Ndima Ya 86

Mafhungo a Murwa o Xelaho

MUSI o no fhedza u anetshela Vhafarisei izwi zwifanyiso nga ha u wana nngu yo xelaho na sheleni yo xelaho, zwino Yesu u bvela phanḓa na tshiṅwe tshifanyiso. Hetshi ndi tsha khotsi wa lufuno na nḓila ine a fara ngayo vharwa vhawe vhavhili, ane muṅwe a vha na vhukhakhi vhuhulwane vhukuma.

Tsha u thoma, hu na murwa muṱuku, ene mubvumbedzwa muhulwane wa hetshi tshifanyiso. U kuvhanganya ifa ḽawe, ḽe khotsi awe a mu fha a sa timatimi. A ṱuwa hayani nahone a tshila matshilele a u ḓifara huvhi vhukuma. Fhedzi thetshelesani musi Yesu a tshi anetshela mafhungo, nahone ni vhone arali ni tshi nga kona u ṱalukanya uri vhabvumbedzwa vha imela vhonnyi.

Yesu u a thoma: “Muṅwe muthu o vha e na vharwa vhavhili. Murathu a amba na khotsi-awe a ri: Khotsi, kovha thundu, U mphe zwi re zwanga! Khotsi a vha kovhekanya thundu.” A re muṱuku u ita mini nga zwine a zwi wana?

Yesu u a ṱalutshedza: “Hu sathu u fhela maḓuvha manzhi murathu a kuvhanganya zwoṱhe a ṱuwa a ya shangoni ḽiṅwe, a laṱekanya thundu yawe é ḽihwarahwara.” Vhukuma, u shumisa tshelede yawe e na midzhulumba. Nga murahu zwifhinga zwi konḓaho zwa mu wela, samusi Yesu a tshi bvela phanḓa u anetshela:

“Ha ri ó ḽa thundu yawe yoṱhe, ha wa nḓala khulu iḽo shangoni ḽoṱhe, a thoma u tshinyala; a ya a tholwa nga muṅwe muthu wa iḽo shango; a rumiwa a yo lisa nguluvhe mafuloni. A lila u fusha thumbu yawe nga mifumbu i ḽiwaho nga dzinguluvhe, na yone a si vhe na a mu ṋeaho.”

Ndi zwa fhasi lungafhani u kombetshedzwa u vha mulisa wa nguluvhe, samusi hezwi zwipuka zwo vha zwi songo kuna u ya nga Mulayo! Fhedzi zwe zwa pfisa vhuṱungu vhukuma onoyo murwa ndi nḓala i vhavhaho ye ya ita na u mu tamisa zwiḽiwa zwa nguluvhe. Nga ṅwambo wa dziedzi ḽawe ḽi pfisaho vhuṱungu, Yesu o ri, “a thoma u ḓi-humbula.”

A tshi bvela phanḓa na mafhungo awe, Yesu u a ṱalutshedza: “A ri [mbiluni yawe]: Khotsi-anga vhashumeli vhawe ndi vhanzhi; vha na vhuswa vhunzhi; nṋe ngeno ndi tshi khou fa nga nḓala. Ndi ḓo takuwa nda ya ha khotsi-anga. Ndi ḓo ri: Khotsi-anga! Ndo tshinya phanḓa ha Wa-Ṱaḓulu na phanḓa hau. A tho ngo tsha fanela u pfi murwa wau. Ṋyite muṅwe wa vhashumeli vhau. A takuwa a ya ha khotsi-awe.”

Zwiṅwe zwine zwa fanela u ṱhogomelwa khezwi: Arali khotsi awe o vha o mu rembulutshela nahone a mu hambekanya o sinyuwa musi a tshi ṱuwa hayani, onoyo murwa o vha a sa nga ḓo vhuya a ḓiimisela u ita zwine a khou ṱoḓa u ita. O vha a tshi ḓo ḓiimisela u huma nahone a lingedza u ṱoḓa mushumo huṅwe fhethu u itela uri a si livhanye tshifhaṱuwo na khotsi awe. Naho zwo ralo, ho ngo vhuya a humbula nga u ralo. O vha a tshi ṱoḓa u vha hayani!

