Ndima Ya 91

Musi Lazaro a Tshi Vuswa Vhafuni

YESU, khathihi na vhane vha khou mu fheletshedza, zwino vha a swika tshaloni tsha Lazaro. Vhukuma, ndi bako ḽo valwaho nga tombo. Yesu u ri: “Phigulusani iḽo tombo.”

Martha u a hana, a sa athu u pfesesa zwine Yesu a khou ṱoḓa u zwi ita. U ri: “Murena, u vhó nukha, ngauri ḽo no vha ḓuvha ḽa vhuṋa e tshaloni.”

Fhedzi Yesu u a vhudzisa: “Naa a tho ngo U vhudza naa nda ri: Arali U tshi tenda ndi hone U tshi ḓo vhona vhurena ha Mudzimu?”

Nga zwenezwo tombo ḽi a bviswa. Zwenezwo Yesu u a liladza maṱo awe nahone u a rabela: “Khotsi, ndi a U livhuha nge wa mpfa; Hone ndi a zwi ḓivha zwauri U ḓi dzula U tshi mpfa; huno ndi tshi ralo ndi amba uri vhathu vho imaho afha vha tende zwauri wo nthuma.” Yesu u rabela khagala uri vhathu vha ḓivhe uri zwine a khou ṱoḓa u zwi ita zwi ḓo itwa nga maanḓa a bvaho ha Mudzimu. Zwenezwo u a vhidzelela nga ipfi ḽihulu: “Lazaro, bvela nnḓa!”

Nga zwenezwo, Lazaro u a bvela nnḓa. Zwanḓa zwawe na milenzhe yawe zwi kha ḓi vha zwo pombedzwa nga miṅwenda, na tshifhaṱuwo tshawe tsho fukedzwa nga lupila. Yesu u ri: “Mu vhofhololeni ni mu litshe a tshimbile.”

Vha tshi vhona honoho vhuṱolo, Vhayuda vhanzhi vhe vha ḓa u khuthadza Maria na Martha vha tenda kha Yesu. Naho zwo ralo, vhaṅwe vha ṱuwa vha yo vhudza Vhafarisei zwe zwa bvelela. Vhone na vho-tshifhe vhahulu vha ṱavhanya vha dzudzanya muṱangano wa khothe khaṱuli ya Vhayuda, Gota.

Ḽeneḽo Gota ḽi katela na tshifhe muhulu a re hone, Kayafa, khathihi na Vhafarisei na Vhasadukei, vho-tshifhe vhahulu, na tshifhe muhulu wa kale. Vhenevha vha a lila: “Ri ḓo ita’ni? ngauri uyu muthu u ita vhuṱolo vhunzhi. Rá ḓi ralo ri tshi mu litsha, vhoṱhe vha ḓo mu tenda, Vha-Roma vha kona u ḓa vha ri dzhiela shango na vhathu.”

Naho vharangaphanḓa vha vhurereli vha tshi tenda uri Yesu “u ita vhuṱolo vhunzhi,” tshithu tshine vha tshi ṱhogomela ndi vhuimo havho na maanḓa avho vhone vhaṋe. U vuswa ha Lazaro ndi dziedzi ḽihulwane nga maanḓa kha Vhasadukei, samusi vha sa tendi kha u vuwa ha vhafu.

Kayafa, ane khamusi a vha Musadukei, zwino u a amba, a tshi ri: “Inwi a ni ḓivhi tshithu; A ni ṱalukanyi zwauri ndi khwine hu tshi fa muthu muthihi a tshi fela vhathu, hu sa ḓo lovha lushaka lwoṱhe.”

Mudzimu o ṱuṱuwedzela Kayafa u amba hezwi, ngauri muapostola Yohane o ṅwala nga murahu uri: “Iḽi fhungo [Kayafa] ha ngo ḽi amba ḽí ḽawe.” Zwe Kayafa a vha a tshi khou amba zwone zwa vhukuma ho vha hu uri Yesu o vha a tshi fanela u vhulahwa u itela u Mu thivhela uri a si bvele phanḓa na u nyadzisa vhuimo havho ha maanḓa na ṱhuṱhuwedzo. Naho zwo ralo, u ya nga Yohane, ‘Kayafa o porofita uri Yesu o vha a sa ḓo fela fhedzi lushaka, fhedzi ho vha hu uri hu kuvhanganyiwe vhana vha Mudzimu.’ Nahone, vhukuma, ndi ndivho ya Mudzimu uri Murwa wawe a fele vhoṱhe sa tshirengululi.

Kayafa zwino u kona u ṱuṱuwedza Gota u vhamba maano a u vhulaha Yesu. Fhedzi Yesu, ane zwa vhonala uri u ḓivha haya maano u bva ha Nikodemo, muraḓo wa Gota ane a vha na vhulenda khae, u a ṱuwa henefho. Yohane 11:38-54.

▪ Ndi ngani Yesu a tshi rabela khagala musi a sa athu u vusa Lazaro?

▪ Vhe vha vhona iyi mvuwo vha aravha hani?

▪ Ndi mini tshine tsha dzumbulula vhuvhi ha miraḓo ya Gota?

▪ Kayafa o vha o ḓiimisela mini, fhedzi Mudzimu o mu shumisela u porofita mini?