Ndima Ya 53

Muvhusi a Takalelwaho Ane a Fhira Muthu

MUSI Yesu a tshi fusha lwa vhuṱolo vhathu vha zwigidi, vhathu vha a kanuka. Vha ri: “Nangoho uyu ndi ene Muporofita we a pfi u ḓo ḓa shangoni.” A vha phethi fhedzi nga uri Yesu u fanela u vha e ene muporofita muhulwane kha Mushe, fhedzi na uri o vha a tshi ḓo vha muvhusi a takalelwaho nga maanḓa. Nga zwenezwo vha dzudzanya u mu fara uri vha mu ite khosi.

Naho zwo ralo, Yesu u a zwi ḓivha zwine vhathu vha khou zwi dzudzanya. Ngauralo a ṱavhanya u ṱuwa u itela u iledza uri vha mu kokodze nga u tou mu kombetshedza. U onesa magogo nahone u khadeledza vhafunziwa vhawe uri vha dzhene gungwani ḽavho vha humele murahu Kapernaume. Zwenezwo o mbo ḓi shavhela thavhani u ya u rabela. Vhusiku honoho Yesu u henengei e eṱhe.

Tshifhinganyana ḽi sa athu u tsha Yesu u sedza o ima nṱha nahone u lavhelesa magabelo musi a tshi iswa nṱha lwanzheni nga ḓumbu ḽihulu. Tshedzani tsha ṅwedzi wo ḓalaho, samusi Paseka yo vha i tsini, Yesu u vhona gungwa na vhafunziwa vhawe vha tshi khou tambula u alavha magabeloni. Vhenevho vhanna vha khou tshimbidza gungwa nga maanḓa avho oṱhe.

Musi a tshi vhona zwenezwi, Yesu a tsa thavhani a thoma u tshimbila o livha gungwani vhukati ha magabelo. Ḽeneḽo gungwa ḽo vha ḽo no tshimbila maela dzine dza nga vha tharu kana nṋa musi Yesu a tshi swika khaḽo. Naho zwo ralo, u bvela phanḓa a nga u khou ya u fhira. Musi vhafunziwa vha tshi mu vhona, vha ṱavha mukosi vha ri: “Ndi tshirunzi.”

Yesu u a aravha lu khuthadzaho: “Ndi nṋe; ni songo ofha.”

Fhedzi Petro u ri: “Murena, arali é iwe, mbudze ndi ḓe kha iwe ndi tshi tshimbila kha maḓi.”

Yesu u a fhindula: “Iḓá!”

Nga zwenezwo, Petro, a tshi khou bva gungwani, u tshimbila nṱha ha maḓi o livha hu re na Yesu. Fhedzi musi a tshi vhona maḓumbu, Petro u a tshuwa, nahone u thoma u mbwandamela, u a vhidzelela: “Murena, ntshidze!”

Nga u ṱavhanya u ṋekedza tshanḓa tshawe, Yesu a mu fara, a tshi ri: “U timatima’ni iwe mudzia-u-tenda zwiṱuku!”

Musi Petro na Yesu vho no vhuyelela gungwani, muya wa dzika, nahone vhafunziwa vha kanuka. Fhedzi naa vho vha vho fanela u kanuka? Arali vho vha vho ṱalukanya “mushumo uḽa wa zwinnkwa” nga u takalela vhuṱolo vhuhulwane he Yesu a vhu ita awara dzi si gathi dzo fhiraho musi a tshi fusha zwigidi zwa vhathu nga zwinnkwa zwiṱanu fhedzi na khovhe mbili ṱhukhu, nga zwenezwo zwo vha zwo fanela u vhonala zwi sa kanukisi uri a nga tshimbila nṱha ha maḓi na u dzikisa muya. Naho zwo ralo, zwino, vhafunziwa vha losha Yesu vha ri: “Nangoho, U Murwa wa Mudzimu.”

Hu si kale, vha swika Genetsareta, muedzini wavhuḓi, u bveledzaho mitshelo u re tsini ha Kapernaume. Vha imisa gungwa ḽavho henefho. Fhedzi musi vha tshi swika vhugabeloni, vhathu vha vhona Yesu nahone vha ya shangoni ḽi re henefho tsini, vha ḓisa vhane vha lwala. Musi vhenevha vha tshi ḓiswa nga vhulalo havho nahone vha tshi tou kwama fhedzi lupendelo lwa nguvho ya Yesu, vha a fhola tshoṱhe.

Nga tshenetsho tshifhinga, gogo ḽe ḽa ṱanziela nga ha u fushwa ha vhathu vha zwigidi lwa vhuṱolo ḽo wana Yesu o ṱuwa. Ngauralo musi magungwa maṱuku ane a bva Tiberia a tshi swika, vha dzhena khao vha ya Kapernaume vha tshi ṱoḓa Yesu. Musi vha tshi mu wana, vha mu vhudzisa vha ri: “Mufunzi, wo bva nga ngafhi?” Yesu a vha kaidza, samusi ri tshi ḓo zwi vhona hu si kale. Yohane 6:14-25; Mateo 14:22-36; Marko 6:45-56.

▪ Musi Yesu o no fusha vhathu vha zwigidi lwa vhuṱolo, vhathu vho ṱoḓa u mu ita mini?

▪ Ndi mini tshe Yesu a tshi vhona musi e thavhani ye a vha o shavhela khayo, nahone o ita mini nga tshenetsho tshifhinga?

▪ Ndi ngani vhafunziwa vho vha vha songo fanela u kanuka nga maanḓa nga zwenezwi zwithu?

▪ Ho bvelela mini musi vho no swika vhugabeloni?