Zwi tou pfala uri khotsi a re kha tshifanyiso tsha Yesu u imela Khotsi ashu wa ṱaḓulu wa lufuno, na khathutshelo, Yehova Mudzimu. Nahone khamusi na inwi ni a ṱhogomela uri murwa o xelaho, kana wa ḽihwarahwara, u imela vhaitazwivhi vha ḓivhiwaho. Vhafarisei, vhane Yesu a khou amba navho, u thomani vho sasaladza Yesu nge a ḽa na vhenevha. Fhedzi murwa muhulwane u imela vhafhio?

Musi Murwa o Xelaho A tshi Wanala

Musi murwa o xelaho, kana wa ḽihwarahwara wa kha tshifanyiso tsha Yesu a tshi vhuyelela hayani ha khotsi awe, u ṱanganedzwa nga tshimima-ḓe? Thetshelesani musi Yesu a tshi ṱalutshedza:

“Á kha ḓi vha kule, khotsi-awe a mu vhona, a mu khathutshela mbilu, a gidima a mu fara nga zwanḓa, a mu kuvhatedza.” Ndi khotsi wa khathutshelo na wa lufuno lungafhani, a imelaho zwavhuḓi Khotsi ashu wa ṱaḓulu, Yehova!

Zwi vhonala uri khotsi o vha o pfa nga ha matshilele a fhasi a murwa wawe. Naho zwo ralo u a mu ṱanganedza a songo vhuya a lindela a tshi ṱalutshedza. Na Yesu u na wonoyo muya wa u ṱanganedza, a tshi ḓifunela u amba na vhaitazwivhi na vha lutho, vhane kha hetshi tshifanyiso vha imelwa nga murwa wa ḽihwarahwara.

I ngoho, khotsi a pfesesaho wa kha tshifanyiso tsha Yesu lu sa timatimisi u fanela u vha a tshi khou vhona uri murwa wawe o rembuluwa nga u vhona tshifhaṱuwo tshawe tsho ṱungufhalaho, na tsho bilufhalaho musi a tshi vhuya. Fhedzi u ḓiimisela u mu ṱanganedza ha khotsi hu ita uri onoyo murwa a ḓipfe o vhofholowa u ḓiamba zwivhi zwawe, samusi Yesu a tshi anetshela: “Murwa wawe a amba a ri: Khotsi! Ndo tshinya phanḓa ha Wa-Ṱaḓulu na phanḓa hau; a tho ngo tsha fanela u pfi murwa wau. [“Ṋyite muṅwe wa vhashumeli vhau,” NW].”

Naho zwo ralo, a sa athu na u fhedza u amba khotsi a onoyo murwa a dzhia vhukando, u laedza vhalanda vhawe uri: “Ṱavhanyani ni ḓise nguvho, ni nange yavhuḓi yadzo, ni mu ambadze; ni mu ambadze na tshiṅina tsha munwe, na thóvho milenzheni. Ni ḓise ṋamana yo nonaho, ni i ṱhavhe; ri ḽe ri takale. Ngauri uyu murwa wanga o vha o fa, a dovha a tshila; o vha o xela, a dovha a wanala!” Zwenezwo vha thoma “u takala.”

Nga tshenetsho tshifhinga, “mukomana ene o vha e tsimuni.” Vhonani uri ni nga mu fanyisa na vhafhio nga u thetshelesa mafhungo a tevhalaho. Yesu u amba hezwi nga ha mukomana: “A tshi swika tsini ha nnḓu, a pfa hu tshi lila mbila hu tshi imbiwa. A vhidza muṅwe wa vhaṱhannga a mu vhudzisa zwiné vha ita. Uyo a ri: Murathu wau o ḓa. Khotsi-au o ṱhavha ṋamana yo nonaho nge a dovha a mu vhona a kha ḓi vha hone. Mukomana a sinyuwa a hana u dzhena nḓuni; khotsi-awe a bva a mu fhembeledza. Ene a fhindula khotsi-awe a ri: Vhona, nṋe ndo fhedza miṅwaha minzhi ndi tshi U shumela; a huna he nda pfuka milayo yau. Huno nṋe a U athu u mpha na mbudzi zwayo uri ndi kone u takala na khonani dzanga. Zwino uyu murwa wau o laṱekanyaho thundu yawe na dziphombwe, U mu ṱhavhela iyi ṋamana yo nonaho.”

