Ndima Ya 56

Ndi Mini Zwi Shataho Muthu Tshika?

U PIKISWA ha Yesu hu a ṋaṋa. A ho ngo ṱuwa fhedzi vhunzhi ha vhafunziwa vhawe, fhedzi Vhayuda vha ḽa Yudea vha khou ṱoḓa u mu vhulaha, u fana na zwe vha ita musi e Yerusalema vhukatini ha Paseka ya ḽa 31 C.E.

Zwino ndi Paseka ya ḽa 32 C.E. Zwi vhonala uri nga u tendelana na ṱhoḓea ya Mudzimu ya u vha hone henefho, Yesu u ya Pasekani ngei Yerusalema. Naho zwo ralo, u zwi ita nga vhuṱali ngauri vhutshilo hawe vhu khomboni. Nga murahu u vhuyelela Galilea.

Khamusi Yesu u Kapernaume musi Vhafarisei na vhamaṅwalo vha bvaho Yerusalema vha tshi ḓa khae. Vha khou ṱoḓa mitheo ya u mu pomoka u vunḓa mulayo wa vhurereli. Vha mu vhudzisa: “Vhafunziwa vhau ndi mini vha tshi ṱutshela mikhuvha ya vha kale; a vha ṱambi zwanḓa vha tshi ḽa vhuswa.” Hetshi a si tshithu tshi ṱoḓiwaho nga Mudzimu, naho zwo ralo Vhafarisei vha zwi dzhia sa samba ḽihulwane u sa ita hoyu mukhuvha wa sialala, une wa katela na u ṱamba u swika nga lukuḓavhavha.

Nṱhani ha u vha fhindula malugana na zwe vha mu pomoka, Yesu u sumba kha u vunḓa havho Mulayo wa Mudzimu huvhi nahone nga khole. U ṱoḓa u ḓivha uri: “Inwi ndi mini ni tshi ṱutshela mulayo wa Mudzimu na hudza mikhuvha yaṋu? Ngauri Mudzimu o ri: Hulisa khotsi-au na mme-au! na uri: A semaho khotsi na mme u ḓo fa lufu! Inwi na ḓa na ri: U ita zwone ané a amba na khotsi na mme a ri: Ndo ṋekedza Mudzimu zwe na vha no fanela u zwi wana kha nṋe! ngeno hú si u hulisa khotsi-awe na mme-awe na ka-thihi.”

Vhukuma, Vhafarisei vha funza uri tshelede, thundu, kana naho tshi tshini tshi ṋekedzwaho Mudzimu sa tshifhiwa ndi tsha thembeleni nahone tshi nga si shumiselwe miṅwe mishumo. Naho zwo ralo, zwi re zwone ndi uri tshifhiwa tsho ṋekedzwaho tshi vhulungwa nga we a tshi ṋekedza. Nga heyi nḓila murwa, nga u tou amba uri tshelede kana thundu yawe ndi “tshidzimu”​—tshifhiwa tsho ṋekedzwaho Mudzimu kana thembeleni​—u shavha vhuḓifhinduleli hawe ha u thusa vhabebi vhawe vho no vhaho vhalala, vhane vha nga vha vha tshi khou shaya vhukuma.

O sinyuswa vhukuma nge Vhafarisei vha shanda luvhi Mulayo wa Mudzimu, Yesu u ri: “No laṱa mulayo wa Mudzimu, na hudza mikhuvha yaṋu. Vhadzia-muhoyo ḓinwi! Yesaya o porofita zwavhuḓi a tshi ni amba a ri: Vhathu avha vha nkhulisa nga milomo, ngeno dzimbilu dzavho dzí kule na nṋe. A huna tshiné vha ntshumela; vha tshi funza, dzipfunzo ndi zwidayo zwa vhathu.”

Khamusi gogo ḽo sendela murahu u itela uri Vhafarisei vha vhudzise Yesu. Zwino, musi Vhafarisei vha tshi kundwa u fhindula Yesu a tshi vha sasaladza lu vhavhaho, u vhidzela gogo tsini. U ri: “Ipfani nṋe, ni ṱalukanye. Muthu ha shatiwi tshikha nga tshi dzhenaho khae’ tshi tshi bva nnḓa. Dzitshikha muthu u shatiwa nga zwi bvelaho nnḓa zwi tshi bva kha ene.”

Nga murahu, musi vha tshi dzhena nḓuni, vhafunziwa vhawe vha a vhudzisa: “Naa U a zwi ḓivha naa zwauri Vhafarisei fhungo iḽo ḽo vha ṱhavha?”

Yesu u a fhindula: “Miri yoṱhe i songo ṱavhiwaho nga khotsi-anga wa ṱaḓulu i ḓo tupulwa. Vha litsheni! Ndi mabofu a tshimbidzaho mabofu. Huno bofu ḽi tshi tshimbidza bofu vha ḓo wela mulindini vhoṱhe vhuvhili havho.”

Yesu u vhonala o mangala musi Petro a tshi vhudzisela vhafunziwa u ṱalutshedzwa malugana na zwine zwa shata muthu dzitshika. Yesu u a aravha: “Khezwi na inwi ní sa ṱalukanyi tshithu! Naa a ni athu u ṱalukanya zwauri, zwi dzhenaho nga mulomoni zwi ya thumbuni, zwa kona u ḓo laṱwa nga nḓila yazwo? Hone, zwi bvaho nga mulomoni zwi bva mbiluni; ndi zwiné zwa shata muthu dzitshika. Mbiluni ndi hone hu bvaho mihumbulo mivhi: hu’ vhuvhulahi, hu’ u ṱalana, hu’ vhupombwe, hu’ vhuvhava, hu’ vhuṱanzi ha u zwifha na maṱamba. Ndi zwone zwi shataho muthu dzitshikha. U ḽa nga zwanḓa zwi songo ṋangedzwaho maḓi, a zwi shati muthu dzitshikha.”

Yesu hafha ha khou sola mutakalo wo ḓoweleaho. Ha khou hanedza uri muthu u fanela u sa ṱamba zwanḓa zwawe musi a sa athu u lugiselela kana a sa athu u ḽa zwiḽiwa. Nṱhani hazwo, Yesu u khou sasaladza muhoyo wa vharangaphanḓa vha vhurereli vhane vha lingedza nga vhukwila u iledza milayo ya Mudzimu ya u luga nga u farelela kha masialala a si a maṅwalo. Ee, ndi mishumo mivhi ine ya shata muthu dzitshika, nahone Yesu u sumbedza uri i bva mbiluni ya muthu. Yohane 7:1; Doiteronomio 16:16; Mateo 15:1-20; Marko 7:1-23; Ekisodo 20:12; 21:17; Yesaya 29:13.

▪ Ndi u pikiswa hufhio hune Yesu a sedzana naho zwino?

▪ Ndi u pomoka mulandu hufhio hune Vhafarisei vha hu ita, fhedzi u ya nga Yesu, Vhafarisei vha vunḓa hani Mulayo wa Mudzimu nga khole?

▪ Ndi mini zwine Yesu a zwi dzumbulula sa zwithu zwine zwa shata muthu dzitshika?