Ndima Ya 50

Ndugiselelo ya U Sedzana na U Tovholwa

MUSI o no laedza vhaapostola vhawe nga ha nḓila ine vha fanela u ita mushumo wavho wa u funza ngayo, Yesu u a vha sevha nga ha vhapikisi. U ri: “Vhonani, ndi nṋe ndi ni rumaho sa nngu dzi yaho vhukati ha dziphele . . . Thanyelani vhathu; vha ḓo ni haṱula dzikhoroni; vha ḓo ni rwa zwikoloni zwavho; vha ḓo ni isa phanḓa ha vhakoma na mahosi hú u vhenga nṋe.”

Hu sa londwi u tovholwa hu vhavhaho he vhatevheli vhawe vha vha vha tshi ḓo sedzana naho, Yesu u vha fulufhedzisa nga u vha khwaṱhisela uri: “Arali vha tshi ni hwelela, ni songo elekanya na ri: ri ḓo amba hani, ri ḓo ri mini; ngauri nga tshikhathi tshazwo ni ḓo ṋekedzwa zwiné na ḓo bula. A si inwi ni ambaho, ndi muya wa khotsi-aṋu u ambaho ú kha inwi.”

Yesu u bvela phanḓa: “Mukomana u ḓo hwelela murathu a mu vhulahisa; khotsi u ḓo hwelela ṅwana; vhana vha ḓo vutshela vhabebi vhavho vha vha vhulahisa.” U a engedza: “Ni ḓo vha vhavhengiwa kha vhoṱhe hú u vhenga dzina ḽanga. Huno ane a ḓo konḓelela a swika vhufheloni ndi ene ane a ḓo tshidzwa.”

U funza ndi ha ndeme vhukuma. Nga tshenetshi tshiitisi Yesu u ombedzela uri vha shumise vhuṱali u itela uri vha vhofholowe u bvela phanḓa na wonoyu mushumo. U ri: “Musi vha tshi ḓo ni tovhola kha muṅwe muḓi shavhelani kha muṅwe. Ngoho, ndi a ni vhudza ndi ri: Murwa muthu u ḓo ḓa ní sathu u ṱanganya miḓi ya Isiraele.”

Ndi ngoho uri Yesu o ṋea vhaapostola vhawe vha 12 hedzi ndaela, tsevho, na ṱhuṱhuwedzo, fhedzi dzo vha dzo itelwa na vhe vha vha vha tshi ḓo ṱanganela kha u funza shango ḽoṱhe nga murahu ha u fa na u vuswa hawe vhafuni. Hezwi zwi sumbedzwa nga u amba hawe uri vhafunziwa vhawe vho vha vha ‘tshi ḓo vha vhavhengiwa nga vhathu vhoṱhe,’ hu si nga Vhaisiraele fhedzi vhe vhaapostola vha vha vho rumiwa uri vha ye u vha funza. Zwiṅwe hafhu, zwi tou vha khagala uri vhaapostola a vho ngo iswa phanḓa ha vhavhusi na mahosi musi Yesu a tshi vha ruma u ita mushumo wa u funza nga ḽeneḽo fulo ḽipfufhi. Zwiṅwe hafhu, nga tshenetsho tshifhinga vhatendi vho vha vha sa vhulahwi nga miraḓo ya miṱa yavho.

Ngauralo musi a tshi amba uri vhafunziwa vhawe vho vha vha sa nga ḓo ṱanganya tsimu yavho ya u funza u vhuya u swika ‘Murwa-muthu a tshi ḓa,’ nga lwa vhuporofita Yesu o vha a tshi khou ri vhudza uri vhafunziwa vhawe vho vha vha sa nga ḓo ṱanganya ḽifhasi ḽoṱhe ḽi dzulwaho nga vhathu nga u funza nga ha Muvhuso wa Mudzimu wo tikiwaho musi Khosi Yesu Kristo o ṋewaho vhugala a sa athu u vhuya sa muhaṱuli muhulwane wa Yehova nga Haramagedo.

