Ndima Ya 93

Musi Murwa-muthu A Tshi Vhonala

MUSI Yesu a tshi kha ḓi vha devhula (kha ḽa Samaria kana kha ḽa Galilea), Vhafarisei vha a mu vhudzisa nga ha u ḓa ha Muvhuso. Vha tenda uri u ḓo ḓa nga vhugala na vhuṱambo vhuhulu, fhedzi Yesu u ri: “Muvhuso wa Mudzimu a u ḓi nga zwi vhonwaho nga maṱo. Na hone a u nga ḓo pfi: Vhona, a suyu! kana: a suuḽa! ngauri vhonani, muvhuso wa Mudzimu u vhukati haṋu.”​—NW.

Maipfi a Yesu a uri “vhukati haṋu” nga zwiṅwe zwifhinga o ṱalutshedzelwa nga uri “ngomu haṋu.” Ngauralo vhaṅwe vho humbula uri Yesu o vha a tshi khou amba uri Muvhuso wa Mudzimu u vhusa mbiluni dza vhashumeli vha Mudzimu. Fhedzi, zwi tou pfala uri Muvhuso wa Mudzimu a uho mbiluni dza havha Vhafarisei vha sa tendiho vhane Yesu a khou amba navho. Naho zwo ralo, u vhukati havho, samusi Khosi yo nangiwaho ya Muvhuso wa Mudzimu, Yesu Kristo, e vhukati havho.

Zwi vhonala uri ndi musi Vhafarisei vho no ṱuwa musi Yesu a tshi bvela phanḓa u amba na vhafunziwa vhawe nga ha u ḓa ha wonoyo Muvhuso. Zwihuluhulu u khou humbula nga u vha hawe maanḓani a Muvhuso tshifhingani tshi ḓaho musi a tshi eletshedza uri: “Vha ḓo ni vhudza vha ri: Vhona fhaḽa; vhona afha! Ni songo ya; ni songo vha tevhela. Ngauri vhunga lupenyo lu tshi penya lu tshi bva ṱaḓulu lwa vhonetshela zwi re tsini ha makole, ndi zwine zwa ḓo ita Murwa-muthu nga ḓuvha ḽawe.” Nga zwenezwo, Yesu u khou sumbedza uri samusi lupenyo lu tshi vhonala fhethu huhulwane, vhuṱanzi ha u vha hawe maanḓani a Muvhuso vhu ḓo vhonala zwavhuḓi kha vhoṱhe vhane vha ṱoḓa u vhu ṱhogomela.

Zwenezwo Yesu u vhambedza na zwiitea zwa tshifhingani tsha kale u itela u sumbedza nḓila ine mavhonele a vhathu a ḓo vha ngayo vhukatini ha u vha hone hawe tshifhingani tshi ḓaho. U a ṱalutshedza: “Zwe zwa itwa misi ya Noaxe, ndi zwine zwa ḓo itwa na nga maḓuvha a Murwa-muthu . . . Ndi zwe vha ita na nga misi ya Loto; vho vha vha tshi ḽa, vha tshi nwa, vha tshi renga, vha tshi rengisa, vha tshi zwala, vha tshi fhaṱa. Huno musi Loto a tshi bva muḓini wa Sodoma, ha na mulilo na tsevhela zwi tshi bva ṱaḓulu, zwa vha fhedza vhoṱhe. Ndi zwiné vha ḓo ita na musi Murwa-muthu a tshi vhó ḓo vhonala.”

Yesu ha khou amba uri vhathu vha misini ya Noaxe na misini ya Loto vho lozwiwa ngauri vho vha vha tshi tevhela mishumo yo ḓoweleaho ya u ḽa, u nwa, u renga, u rengisa, u zwala, na u fhaṱa. Na Noaxe na Loto na vha miṱani yavho vho vha vha tshi zwi ita hezwi zwithu. Fhedzi vhaṅwe vho vha vha tshi ita yeneyo mishumo ya ḓuvha ḽiṅwe na ḽiṅwe vha sa londi lufuno lwa Mudzimu, nahone ndi ngazwo vho lozwiwa. Nga tshiitisi tshi fanaho, vhathu vha ḓo lozwiwa musi Kristo a tshi ḓo vhonala vhukatini ha vhuṱungu vhuhulu kha haya maitele a zwithu.

A tshi ombedzela vhuhulwane ha u aravha nga u ṱavhanya kha vhuṱanzi ha u vha hone hawe maanḓani a Muvhuso tshifhingani tshi ḓaho, Yesu u a engedza: “Musi uyo, a re kha ṱhánga ya nnḓu, thundu yawe í nḓuni, a songo tsa a yo i dzhia; na a re tsimuni a songo humela zwi re murahu. Elelwani musadzi wa Loto.”

Musi vhuṱanzi ha u vha hone ha Kristo vhu tshi vhonala, vhathu vha nga si tendele lufuno lwa u funa thundu i vhonalaho lu tshi vha thivhela u dzhia vhukando nga u ṱavhanya. Musi e nḓilani yawe ya u bva Sodoma, zwi vhonala uri musadzi wa Loto o sedza murahu nga u tama zwithu zwe zwa sala murahu, nahone o shanduka tshiunga tsha muṋo.

A tshi bvela phanḓa u ṱalutshedza vhuimo he ha vha vhu tshi ḓo vha hone vhukatini ha u vha hone hawe tshifhingani tshi ḓaho, Yesu u vhudza vhafunziwa vhawe: “Vhusiku uho vhavhili vha ḓo vha vhe vhulaloni vhuthihi, muṅwe wavho u ḓo ṱanganedzwa, muṅwe u ḓo laṱwa. Vhavhili vha ḓo vha vha tshi khou kuyisana; muṅwe wavho u ḓo ṱanganedzwa, muṅwe a laṱwa.”

U ṱanganedzwa zwi tshimbilelana na u dzhena ha Noaxe na vha muṱa wawe gungwani na u bviswa ha Loto na vha muṱa wawe Sodoma nga vharuṅwa. Hu amba u tshidzwa. Kha ḽiṅwe sia, u laṱiwa zwi amba u lozwiwa.

Kha yeneyi mbuno, vhafunziwa vha a vhudzisa: “Murena, ngafhi?”

Yesu u a fhindula: “Hu re na mutumbu, ndi huné maanga a kuvhangana hone.” Vhe vha “ṱanganedzwa” u itela u tshidzwa vha nga maanga a vhonelaho kule ngauri vha kuvhanganela “mutumbu.” Mutumbu u tshimbilelana na Kristo wa ngoho maanḓani awe a Muvhuso a sa vhonali na tshimimani tsha muya tshine Yehova a tshi lugiselela. Luka 17:20-37; Genesi 19:26.

▪ Muvhuso wo vha u vhukati ha Vhafarisei hani?

▪ Ndi nga nḓila ifhio ine u vha hone ha Kristo ha nga lupenyo?

▪ Ndi ngani vhathu vha tshi ḓo lozwelwa zwiito zwavho vhukatini ha u vha hone ha Kristo?

▪ Zwi amba mini u ṱanganedzwa, na u laṱwa?