Ndima Ya 47

Miṱodzi yo Shanduka ya vha Dakalofulu

MUSI Yairo a tshi vhona mufumakadzi we a vha e na vhulwadze ha ṅombe o fhodzwa, a zwi timatimisi uri fulufhelo ḽawe kha maanḓa a Yesu a u fhodza ḽi a engedzea. Nga matsheloni ḽeneḽo ḓuvha, Yesu o humbelwa nga Yairo uri a ḓe a thuse ṅwananyana wawe ane a mu funesa wa miṅwaha ya 12, we a vha e tsini na u fa. Naho zwo ralo, zwine zwino Yairo a zwi ofhesa nga maanḓa zwi a itea. Musi Yesu a tshi kha ḓi amba na onoyo mufumakadzi, vhaṅwe vhanna vha swika vha sevhela Yairo vha ri: “Ṅwananyana wau o fa; Mufunzi U kha ḓi mu netisela’ni?”

Aya mafhungo a vhaisa lungafhani! Edzanu u humbula: Hoyu munna, ane a ṱhonifhiwa zwihulu nga vhathu, zwino o kulea nungo tshoṱhe musi a tshi pfa nga ha lufu lwa ṅwananyana wawe. Naho zwo ralo, Yesu a pfa hu tshi ambiwa nga hazwo. Nga zwenezwo, a tshi amba na Yairo, u a mu khuthadza: “U songo ofha, tshau hu vhe u tenda.”

Yesu u ṱuwa na onoyo munna o pfaho vhuṱungu musi a tshi ya hayani hawe. Musi vha tshi swika, vha wana ḽi vilili vha tshi khou lila na u zhamba. Gogo ḽa vhathu ḽo kuvhangana, nahone vha khou ḓirwa nga vhuṱungu. Musi Yesu a tshi dzhena, u a vhudzisa: “Naa ni vhilinga nga mini? Ni lilela’ni? Ṅwananyana ha ngo fa; o ro eḓela.”

Musi vha tshi pfa izwo, vhathu vha thoma u sea Yesu ngauri vha a zwi ḓivha uri ṅwananyana o fa zwa vhukuma. Naho zwo ralo, Yesu u ri o eḓela. A tshi shumisa maanḓa awe e a ṋewa nga Mudzimu, u ḓo sumbedza uri vhathu vha nga vuswa vhafuni samusi vha tshi nga vuswa nga nḓila i leluwaho khofheni khulu.

Zwino Yesu a ri vhoṱhe vha bvele nnḓa nga nnḓa ha Petro, Yakobo, Yohane, na mme na khotsi a ṅwananyana o faho. Zwenezwo a ṱuwa na havha vhaṱanu a ya he ṅwananyana a vha o eḓedzwa hone. A tshi mu fara nga tshanḓa, Yesu u ri: “Thalita kumi! ndi uri: Ṅwananyana, ndi ri: Vuwa!” Nahone nga u ṱavhanya ṅwananyana u a vuwa a thoma u tshimbila! Zwine zwa khou itea zwa ita uri vhabebi vhawe vha nge vha sa ṱangana dziṱhoho nga dakalofulu.

Musi o no laedza uri onoyo ṅwana a ṋewe zwiḽiwa zwa u ḽa, Yesu u vhudza Yairo na musadzi wawe uri vha si vhudze naho e nnyi zwe zwa itea. Fhedzi hu sa londwi zwine Yesu a amba, eneo mafhungo a anda dzinguni ḽoṱhe. Heyi ndi mvuwo ya vhuvhili ine Yesu a i ita. Mateo 9:18-26; Marko 5:35-43; Luka 8:41-56.

▪ Ndi mafhungo afhio ane Yairo a a ṱanganedza, nahone Yesu u mu khuthadza hani?

▪ Vhuimo ho tou ita hani musi vha tshi swika hayani ha Yairo?

▪ Ndi ngani Yesu a tshi amba uri ṅwana o faho o tou eḓela?

▪ Ndi vhafhio vhaṱanu vha re na Yesu vhane vha ṱanziela iyo

mvuwo ya mufu?