Ndima Ya 105

Mathomo a Ḓuvha ḽi Lemelaho

MUSI Yesu a tshi ṱuwa Yerusalema nga madekwana a Musumbuluwo, u humela Bethania kha dzengama ḽa thungo ya vhubvaḓuvha ha Thavha ya Miṱwari. Maḓuvha mavhili a vhuḓinḓa hawe ha u fhedza kha ḽa Yerusalema o fhela. A zwi timatimisi uri Yesu u dovha a fhedza vhuṅwe vhusiku na khonani yawe Lazaro. U bva tshee a vhuya Yeriko nga Ḽavhuṱanu, hovhu ndi vhusiku ha vhuṋa e Bethania.

Zwino, nga matsheloni-tsheloni a Ḽavhuvhili, nga ḽa 11 Nisan, ene na vhafunziwa vhawe vha dovha vha dzhena nḓilani. Ḽi sumbedza u vha ḓuvha ḽi lemelaho kha vhuḓinḓa ha Yesu, ḽe a farakanea nga maanḓa u fhira naho hu lini. Ndi ḓuvha ḽa u fhedza a tshi vhonala thembeleni. Nahone ndi ḓuvha ḽawe ḽa u fhedza ḽa vhuḓinda hawe ha khagala a sa athu u lingiwa na u vhulahwa.

Yesu na vhafunziwa vhawe vha fara yeneyo nḓila i bvaho nga Thavhani ya Miṱwari i tshi ya Yerusalema. Matungo a yeneyo nḓila vha tshi bva Bethania, Petro u ṱhogomela muri we Yesu a u sema nga tsha mulovha nga matsheloni. U a kanuka: “Mufunzi, vhona uḽa muhuyu we wa u sema, wo oma.”

Fhedzi ndi ngani Yesu o vhulaha wonoyo muri? U sumbedza tshiitisi musi a tshi bvela phanḓa uri: “Ngoho ndi a ni vhudza ndi ri: Arali ni na lutendo ni sa timatimi, a ni nga iti izwi zwa muhuyu fhedzi. Ni ḓo ri u amba na thavha iyi [Thavha ya Miṱwari ye vha ima khayo] na ri: Takuwa U ḓi-pose lwanzheni! zwa ralo. Na zwoṱhe zwiné na ḓo humbela nga thabelo ni tshi tenda, ni ḓo zwi wana.”

Ngauralo nga u ita uri wonoyo muri u ome, Yesu u khou ṋekedza vhafunziwa vhawe ngudo ya tsumbo ya uri vha fanela u tenda kha Mudzimu. Samusi a tshi bula: “Zwoṱhe zwiné na humbela thabeloni, ni tende uri ni ḓo ṋewa; ndi hone ni tshi ḓo fhiwa zwiné na humbela.” Ndi ngudo khulwane lungafhani uri vha i gude, zwihuluhulu hu tshi vhonwa milingo i ofhisaho ine ya ḓo ḓa hu si kale! Naho zwo ralo, hu na huṅwe u ṱangana vhukati ha u oma ha muhuyu na pfaneleo ya lutendo.

Lushaka lwa Isiraele, u fana na hoyu muhuyu, lu na mbonalo i fhuraho. Naho lwonolwo lushaka lu kha vhushaka ha mulanga na Mudzimu nahone lu tshi nga vhonala lu tshi ṱhogomela ndaela dzawe, lwo sumbedza sa lu si na lutendo, lu si na mitshelo yavhuḓi. Nga nṱhani ha u sa tenda, lu ita na u landula Murwa wa Mudzimu nga dzawe! Nga zwenezwo, nga u ita uri muhuyu u sa aṋwiho u ome, Yesu u khou sumbedza nga hu pfalaho zwine mvelelo dza u fhedza dza ḓo vha zwone kha holu lushaka lu sa aṋwiho, lu sa tendi.

Nga u ṱavhanya, Yesu na vhafunziwa vhawe vha swika Yerusalema, nahone samusi u mukhuvha wavho, vha ya thembeleni, hune Yesu a thoma u funza. Vhotshifhe vhahulwane na vhahulwane vha vhathu, a zwi timatimisi uri vha tshi humbula nyito ya Yesu kha vhadzia-mali nga tsha mulovha, vha a mu pikisa: “Zwiné wa ita U zwi ita nga maanḓa-ḓe? Ndi nnyi o U fhaho maanḓa a u ralo?”

A tshi fhindula Yesu u ri: “Na nṋe ndi ḓo ni vhudzisa fhungo ḽithihi, ḽiné na ḓo ri u mphindula, nda kona u ḓo ni vhudza uri ndi maanḓa-ḓe ané nda ita izwi ngao’; ndi ri: Ndovhedzo ya Yohane yo vha i tshi bva ngafhi? Yo vha i tshi bva ṱaḓulu, kana yo vha i tshi bva kha vhathu?”

Vhotshifhe na vhahulwane vha thoma u elekanya vhone vhaṋe nḓila ine vha ḓo fhindula ngayo. “Arali ra ri: i bva ṱaḓulu, ene u ḓo ri: ndi mini ní songo mu tenda? Arali ra ri: i bva kha vhathu, ri ofha mavhuthu, ngauri vhoṱhe vha ri: Yohane o vha e muporofita.”

Vhenevho vharangaphanḓa a vha ḓivhi tshine vha nga fhindula. Ngauralo vha a fhindula-vho Yesu: “A ri zwi ḓivhi.”

Yesu a tshi fhindula-vho, u ri: “Na nṋe-ha a thi nga ni vhudzi zwauri ndi maanḓa-ḓe ané nda shuma ngao’.” Mateo 21:19-27; Marko 11:19-33; Luka 20:1-8.

▪ Ndi mini tshi swayeaho nga ha Ḽavhuvhili, ḽa 11 Nisan?

▪ Ndi ngudo dzifhio dze Yesu a dzi ṋekedza musi a tshi ita uri muhuyu u ome?

▪ Yesu u fhindula hani vhane vha mu vhudzisa uri ndi maanḓa-ḓe ane a shuma ngao?