Ndima Ya 101

Ngei Bethania, Nḓuni ya Simoni

MUSI Yesu a tshi ṱuwa Yeriko, u ya Bethania. Lwendo lu dzhia ḓuvha ḽoṱhe, samusi i u gonya hu ṱoḓaho u vha ha khilomithara dza 19 fhethu hu konḓaho. Yeriko hu ṱoḓa u vha mithara dza 250 nga fhasi ha ndinganyo ya lwanzhe, nahone Bethania ndi mithara dzi ṱoḓaho u vha 760 nga nṱha ha ndinganyo ya lwanzhe. Ni nga kha ḓi elelwa uri Bethania ndi hayani ha Lazaro na khaladzi dzawe. Wonoyo muḓana u ṱoḓa u vha khilomithara tharu u bva Yerusalema, u fhethu ho dzengamaho hu re vhubvaḓuvha ha Thavha ya Miṱwari.

Vhanzhi vho no swika Yerusalema u itela Paseka. Vho ḓa nga u ṱavhanya u itela u ḓikunakisa lwa mulayo. Khamusi vho kwama tshitumbu kana tshiṅwe tshithu tshine tsha vha ita uri vha si kune. Ngauralo vha tevhela maitele a u ḓikunakisa u itela uri vha ite vhuṱambo ha Paseka nga nḓila i ṱanganedzwaho. Musi havha vho swikaho nga u ṱavhanya vha tshi kuvhangana thembeleni, vhanzhi vha a sedza arali Yesu a tshi ḓo ḓa Pasekani.

Yerusalema ndi tshisimani tshihulwane tsha u hanedzwa ha Yesu. Zwi a ḓivhea uri vharangaphanḓa vha vhurereli vha ṱoḓa u mu fara uri vha mu vhulahe. Zwi re zwone ndi uri vho laedza uri ane a mu vhona uri u ngafhi, u fanela u vhiga kha vhone. Luraru miṅwedzini ya zwenezwino​—Vhuṱamboni ha Mishasha, Vhuṱamboni ha U Ḓiṋekedza, na musi o no vusa Lazaro​—havha vharangaphanḓa vho lingedza u mu vhulaha. Ngauralo, vhathu vha a ḓivhudzisa, naa Yesu u ḓo vhuya a ḓa vhukati ha vhathu nga tshiṅwe tshifhinga? Vha a vhudzisana: “Naa ni ri ndi mini?”

Nga tshenetsho tshifhinga, Yesu u swika Bethania maḓuvha a rathi nga phanḓa ha Paseka, ine ya ḓo vha nga ḽa 14 Nisan u ya nga khalenda ya Tshiyuda. Yesu u swika Bethania henefha nga Ḽavhuṱanu nga madekwana, hune ha vha mathomoni a ḽa 8 Nisan. O vha a sa nga ḓo fara lwonolwo lwendo lu yaho Bethania nga Mugivhela ngauri u dala nga Sabatha​—u bva musi ḓuvha ḽi tshi kovhela nga Ḽavhuṱanu u swikela musi ḽi tshi kovhela nga Mugivhela​—a zwo ngo tendelwa nga mulayo wa Tshiyuda. Zwi vhonala uri Yesu u ya hayani ha Lazaro, samusi o zwi ita na u thomani, nahone a ṱwa vhusiku hoṱhe ha Ḽavhuṱanu henefho.

Naho zwo ralo, muṅwe mudzulapo wa Bethania u ramba Yesu na khonani dzawe tshilaleloni nga Mugivhela. Onoyo munna ndi Simoni, we a vha e na mapele, we khamusi a fhodzwa nga Yesu zwenezwino. A tshi ḓi vhulunga mukhwa wawe wa mafulufulu, Martha u khou shumela vhaeni. Fhedzi Maria nga ho khetheaho, u khou ṱhogomela Yesu, zwino a tshi mu ṱhogomela nga nḓila ine ya vusa khakhathi.

Maria u vula mudzionyana, une wa vha na khilogiramu dza 0,5 dza mapfura a nukhelelaho, “mushonga wa munukho wavhuḓi.” Haya ndi mapfura a ndeme vhukuma. I ngoho, tshelede yao i lingana na muholo wa ṅwaha woṱhe! Musi Maria a tshi shela mapfura ṱhohoni ya Yesu na milenzheni yawe nahone a tshi fhuluṱa milenzhe yawe nga mavhudzi awe, munukho u ḓifhaho u ḓadza nnḓu yoṱhe.

Vhafunziwa vha a sinyuwa nahone vha vhudzisa: “Ndi u sokou laṱa mali; zwi itelwa’ni?” Zwenezwo Yudasi Iskariote u ri: “Mushonga uyo ndi mini ú so ngo rengiswa nga masheleni a maḓana mararu, a ṋewa vhatshinyali?” Fhedzi Yudasi ha khou vhilaelela vhatshinyali zwa vhukuma, ngauri o vha a tshi khou ḓi tswa tshelede ye ya vha i mbulungeloni ye ya vhewa nga vhafunziwa.

Yesu u ambelela Maria. U a laedza: “Mu litsheni; ni mu dinela’ni? zwe a ṋyita ndi mushumo wavhuḓi. Vhatshinyali ni navho’ misi yoṱhe. Ni tshi funa ni nga kona u vha tonda. Nṋe hone, a ni nga vhi na nṋe misi yoṱhe. O ita zwe a kona; o no ṋyita zwo fanelaho u ḓo itwa muvhili wanga musi u tshi swiṱwa. Ngoho ndi a ni vhudza, hune ha ḓo ḓivhadzwa mafhungo-maḓifha mashangoni oṱhe, hu ḓo ḓi ambiwa na izwi zwe a ita, ha vha u mu elelwa.”

Zwino Yesu u Bethania u fhira awara dza 24, nahone fhungo ḽa uri u hone ḽo no phaḓalala. Nga zwenezwo, vhanzhi vha ḓa nḓuni ya Simoni u vhona Yesu, fhedzi vho ḓa na u vhona Lazaro, ane a vha henefho-vho. Ngauralo vhotshifhe vhahulwane vha vhamba maano a u vhulaha hu si Yesu fhedzi, fhedzi na Lazaro. Hezwi ndi nga ṅwambo wa uri vhathu vhanzhi vha khou tenda kha Yesu nga ṅwambo wa u vhona we a mu vusa vhafuni a tshi khou tshila! I ngoho, avha vharangaphanḓa vha vhurereli ndi vhavhi lungafhani! Yohane 11:55–12:11; Mateo 26:6-13; Marko 14:3-9; Mishumo 1:12.

▪ Hu khou haseledzwa nga ha mini thembeleni ngei Yerusalema, nahone ndi ngani?

▪ Ndi ngani Yesu a tshi nga vha o swika Bethania nga Ḽavhuṱanu nṱhani ha Mugivhela?

▪ Musi Yesu a tshi swika Bethania, zwi vhonala uri u fhedza Sabatha e ngafhi?

▪ Ndi mini zwe Maria a ita zwi vusaho khakhathi, nahone Yesu u mu ambelela hani?

▪ Ndi mini zwine zwa sumbedza vhuvhi vhuhulwane ha vhotshifhe vhahulwane?