Ndima Ya 38

Naa Yohane O Vha E Si Na Lutendo?

YOHANE Mulovhedzi, ane zwino a vho ṱoḓa u vha na ṅwaha e khothoni, u ṱanganedza muvhigo nga ha u vuswa ha murwa wa tshilikadzi ya Naini. Fhedzi Yohane u ṱoḓa u pfa zwi tshi bva mulomoni wa Yesu malugana na zwine hezwi zwa amba zwone, nga zwenezwo u ruma vhafunziwa vhawe vhavhili uri vha vhudzise: “Naa ndi iwe we a pfi u ḓo ḓa naa? Kana ri tsha ḓi lindela muṅwe?”

Heyo i nga pfala i mbudziso i songo ḓoweleaho, zwihuluhulu samusi Yohane o vhona muya wa Mudzimu u tshi kavha kha Yesu nahone a pfa ipfi ḽa Mudzimu ḽa u mu ṱanganedza musi a tshi lovhedza Yesu hu ṱoḓaho u vha miṅwaha mivhili yo fhiraho. Mbudziso ya Yohane i nga ita uri vhaṅwe vha phethe nga uri lutendo lwawe lwo vha lu songo tsha khwaṱha. Fhedzi hezwi a zwo ngo ralo. Yesu o vha a sa nga ḓo amba zwavhuḓi nga u rali nga ha Yohane, samusi a tshi khou ita nga u ralo nga hetshi tshifhinga, arali Yohane o vha o no thoma u timatima. Ndi ngani-ha Yohane a tshi vhudzisa iyi mbudziso?

Yohane a nga kha ḓi vha a tshi khou ṱoḓa fhedzi u khwaṱhiselwa nga Yesu uri ndi Ene Messia. Hezwi zwo vha zwi tshi ḓo khwaṱhisa Yohane samusi o vha e vhuṱunguni khothoni. Fhedzi hu vhonala hu na zwinzhi kha mbudziso ye Yohane a i vhudzisa. Nga hu re khagala u ṱoḓa u ḓivha arali hu na muṅwe ane a khou ḓa, ane a ḓo mu tevhela, ane a ḓo phetha u ḓadzea ha zwithu zwoṱhe zwe zwa dzula zwo ambiwa uri zwi ḓo ḓadziswa nga Messia.

U ya nga vhuporofita ha Bivhili he Yohane a ḓowelana naho, Muḓodzwa wa Mudzimu u ḓo vha khosi, murengululi. Naho zwo ralo, Yohane u tshee tshivhotshwa, na nga murahu ha miṅwedzi minzhi musi Yesu o no lovhedzwa. Ngauralo nga hu re khagala Yohane u khou vhudzisa Yesu uri: ‘Naa zwa vhukuma ndi iwe ane a ḓo tika Muvhuso wa Mudzimu nga maanḓa a vhonalaho, kana naa hu na muṅwe nga nnḓa ha iwe, ane a ḓo u tevhela, ane ra fanela u mu lindela uri a ḓadzise vhuporofita vhu mangadzaho vhu tshimbidzanaho na vhugala ha Messia?’

Nṱhani ha uri a vhudze vhafunziwa vha Yohane uri, ‘Vhukuma ndi nṋe ane a ḓo ḓa!’ nga tshenetsho tshifhinga Yesu o ita zwi swayeaho nga u fhodza vhathu vhanzhi, a tshi vha fhodza malwadze na maṱungu avho oṱhe o fhamba-fhambanaho. Zwenezwo a vhudza vhafunziwa a ri: “Tshimbilani ni yo vhudza Yohane zwiné na zwi vhona na zwiné na zwi pfa, ni ri: mabofu a vhó vhona, zwihole zwi vhó tshimbila, vha mapele vha a fhola, ma-dzinga-nḓevhe a vhó pfa, vhafu vha a vuwa, zwisiwana zwi khou hanelwa mafhungo-maḓifha.”

Nga maṅwe maipfi, mbudziso ya Yohane i nga kha ḓi vha i tshi khou amba u lavhelela uri Yesu u ḓo ita zwo engedzeaho u fhirisa zwine a khou zwi ita nahone khamusi u ḓo vhofholola na Yohane nga dzawe. Naho zwo ralo, Yesu u khou vhudza Yohane uri a si lavhelele vhuṱolo vhu fhiraho vhune Yesu a khou vhu ita.

Musi vhafunziwa vha Yohane vha tshi ṱuwa, Yesu u amba na magogo nahone a a vhudza uri Yohane ndi “muḓinḓa” wa Yehova o dzulaho o ambiwa kha Maleaxi 3:1 nahone ndi muporofita we Elia a dzula o amba nga hae kha Maleaxi 3:23, 24. Nga zwenezwo u khoḓa Yohane uri u fhira vhaporofita vhoṱhe vhe vha vhuya vha vha hone nga phanḓa hawe, a tshi ṱalutshedza: “Ngoho, ndi a ni vhudza ndi ri: Kha vho bebiwaho nga vhasadzi a hu athu u bvelela a fhiraho Yohane Mulóvhedzi. Hone, a re ene muṱuku muvhusoni wa ṱaḓulu, u a mu fhira. Zwo ranga misi iḽa ya Yohane Mulóvhedzi, na zwino zwi pfalwi, zwauri muvhuso wa ṱaḓulu u dzhenwa nga vhuhali.”

Hafha Yesu u khou sumbedza uri Yohane ha nga ḓo vha Muvhusoni wa ṱaḓulu, samusi muṱuku henengei e muhulwane kha Yohane. Yohane o lugisela Yesu nḓila, fhedzi u fa musi Kristo a sa athu u vhofha mulanga, kana thendelano, na vhafunziwa vhawe, uri vha vhe vhavhusi nae Muvhusoni wawe. Ndi ngazwo Yesu a tshi ri Yohane ha nga ḓo vha Muvhusoni wa ṱaḓulu. Nṱhani hazwo, Yohane u ḓo vha mulanda wa Muvhuso wa Mudzimu kha ḽino ḽifhasi. Luka 7:18-30; Mateo 11:2-15.

▪ Ndi ngani Yohane a tshi vhudzisa arali Yesu e Ene Ane a Ḓo Ḓa kana hu tshi fanela u lavhelelwa muṅwe?

▪ Ndi vhuporofita vhufhio vhune Yesu a vhu amba he ha ḓadziswa nga Yohane?

▪ Ndi ngani Yohane Mulovhedzi a sa nga ḓo vha ṱaḓulu na Yesu?