Ndima Ya 32

Ndi Mini Tsho Fanelaho nga Sabatha?

NDI nga iṅwe Sabatha musi Yesu a tshi dalela tshikolo tshi re tsini na Lwanzhe lwa Galilea. Hu na munna o omaho tshanḓa tsha u ḽa. Vha maṅwalo na Vhafarisei vha khou sedza nga vhuronwane u itela u vhona arali Yesu a tshi ḓo mu fhodza. Mafheleloni vha a vhudzisa: “Naa u fhodza muthu nga Sabatha zwo fanela naa?”

Vharangaphanḓa vha vhurereli vha Vhayuda vha tenda uri u fhodza ho tendelwa nga Sabatha fhedzi arali vhutshilo vhu khomboni. Sa tsumbo, vha funza uri a zwo ngo tendelwa u tsidzulula shambo kana u ḽi vhofha nga Sabatha. Ngauralo vha maṅwalo na Vhafarisei vha khou vhudzisa Yesu vha tshi ṱoḓa u wana tsha u mu vhea mulandu.

Naho zwo ralo, Yesu u ḓivha mihumbulo yavho. Nahone nga tshenetsho tshifhinga u ṱhogomela uri vho dzhia mavhonele o kalulaho, a si a maṅwalo u itela u thoma u tshinya ṱhoḓea ya ḓuvha ḽa Sabatha ya u thivhela u shuma. Nga zwenezwo, Yesu u thoma khanedzano khulwane nga u vhudza onoyo munna o omaho tshanḓa u ri: “Takuwa U ime afha vhukati!”

Zwino, a tshi rembulutshela kha vha maṅwalo na Vhafarisei, Yesu u ri: “Ndi nnyi kha inwi, a re na nngu yawe nthihi, ya ri u wela mulindini nga Sabatha a si i fare a i bvisa?” Samusi nngu i tshi imela thengo khulu, vho vha vha sa nga i litshi mulindini u swikela nga ḓuvha ḽi tevhelaho, khamusi u itela uri i lwale kana uri i fhelelwe nga ndeme. Zwiṅwe hafhu, Maṅwalo a ri: “Muvhuya u ḓivha vhutshilo ha tshifuwo tshawe.”

Musi a tshi vhambedza, Yesu u a bvela phanḓa: “Naa muthu ha fhiri nngu zwihulu-hulu? Ndi zwiné nda ri: U tonda nga Sabatha zwo fanela.” Vharangaphanḓa vha vhurereli vha kundwa u hanedza wonoyo muhumbulo u pfalaho, wa u pfela vhuṱungu, nahone vha sokou fhumula.

O halifha, na u ṱungufhadzwa nga vhutsilu havho ha u ḓiomisa dziṱhoho, Yesu u a livha-livha. Nga zwenezwo a vhudza onoyo munna a ri: “Onyolosa tshanḓa tshau!” A tshi onyolosa nahone tsha fhola.

Nṱhani ha u takalela uri tshanḓa tsha onoyo munna tsho fhola, Vhafarisei vha bva nahone nga u ṱavhanya vha langana na tshigwada tsha vhatevheli vha Herode u vhulaha Yesu. Hetshi tshigwada tsha politiki zwi vhonala uri tshi katela na miraḓo ya Vhasadukei vha vhurereli. Kanzhi, hetshi tshigwada tsha politiki na Vhafarisei vha a pikisana, fhedzi ndi vhathihi nga ho khwaṱhaho kha u pikisa Yesu. Mateo 12:9-14; Marko 3:1-6; Luka 6:6-11; Mirero 12:10; Ekisodo 20:8-10.

▪ Ndi mini tshe tsha thoma khanedzano khulwane vhukati ha Yesu na vharangaphanḓa vha vhurereli vha Vhayuda?

▪ Ndi mini tshine vhenevha vharangaphanḓa vha vhurereli vha Vhayuda vha tshi tenda malugana na u fhodza nga Sabatha?

▪ Ndi tshifanyiso tshifhio tshine Yesu a tshi shumisa u itela u hanedza mavhonele avho o khakheaho?