Ndi vhafhio, u fana na mukomana, vhe vha sasaladza khathutshelo na ṱhogomelo ye ya ṋewa vhaitazwivhi? Naa a si vha maṅwalo na Vhafarisei? Samusi hu u sasaladza havho Yesu musi a tshi ṱanganedza vhaitazwivhi hune ha mu ita uri a ambe tshenetshi tshifanyiso, zwi tou vha khagala uri ndi vhone vhane vha imelwa nga mukomana.

Yesu u phetha mafhungo awe nga khumbelo ya khotsi kha murwa wawe muhulwane: “Ṅwana’nga! Iwe U na nṋe misi yoṱhe; huno zwoṱhe zwi re zwanga ndi zwau. Zwo fanela U tshi wisa mbilu wa takala, ngauri uyu murathu wau o vha o fa, a dovha a tshila; o vha o xela, a dovha a wanala.”

Naho zwo ralo Yesu ha fhedzisi uri onoyo mukomana u ita mini mafheleloni. Vhukuma, nga murahu, musi Yesu o no fa na musi o no vuswa vhafuni, “na vho-tshifhé vhanzhi vha ḓa vha vhuswa nga lutendo,” khamusi vha tshi katela na havha vha tshigwada tsha “mukomana” ane Yesu a khou amba nga hae hafha.

Fhedzi ndi vhafhio musalauno vhane vha imelwa nga avha vharwa vhavhili? Hu fanela u vha hu vhe vha ḓivha nga ho eḓanaho nga ha ndivho dza Yehova uri vha vhe na mutheo wa u dzhena kha vhushaka nae. Mukomana u imela miṅwe miraḓo ya vha “sambi ḽiṱuku,” kana “tshivhidzo tsha matanzhe e a ṅwaliwa ngei ṱaḓulu.” Havha vho vha na mavhonele a fanaho na a mukomana. Vho vha vhe si na dzangalelo ḽa u ṱanganedza tshigwada tsha vha kha ḽifhasi, vha “dziṅwe nngu,” vhe vha vha humbulela uri vho vha vha tshi khou ḓidzhiela vhuimo vhu si havho.

Murwa wa ḽihwarahwara ene kha ḽiṅwe sia, u imela vhathu vha Mudzimu vhane vha ṱuwa vha ya u ḓiphina nga madakalo a ḽino shango. Naho zwo ralo, nga u ya ha tshifhinga, havha vha a rembuluwa nahone vha dovha vha vha vhashumeli vha mafulufulu vha Mudzimu. I ngoho, Khotsi u na lufuno na khathutshelo lungafhani kha vhane vha vhona zwo tea u humbela pfarelo na u vhuyelela khae! Luka 15:11-32; Levitiko 11:7, 8; Mishumo 6:7; Luka 12:32; Vha-Heberu 12:23; Yohane 10:16.

▪ Yesu u vhudza vhafhio itshi tshifanyiso, kana mafhungo, nahone ndi ngani?

▪ Mubvumbedzwa muhulwane mafhungoni aya ndi nnyi, nahone hu itea mini khae?

▪ Ndi vhafhio misini ya Yesu vhane vha imelwa nga khotsi na murathu?

▪ Yesu u edzisa hani tsumbo ya khotsi a pfelaho vhuṱungu wa kha tshifanyiso tshawe?

▪ Mavhonele a mukomana ndi afhio nga ha u ṱanganedzwa ha murathu wawe, nahone Vhafarisei vho ḓifara hani sa onoyo mukomana?

▪ Tshifanyiso tsha Yesu tshi shuma hani ḓuvhani ḽashu?