓivhi wa maṅwalo u ḓo tshenzhela vhuleme arali a tshi vha mutevheli Wawe. Nahone zwi vhonala zwi tshi nga u khou ambela uri muḓivhi wa maṅwalo u ḓikukumusa nga maanḓa lune a sa nga ḓo kona u tshila haya matshilele.

Kha muṅwe munna, Yesu u ri: “Ntevhele!”

Onoyo munna u a fhindula: “Nditshe ndi range ndi yo swiṱa khotsi-anga.”

Yesu u a fhindula: “Litsha vhafu vha swiṱe vhafu vhavho; iwe U tshimbile U ḓivhadze muvhuso wa Mudzimu.” Zwi tou vha khagala uri khotsi a onoyo munna o vha a sa athu u fa, ngauri arali o vha o no fa, zwo vha zwi sa nga pfali uri murwa wawe a vhe e na Yesu a tshi khou mu thetshelesa. Zwi tou vha khagala uri onoyo murwa u khou humbela tshifhinga tsha u lindela khotsi awe vha tshi fa. Ho ngo ḓiimisela u vhea Muvhuso wa Mudzimu u thoma vhutshiloni hawe.

Musi vha tshi khou ḓi tshimbila nḓilani vho livha Yerusalema, muṅwe munna u vhudza Yesu uri: “Ndi ḓo U tevhela, Murena; hone ranga u nditsha ndi yo onesana na vhahashu.”

A tshi mu fhindula Yesu u ri: “O isaho tshanḓa kha dzembe, a dovha a lavhelesa murahu, ha ngo eḓanwa nga muvhuso wa Mudzimu.” Vhane vha ṱoḓa u vha vhafunziwa vha Yesu vha fanela u sedza fhedzi kha tshumelo ya Muvhuso. Samusi mugero u tshi nga kombama arali mulimi a sa dzuli o sedza phanḓa, ngauralo naho e nnyi ane a sedza murahu kha ano maitele a kale a zwithu a nga kha ḓi khukhulisea a bva nḓilani i isaho vhutshiloni vhu sa fheli. Yohane 7:2-10; Luka 9:51-62; Mateo 8:19-22.

▪ Vharathu vha Yesu ndi vhonnyi, nahone vha ḓipfa hani nga hae?

▪ Ndi ngani Vhasamaria vhe na tshipimbi nga u rali, nahone Yakobo na Yohane vha ṱoḓa u ita mini?

▪ Ndi nyambedzano dzifhio tharu dzine Yesu a vha nadzo nḓilani, nahone u ombedzela hani ṱhoḓea ya tshumelo ya u ḓiṋekedza?