Ndima Ya 61

Mutukana A Re Na Mimuya U A Fhodzwa

MUSI Yesu, Petro, Yakobo, na Yohane vhe siho, khamusi vhe bamani ḽa Thavha ya Herimoni, vhaṅwe vhafunziwa vha dzhena khakhathini. Musi a tshi vhuya, nga u ṱavhanya Yesu u vhona uri hu na tsho khakheaho. Hu na gogo ḽo kuvhanganelaho vhafunziwa vhawe, nahone vha maṅwalo vha khou hanedzana navho. Musi vha tshi vhona Yesu, vhathu vha mangala vhukuma vha gidimela khae u mu resha. U a vhudzisa: “Ndi a mini ané na khou fhindulana?”

A tshi bva vhukati ha gogo, muṅwe munna u gwadama phanḓa ha Yesu a ṱalutshedza: “Mufunzi, ndo ḓisa murwa wanga ha iwe; u na muya wa tshimuma. Muya uyo u tshi mu fara, u a mu khwiḓukanya, a bvisa bulo, a shenganya maṋo, a oma. Ndo amba na vhafunziwa vhau nda ri vha pandele muya uyo, hone vho kundwa.”

Vha maṅwalo vha vhonala vho zwi dzhiela nṱha nga maanḓa u kundwa ha vhafunziwa u fhodza onoyo mutukana, khamusi vha tshi ita na u sasaladza vhuḓidini havho. Nga tshenetshi tshifhinga tshi konḓaho, Yesu u a swika. U ri: “Yawee, lushaka lu sa tendiho! Ndi ḓo dzula na inwi u swika lini? Ndi ḓo ḓi konḓelela zwiito zwaṋu u swika lini?”

Yesu u vhonala a tshi khou amba na muṅwe na muṅwe a re hone, fhedzi a zwi timatimisi uri o livhisela kha vha maṅwalo, vhe vha vha vha tshi khou dina vhafunziwa vhawe. Lu tevhelaho, Yesu u amba nga ha mutukana: “Mu ḓiseni fhano ha nṋe.” Fhedzi musi mutukana a tshi ḓa ha Yesu, muya muvhi u re khae u mu wisela fhasi wa mu khwiḓukanya. Mutukana u vhumbuluwa mavuni a bvisa bulo nga mulomo.

Yesu u a vhudzisa: “Zwithu izwi zwo mu thoma lini?”

Khotsi u a fhindula: “Tshee a bebwa. Ndi ka-nzhi muya muvhi u tshi mu wisela muliloni, na maḓini, u tshi ṱoḓa u mu vhulaha.” Zwenezwo khotsi a humbela a ri: “Arali Ú na tshiné wa kona, ri khathutshele mbilu, U ri farise.”

Khamusi onoyo khotsi o vha a tshi khou ṱoḓa thuso nga miṅwaha minzhi. Nahone zwino, musi vhafunziwa vha Yesu vha tshi kundwa, u hanganea hawe hu vha huhulu. Musi Yesu a tshi pfa khumbelo ya onoyo munna i pfisaho vhuṱungu, a amba nga khathutshelo a ri: “U tshi amba u kona, zwithu zwoṱhe zwi konwa nga a tendaho.”

Nga u ṱavhanya khotsi a vhidzelela, fhedzi a tshi humbela a ri: “Ndi khou tenda! Farisa u sa tenda hanga!”

A tshi ṱhogomela uri gogo ḽi khou ḓa khavho, Yesu a kaidza muya muvhi a ri: “Iwe muya wa tshimuma, wa dzinga-nḓevhe; ndi nṋe ndi U vhudzaho ndi ri: ibva kha uyu muthu; U songo dovha wa vhuyelela khae’.” Musi muya muvhi u tshi bva, wa dovha wa ita uri mutukana a zhambe wa mu khwiḓukanya. Zwenezwo mutukana a lala a nga o fa, lwe vhathu vhanzhi vha thoma u ri: “O fa.” Fhedzi Yesu a fara mutukana nga tshanḓa, a vuwa.

U thomani, musi vhafunziwa vho rumiwa u ya u funza, vho pandela mimuya mivhi. Zwino, musi vha tshi dzhena muḓini, vha vhudzisa Yesu vhe thungo vha ri: “Riṋe ro kundiswa nga’ni u pandela uḽa muya?”

A tshi sumbedza uri yo vha i nga ṅwambo wa u sa vha havho na lutendo, Yesu u a fhindula: “Lushaka ulu lwa mimuya mivhi a lu konwi nga tshithu; lu bviswa nga thabelo.” Zwi tou vha khagala uri kha heḽi sia ho vha hu tshi fanela u vha na ndugiselelo u itela u pandela muya muvhi u re na maanḓa. Lutendo lwo khwaṱhaho khathihi na thabelo vha tshi humbela thuso ya Mudzimu i ṋeaho maanḓa zwo vha zwi tshi ṱoḓea.

Huno zwenezwo Yesu a engedza: “Ngauri ndi amba mafhungo-ngoho ndi tshi ri: Arali ni na lutendo lu ngaho thoro ya lunonya ni nga amba na thavha iyi na ri: Ṱuwa afha U sendele fhaḽa! ya ṱuwa, na kona zwoṱhe.” Lutendo lu nga vha na maanḓa vhukuma!

Zwikhukhulisi na vhuleme zwi thivhelaho mvelaphanḓa tshumeloni ya Yehova zwi nga vhonala zwi tshi nga thavha khulwane ya vhukuma i sa gonyei, na i sa dzinginyei. Naho zwo ralo, Yesu u khou sumbedza uri arali ri tshi ṱahulela lutendo mbiluni dzashu, ri tshi lu sheledza na u lu ṱuṱuwedza uri lu hule, lu ḓo engedzea lwa vhibva nahone lwa ri ita uri ri kone u kunda zwikhukhulisi na vhuleme zwi ngaho thavha. Marko 9:14-29; Mateo 17:19, 20; Luka 9:37-43.

▪ Ndi vhuimo vhufhio vhune Yesu a ṱangana naho musi a tshi bva Thavhani ya Herimoni?

▪ Ndi khuthadzo ifhio ine Yesu a i ṋea khotsi a mutukana a re na muya muvhi?

▪ Ndi ngani vhafunziwa vha songo kona u pandela muya muvhi?

▪ Yesu u sumbedza uri lutendo lu nga vha na maanḓa lungafhani?