Ndima Ya 41

Muhanedzwa Muhulwane

NGA u ṱavhanya musi o no rambiwa nḓuni ya Simoni, Yesu u thoma lwendo lwa vhuvhili lwa u funza lwa Galilea. Kha lwendo lwawe lwo fhiraho tsimuni yeneyo, o vha e na vhafunziwa vhawe vha u thoma, Petro, Andrea, Yakobo, na Yohane. Fhedzi zwino u na vhaapostola vha 12, khathihi na vhaṅwe vhafumakadzi. Havha vha katela na Maria Magdalena, Susana, na Yohana, ane munna wawe a vha nduna ya Khosi Herode.

Musi luvhilo lwa vhuḓinḓa ha Yesu lu tshi ḓi engedzea, na u hanedzwa malugana na tshumelo yawe ho ḓi engedzea-vho. Hu ḓiswa munna a re na muya muvhi ha Yesu, a re bofu ḽa tshimuma. Musi Yesu a tshi mu fhodza, u itela uri a vhofholowe kha u shumiswa nga muya muvhi na uri a kone u amba na u vhona, magogo a kanuka vhukuma. Vha thoma uri: “Naa uyu a si murwa wa Davida kani?”

Magogo a kuvhangana e manzhi u mona nnḓu yeneyo ine Yesu a vha khayo lune ene na vhafunziwa vhawe vha si kone na u ḽa. Vhukati ha vhane vha humbula uri ndi “murwa wa Davida” o fulufhedziswaho, hu na vha maṅwalo na Vhafarisei vho ḓaho vha tshi bva kule ngei Yerusalema u itela u mu hanedza. Musi mashaka a Yesu a tshi pfa uri hu na khakhathi nga nṱhani ha Yesu, vha ḓa vha tshi ri vha mu dzhie. Nga tshiitisi tshifhio?

Ee, na vharathu vha Yesu a vha athu u tenda uri ndi Murwa wa Mudzimu. Zwiṅwe hafhu, khakhathi na dziphambano vhathuni zwe a zwi ita a zwi tshimbidzani na zwiṱukuṱuku na Yesu ane vha mu ḓivha musi a tshi kha ḓi aluwa ngei Nazareta. Nga zwenezwo, vha tenda uri hu fanela u vha hu na tsho khakheaho vhukuma ngeleloni ya Yesu. Vha phetha nga uri: “Ha tsha ḓivha zwiné a ita,” nahone vha tshi ṱoḓa u mu fara vha ṱuwa nae.

Naho zwo ralo vhuṱanzi vhu khagala ha uri Yesu o fhodza muthu we a vha e na muya muvhi. Vha maṅwalo na Vhafarisei vha a zwi ḓivha uri vha nga si hanedze vhungoho ha hezwi. Nga zwenezwo u itela u hanedza Yesu vha vhudza vhathu uri: “Muthu uyu a tshi pandela mimuya mivhi u ita nga Beelsebulu, khosi ya mimuya mivhi; a si zwiṅwe.”

A tshi ḓivha zwine vha zwi humbula, Yesu u vhidza vha maṅwalo na Vhafarisei a ri: “Muvhuso u ḓi-fhandakanyaho, na nnḓu ine ya ralo, a zwi nga imi. Zwino arali Sathane a tshi pandela Sathane, hu nga vha u ḓi-fhandakanya; muvhuso wawe u ḓo ima hani?”

Ndi phindulo i ṱhavhaho lungafhani! Samusi Vhafarisei vha tshi amba uri vhathu vhavho na vhone vho pandela mimuya mivhi, Yesu u ita na u vhudzisa: “Ni tshi ri ndi pandela mimuya mivhi nga Beelsebulu, vharwa vhaṋu vha i pandela nga nnyi?” Nga maṅwe maipfi, u amba havho Yesu luvhi vha nga dovha vha hu ita na kha vhone vhaṋe samusi vha tshi ralo khae. Nga zwenezwo Yesu u a sevha: “Zwino ndi tshi pandela mimuya mivhi nga muya wa Mudzimu ndi hone muvhuso wa Mudzimu wó ḓa kha inwi.”

U itela u fanyisa uri u bvisa hawe mimuya mivhi ndi vhuṱanzi ha uri u na maanḓa u fhira Sathane, Yesu u ri: “Muthu a nga kona hani u dzhena nḓuni ya muhali, a mu dzhiela thundu yawe, á so ngo ranga a vhofha muhali uyo a kona u mu dzhiela zwa nḓuni yawe? A sa imiho na nṋe u lwa na nṋe; a sa kuvhanganyiho na nṋe u a balanganya.” Zwi tou vha khagala uri Vhafarisei vha lwisana na Yesu, vha tshi ḓisumbedza vhe vhashumeli vha Sathane. Vha khou balanganyela kule Vhaisiraele uri vha si ḓe khae.

Mafheleloni, Yesu u sevha havha vhapikisi vha tevhelaho Sathane uri ‘a vha nga hangwelwi arali vha tshi sema muyamukhethwa.’ U a ṱalutshedza: “Ane a hanedza ḽa Murwa-muthu, u ḓo hangwelwa; ane a hanedza ḽa Muya-mukhethwa, uyo ha nga hangwelwi shangoni ḽino na kha ḽi ḓaho.” Vhenevho vha maṅwalo na Vhafarisei vho ita tshivhi tshine vha sa ḓo hangwelwa tshone vha tshi amba nga swili uri mishumo i re khagala yo itwaho nga vhuṱolo nga muyamukhethwa wa Mudzimu yo itwa nga Sathane. Mateo 12:22-32; Marko 3:19-30; Yohane 7:5.

▪ Lwendo lwa vhuvhili lwa Yesu lwa Galilea lu fhambana hani na lwa u thoma?

▪ Ndi ngani mashaka a Yesu a tshi lingedza u mu fara?

▪ Vhafarisei vha lingedza hani u hanedza vhuṱolo ha Yesu, nahone Yesu u vha hanedza hani?

▪ Avho Vhafarisei vha na mulandu wa mini, nahone ndi ngani?