Ndima Ya 3

Mulugisi wa Nḓila U A Bebwa

ELISABETHA hu si kale u ḓo vha na ṅwana wawe. Kha yeneyi miṅwedzi miraru yo fhiraho, Maria o vha a tshi khou dzula nae. Fhedzi zwino ndi tshifhinga tsha uri Maria a onese na tsha u fara lwendo lulapfu lwa u humela hayani Nazareta. Hune ha ṱoḓa u vha miṅwedzi ya rathi na ene-vho u ḓo vha na ṅwana.

Musi Maria a tshi tou ṱuwa, Elisabetha u a beba. Ndi dakalo ḽingafhani musi a tshi beba zwavhuḓi nahone Elisabetha na ṅwana vha na mutakalo wavhuḓi! Musi Elisabetha a tshi sumbedza vhahura na mashaka awe lushie, vhoṱhe vha takala nae.

U ya nga Mulayo wa Mudzimu, nga ḓuvha ḽa vhumalo musi o no bebwa, ṅwana wa mutukana kha ḽa Isiraele u fanela u rubiswa. Khonani na mashaka vha ḓa u dala u itela tshenetshi tshiitea. Vha amba uri mutukana u fanela u irwa dzina ḽa khotsi awe, Sakaria. Fhedzi Elisabetha u a hanedza. U ri: “Aiwa, nga a pfi Yohane.” Humbulani, ndi dzina ḽe muruṅwa Gabriele a amba uri ṅwana u fanela u ṋewa ḽone.

Naho zwo ralo, khonani dzavho dzi a vhilaela: “Huufha hú si na muthu wa shaka ḽaṋu a re na dzina iḽo?” Nga zwenezwo, vha tshi amba nga zwanḓa, vha vhudzisa khotsi awe uri u ṱoḓa u ira mutukana dzina ḽifhio. Sakaria a tshi humbela lubaba lwa u ṅwalela, a tshi kanukisa vhoṱhe, u ṅwala uri: “Dzina ḽawe ndi Yohane!”

Zwenezwo, Sakaria a dovha a amba nga lwa vhuṱolo. Ni ḓo zwi elelwa uri ho ngo tsha kona u amba musi a songo tenda nḓivhadzo ya muruṅwa ya uri Elisabetha u ḓo vha na ṅwana. Ee, musi Sakaria a tshi amba, vhoṱhe vhane vha dzula henefho tsini vha a akhamala nahone vha amba nga tshavho vha ri: “Zwino ṅwana uyu u ḓo vha mini?”

Zwino Sakaria u ḓadzwa nga muyamukhethwa, nahone u a pembela a ri: “Nga hu rendwe Mudzimu wa Isiraele, ngauri o ḓa a ṱola vhathu vhawe, a vha ṱoḓela tsha u vha rengulula. O ri vusela luṋanga lwa u ri tshidza, lú nḓuni ya Davida, mulanda wawe.” Vhukuma, holwu ‘luṋanga lwa u tshidza,’ ndi Murena Yesu, ane a kha ḓi ḓo bebwa. Nga ṅwambo wa onoyu, Sakaria u ri, Mudzimu u ḓo “ri ita vha u mu shumela rí si na nyofho, ró bva zwanḓani zwa maswina, Rí vhakhethwa, ró luga phanḓa hawe misi yoṱhe ya vhutshilo hashu.”

Nga zwenezwo Sakaria u amba hu tshee nga phanḓa malugana na Yohane, murwa wawe u ri: “Iwe-ha, ṅwana’nga, U ḓo pfi Muporofita wa Wa-Ṱaḓulu-ṱaḓulu; U ḓo ranga Murena phanḓa wa mu lugisela nḓila dzawe. Vhathu vhawe U ḓo vha fha nḓivho ya uri vha ḓo tshidzwa nga u hangwelwa zwivhi zwavho; Nga mbilu-tshilidzi ya Mudzimu washu, yo ri dalelisaho nga mutsho u bvaho ṱaḓulu, Wa u vhonetshela vho dzulaho swiswini na murunzini wa lufu, uri u ise milenzhe yashu nḓilani ya mulalo.”

Nga tshenetshi tshifhinga Maria, ane zwa tou vha khagala uri u kha ḓi vha musidzana a sa athu u vhingwa, o swika hayani Nazareta. Ndi mini tshine tsha ḓo bvelela khae musi zwi tshi vha khagala uri o vhifha muvhilini? Luka 1:56-80; Levitiko 12:2, 3.

▪ Yohane ndi muhulwane lungafhani u fhira Yesu?

▪ Ndi zwithu zwifhio zwine zwa itea musi Yohane e na maḓuvha a malo?

▪ Mudzimu o livhisa ṱhogomelo yawe kha vhathu vhawe nga nḓila-ḓe?

▪ Ndi mushumo ufhio une Yohane a vhudzwa hu tshee nga phanḓa uri a u ite?