Ndima Ya 1

Milaedza I Bvaho Ṱaḓulu

ZWI re zwone ndi uri Bivhili yoṱhe ndi mulaedza u bvaho ṱaḓulu, we wa ṋewa nga Khotsi ashu wa ṱaḓulu u itela u ri laya. Naho zwo ralo, hune ha nga vha miṅwaha i ṱoḓaho u vha ya 2 000 yo fhiraho muruṅwa ane ‘a ima phanḓa ha Mudzimu’ o ḓivhadza milaedza mivhili yo khetheaho. Dzina ḽawe ndi Gabriele. Kha ri ṱolisise zwiimo zwa hohu u dala huvhili ha ndeme kha ḽifhasi.

Ṅwaha ndi 3 B.C.E. Mivhunduni ya Yudea, khamusi hune hu si tou vha kulesa na Yerusalema, hu dzula tshifhe wa Yehova ane a pfi Sakaria. O no vha wa maḓuvha, na Elisabetha, mufumakadzi wawe o no kegula. Nahone a vha na vhana. Ndi ḓuvha ḽa Sakaria ḽa tshumelo ya vhutshifhe nḓuni khethwa ya Mudzimu ngei Yerusalema. Nga khathihi fhedzi Gabriele u bvelela kha tshanḓa tsha u ḽa tsha aletare ya zwioro.

Sakaria o tshuwa vhukuma. Fhedzi Gabriele u dzikisa nyofho dzawe, a tshi ri, “U songo ofha, Sakaria, ngauri thabelo yau yo pfiwa. Elisabetha musadzi wau u ḓo U bebela murwa, ané wa ḓo mu ira dzina ḽa Yohane.” Gabriele u bvela phanḓa u ḓivhadza uri Yohane “u ḓo vha muhulwane phanḓa ha Murena [Yehova]” na uri u ḓo ‘lugisela Yehova lushaka lwo ḓiṱamaho.’

Naho zwo ralo, Sakaria ha zwi tendi. Zwi vhonala zwi sa tendei uri ene na Elisabetha vha nga vha na ṅwana kha miṅwaha ine vha vha khayo. Ngauralo Gabriele u mu vhudza uri: “U ḓo vha tshimuma, a U nga koni u amba, hu vhuye hu swike ḽeneḽo ḓuvha ḽiné zwa bvelela ngaḽo’; ngauri a wo ngo tenda zwe nda amba.”

Ee, zwi tshee zwo ralo, vhathu nnḓa vho akhamala uri ndi ngani Sakaria a tshi khou dzhia tshifhinga tshingafha e ngomu nḓuni khethwa. Musi mafheleloni a tshi bvela nnḓa, ha tsha kona u amba, fhedzi u kona u amba nga zwanḓa zwawe fhedzi, nahone vha ṱhogomela uri o vhona zwiṅwe zwithu zwi akhamadzaho.

Musi Sakaria o no fhedza tshifhinga tshawe tsha tshumelo nḓuni khethwa, u vhuyelela hayani. Nahone nga u ṱavhanya zwa itea zwa vhukuma​—Elisabetha u vha muthu wa thovhela! Musi o lindela uri ṅwana wawe a bebwe, Elisabetha u dzula hayani kule na vhathu miṅwedzi miṱanu.

Nga murahu Gabriele u dovha a bvelela. Nahone u amba na nnyi? Na musidzana a sa athu u vhingwa ane a pfi Maria wa muḓini wa Nazareta. Ndi mulaedza ufhio une zwino a u ḓivhadza? Thetshelesani! Gabriele u vhudza Maria uri: “Wo wana u khathutshelwa nga Mudzimu. Vhona, U ḓo vha muthu wa thovhela, wa beba murwa, ané wa ḓo mu ira dzina ḽa uri Yesu.” Gabriele u a engedza: “Ngauri u ḓo vha muhulwane, u ḓo pfi Murwa wa Wa-Ṱaḓulu-ṱaḓulu; . . . U ḓo vhusa nnḓu ya Yakobo lini na lini, huno vhuhosi hawe a vhu nga vhi na mugumo.”

Ri nga vha na vhungoho ha uri Gabriele u ḓipfa e o khetheaho u ḓivhadza yeneyi milaedza. Nahone musi ri tshi vhala zwinzhi nga ha Yohane na Yesu, ri ḓo vhona nga hu re khagala vhukuma uri ndi ngani yeneyi milaedza i bvaho ṱaḓulu i mihulwane nga u rali. 2 Timotheo 3:16; Luka 1:5-33.

▪ Ndi milaedza ifhio mivhili mihulwane ine ya ḓivhadzwa i tshi bva ṱaḓulu?

▪ Ndi nnyi ane a ḓivhadza yeneyo milaedza, nahone i iswa kha vhonnyi?

▪ Ndi ngani iyi milaedza i i konḓaho u tendea nga u rali?