Ndima Ya 45

Mufunziwa A Songo Ḓoweleaho

NDI bono ḽi ofhisaho lungafhani musi Yesu a tshi swika vhugabeloni! Vhanna vhavhili vho halifhaho vha ḓa vha tshi bva mavhiḓani a re henefho tsini vha mu gidimela. Vha na mimuya mivhi. Samusi muṅwe wavho zwi tshi vhonala uri o halifha nga maanḓa u fhira muṅwe nahone o tambudzwa nga maanḓa nga mimuya mivhi, u vha ene ane a ṱhogomelwa.

Hoyu munna a ṱungufhadzaho o vha a tshi dzula a songo ambara vhukati ha mavhiḓa tshifhinga tshilapfu. Vhusiku na masiari, u ṱwa a tshi zhamba na u ḓikanḓa nga matombo. U halifha nga maanḓa lune hu si vhe na muthu a re na tshivhindi tsha u fhira nga yeneyo nḓila. Ho itwa ndingedzo dza u mu vhofha, fhedzi u ṱhukhukanya dzingeḓane na dzitsimbi milenzheni yawe. A hu na muthu a re na maanḓa a u mu kunda.

Musi onoyo munna a tshi swika kha Yesu na u gwadama milenzheni yawe, mimuya mivhi ine ya khou mu langa ya mu ita uri a zhambe: “Ndi na mafhungo-ḓe na iwe, Yesu Murwa wa Mudzimu wa ṱaḓulu-ṱaḓulu? Ndi a U humbela nga Mudzimu ndi ri U songo ntshengedza.”

Yesu u ḓi amba uri: “Iwe muya muvhi, ibva kha muthu uyu.” Fhedzi zwenezwo Yesu u a vhudzisa: “U pfi nnyi?”

Phindulo i ri: “Ndi pfi Mmbi, ngauri ri vhanzhi.” Mimuya mivhi i a takalela u vhona u tambula ha vhathu vhane ya kona u dzhena khavho, zwi vhonala uri i takalela u kuvhangana khavho nga muya wa tshigwada tshi vutshelaho tsha vhugoswi. Fhedzi musi i tshi ṱangana na Yesu, i humbela uri i si posiwe dindini. Ri vhona hafhu uri Yesu u na maanḓa mahulu; o kona u kunda na mimuya mivhi yo halifhaho. Hezwi zwi dovha zwa bvukulula uri mimuya mivhi i a zwi ḓivha uri u posiwa hayo dindini khathihi na murangaphanḓa wayo, Sathane Diabolo, ndi khaṱulo ya Mudzimu ya u fheleledza khavho.

Sambi ḽa nguluvhe dzine dza ṱoḓou vha 2 000 ḽi khou fula thavhani i re henefho tsini. Ngauralo yeneyo mimuya mivhi i ri: “Ri rume nguluvheni, ri dzhene kha dzone.” Zwi vhonala uri yeneyo mimuya mivhi i wana muṅwe mufuda wa dakalo ḽi si ḽa nzulele ḽa tshiṱuhu nga u dzhena kha mivhili ya zwivhumbiwa zwa ṋama. Musi Yesu a tshi i tendela u dzhena kha dzenedzo nguluvhe, nguluvhe dzoṱhe dza 2 000 dzo mbo ḓi ḓiposela luwani dza dzhena lwanzheni.

Musi vhalisa vha dzenedzo nguluvhe vha tshi vhona izwi, vha gidimela muḓini na masimuni u yo vhiga eneo mafhungo. Nga zwenezwo, vhathu vha a bva u itela u vhona zwe zwa itea. Musi vha tshi swika, vha vhona muthu we mimuya mivhi ya bva khae. Ee, o ambara nahone ndi muthu a ḓivhaleaho, o dzula milenzheni ya Yesu!

Ṱhanzi dzo zwi vhonaho nga maṱo dzi anetshela nḓila ye onoyo munna a fhodzwa ngayo. Vha ita na u vhudza vhathu nga u fa ha nguluvhe hu ofhisaho. Musi vhathu vha tshi pfa izwi, vha farwa nga nyofho khulu, nahone vha khadeledza Yesu zwa vhukuma uri a ṱuwe shangoni ḽavho. Nga zwenezwo a thetshelesa nahone a dzhena gungwani. Onoyo muthu we a vha e na mimuya mivhi u humbela Yesu uri a mu tendele u ṱuwa nae. Fhedzi Yesu u mu vhudza uri: “Iyá hayani hau ha vha hau, U vha vhudze zwihulwane zwe Mudzimu a U ita, na zwe a U khathutshela.”

Yesu kanzhi u laedza vhane a vha fhodza uri vha si vhudze naho e nnyi, samusi a sa ṱoḓi uri vhathu vha ite dziphetho kha mutheo wa mivhigo i nyanyulaho. Fhedzi hohu u sa shumisa eneo maitele ho tea ngauri onoyo muthu we a vha e na mimuya mivhi u ḓo vha a tshi khou ṱanziela kha vhathu vhane zwino khamusi Yesu a sa ḓo vha na tshibuli tsha u swika khavho. Zwiṅwe hafhu, u vha hone ha onoyo munna zwi ḓo ṋekedza vhuṱanzi nga ha maanḓa a Yesu a u ita zwivhuya, zwi tshi lwisana na muvhigo naho u ufhio u si wavhuḓi une wa nga phaḓaladziwa nga ha u lozwiwa ha dzinguluvhe.

A tshi vhulunga ndaela ya Yesu, onoyo we a vha e na mimuya mivhi u a ṱuwa. U thoma u huwelela kha ḽoṱhe ḽa Miḓini ya Fumi zwoṱhe zwe Yesu a mu itela zwone, nahone vhathu vho mangala. Mateo 8:28-34; Marko 5:1-20; Luka 8:26-39; Ndzumbululo 20:1-3.

▪ Ndi ngani, khamusi, hu tshi ṱhogomelwa munna muthihi a re na mimuya mivhi ngeno hu uri ndi vhavhili?

▪ Ndi mini tshine tsha sumbedza uri mimuya mivhi i a ḓivha nga ha u posiwa dindini ha tshifhinga tshi ḓaho?

▪ Ndi ngani zwi tshi vhonala uri mimuya mivhi i takalela u dzhena kha vhathu na zwipuka?

▪ Ndi ngani Yesu a tshi tendela onoyo muthu we a vha e na muya muvhi, a tshi mu laedza uri a vhudze vhaṅwe nga ha zwe A mu itela zwone?