A tshi bvela phanḓa na ndaela dzawe dza u funza, Yesu u ri: “Mufunziwa ha fhiri mufunzi wawe, mulanda ha fhiri muṋe wawe.” Ngauralo vhatevheli vha Yesu vha fanela u lavhelela u farwa luvhi na u tovholwa samusi zwo vha zwo ralo kha ene nga u funza Muvhuso wa Mudzimu. Naho zwo ralo u a khuthadza: “Ni songo ofha avho vhane vha vhulaha muvhili, vhá sa koni u vhulaha muya wa muthu. Khwine ndi u ofha uyo a konaho u lovhisa muya wa muthu na muvhili Muliloni.”

Yesu o vha a tshi ḓo vhea tsumbo kha heḽi sia. O vha a tshi ḓo konḓelela lufu a sa ofhi nṱhani ha u landula u fulufhedzea hawe kha Ane a vha na maanḓa oṱhe, Yehova Mudzimu. Ee, ndi Yehova ane a nga fhelisa “muya” (kha heḽi sia zwi tshi amba vhumatshelo ha muthu sa muya u tshilaho) kana nṱhani hazwo a nga vusa muthu vhafuni uri a ḓiphine nga vhutshilo vhu sa fheli. Yehova ndi Khotsi wa ṱaḓulu a pfelaho vhuṱungu na wa lufuno vhukuma!

Lu tevhelaho Yesu u ṱuṱuwedza vhafunziwa vhawe nga tshifanyiso tshine tsha ombedzela ṱhogomelo ya lufuno ine Yehova a vha ṋea yone. U a vhudzisa: “Naa ṱhongola mbili a dzi rengwi nga peni nthihi naa? Na nthihi yadzo i nga si wele fhasi arali khotsi-aṋu á sa zwi funi. Inwi zwino, huufha na mavhudzi a ṱhohoni dzaṋu ó vhalwa oṱhe! Ndi zwiné nda ri: Ni songo ofha; inwi ni fhira ṱhongola nzhi.”

Mulaedza wa Muvhuso une Yesu a ruma vhafunziwa vhawe uri vha u ḓivhadze u ḓo fhandekanya miṱa, musi miṅwe miraḓo ya muṱa i tshi u ṱanganedza miṅwe i tshi u sanda. U a ṱalutshedza: “Ni songo ri ndo ḓa u zwala mulalo shangoni. A tho ngo ḓa u zwala mulalo, ndo ḓisa pfumo.” Nga zwenezwo, u itela uri muraḓo wa muṱa u ṱanganedze mafhungo-ngoho a Bivhili zwi ṱoḓa tshivhindi. Yesu u a ṱhogomela: “Ané a tshi funa khotsi-awe na mme-awe a fhirisa u funa nṋe, uyo ha ngo fanelwa nga u vha wanga. Ané a tshi funa murwa wawe na ṅwananyana wawe a fhirisa u funa nṋe, uyo ha ngo fanelwa nga u vha wanga.”

A tshi fhedzisela ndaela dzawe, Yesu u ṱalutshedza uri vhane vha ṱanganedza vhafunziwa vhawe vha khou ṱanganedza na ene. “Na ane a ḓo kela muthihi wa avha vhaṱuku maḓi​—naho i khavho nthihi fhedzi​—nge a vha na dzina ḽa mufunziwa, ngoho ndi a ni vhudza: uyo na ka-thihi ha nga dzimiwi malambá awe.” Mateo 10:16-42.

▪ Ndi tsevho dzifhio dzine Yesu a dzi ṋea vhafunziwa vhawe?

▪ Ndi ṱhuṱhuwedzo ifhio na khuthadzo zwine a vha ṋea zwone?

▪ Ndi ngani ndaela dza Yesu dzi tshi shuma na kha Vhakriste vha musalauno?

▪ Ndi nga nḓila ifhio ine mufunziwa wa Yesu a si vhe muhulwane kha mufunzi wawe?