Ndima Ya 126

“Ngoho, Muthu Uyu O Vha E Murwa wa Mudzimu!”

YESU o vha a sa athu u tou vha kha danda tshifhinga tshilapfu musi, nga masiari tshivhangalala, lwa vhuṱolo hu tshi vha na swiswi ḽa awara tharu. Mutshakavhili a si wone wo itaho hezwi, samusi u tshi vha hone fhedzi nga tshifhinga tsha musi ṅwedzi wo dzula nahone musi ṅwedzi wo ḓala nga tshifhinga tsha Paseka. Zwiṅwe hafhu, mutshakavhili u fhedza mimunithi i si gathi. Ngauralo heḽi swiswi ḽi bva ha Mudzimu! Khamusi ḽi kaṱudza vhane vha khou sea Yesu, na u kaṱudza zwigoḓo zwavho. 

Arali tshenetshi tshiitea tshi ofhisaho tshi itee musi muṅwe wa vhaitazwivhi a sa athu u sola khonani yawe na u humbela uri Yesu a mu humbule, tshi nga vha tshi tshiitisi tsha u rembuluwa hawe. Khamusi ndi vhukatini ha ḽeneḽi swiswi hune vhafumakadzi vhaṋa, vhane vha vha, mme a Yesu na mukomana wawe Salome, Maria Magdalena, na Maria mme a muapostola Yakobo Muṱuku, vha sendela tsini ha danda ḽa tshengedzo. Yohane, muapostola mufunwa wa Yesu, u navho henefho.

Mbilu ya mme a Yesu i “rumbulwa” lungafhani musi a tshi vhona ṅwana wawe we a mu lela na u mu alusa o nembelela lwa vhuṱungu! Naho zwo ralo Yesu u a humbula, hu si nga ha vhuṱungu hawe, fhedzi nga ha mutakalo wa mme awe. Nga nungo dzoṱhe, u kotamela thungo ya Yohane nahone u ri kha mme awe: “Musadzi, murwa wau ngoyo!” Nga zwenezwo, a tshi kotamela thungo ya Maria, u ri kha Yohane: “Vhona, mme-au asuyo!”

Nga zwenezwo Yesu u ṋea muapostola wawe ane a mu funesa mushumo wa uri a ṱhogomele mme awe, ane zwa vhonala uri zwino ndi tshilikadzi. U ita hezwi ngauri vhaṅwe vhana vha Maria a vha athu u sumbedza lutendo khae. Nga zwenezwo u vhea tsumbo yavhuḓi ya u lugiselela hu si ṱhoḓea dza mme awe dza lwa ṋama fhedzi, fhedzi na dza vhumuya hawe.

Hune ha nga vha nga awara ya vhuraru nga masiari, Yesu u ri: “Ndi na ḓora.” Yesu u ṱhogomela uri Khotsi awe zwi nga ho ngo tsha mu tsireledza u itela uri u fulufhedzea hawe hu lingiwe nga vhuḓalo. Ngauralo u vhidzelela nga ipfi ḽihulu: “Mudzimu wanga, Mudzimu wanga, wo nṱutshelela’ni?” Vhaṅwe vhe vha ima henefho tsini vha tshi pfa hezwi vha huwelela vha ri: “Asizwo, u vhidza Elia.” Nga u ṱavhanya muṅwe wavho u a gidima, huno a ṱoma dzadza ḽo lovhewaho kha veine yo vhilaho kha ṱhodzi ya luṱanga, u a mu ṋea uri a nwe. Fhedzi vhaṅwe vha ri: “Litshani ri vhone Elia arali a tshi ḓo ḓa a mu tsisa.”

Musi Yesu a tshi ṋewa veine yo vhilaho, u a huwelela: “Zwo vulea!” Ee, o fhedza zwoṱhe zwe Khotsi awe a mu ruma uri a ḓe a zwi ite kha ḽifhasi. Mafheleloni, u ri: “Khotsi-anga! Muya wanga ndi u kumedza zwanḓani zwau.” Nga zwenezwo Yesu u ṋekedza Mudzimu maanḓa awe a vhutshilo e na fulufhelo ḽa uri Mudzimu u ḓo mu ṋea one hafhu. Zwenezwo a kotamisa ṱhoho yawe a fa.

Nga tshifhinga tsha musi Yesu a tshi fema lwa u fhedza, hu vha na mudzinginyo muhulu, u tshi fhandula matombo mahulu. Mudzinginyo wonoyo u na maanḓa vhukuma lune mavhiḓa a re nnḓa ha Yerusalema a fukulwa nahone zwitumbu zwi shakulelwa nnḓa hao. Vhafhiri vha gondo vhane vha vhona zwitumbu zwi nnḓa vha dzhena muḓini nahone vha vhiga.

Zwiṅwe hafhu, musi Yesu a tshi fa, ṅwenda muhulwane une wa fhandekanya fhethu Hukhethwa na Hukhethwa-khethwa nḓuni khethwa ya Mudzimu u a kheruwa nga vhukati, u bva nṱha u swika fhasi. Zwi vhonala uri hoyu ṅwenda wo khavhiswaho zwavhuḓi ndi wa vhulapfu ha mithara dzine dza nga vha 18 nahone u a lemela vhukuma! Vhuṱolo uvhu vhu mangadzaho a vhu sumbedzi mbiti dza Mudzimu kha vhavhulahi vha Murwa Wawe fhedzi, fhedzi vhu swaya uri nḓila i dzhenaho fhethu Hukhethwa-khethwa, ṱaḓulu nga hone huṋe, zwino yo vulea nga ṅwambo wa lufu lwa Yesu.

Ee, musi vhathu vha tshi pfa mudzinginyo nahone vha tshi vhona zwenezwo zwithu zwi tshi khou itea, vha dzhenwa nga nyofho khulu. Nduna ya mmbi ye ya vha yo ima henefho musi a tshi vhulahwa i renda Mudzimu. I a ḓivhadza: “Ngoho, muthu uyu o vha e Murwa wa Mudzimu!” Zwi vhonala uri yo vha i hone musi hu tshi haseledzwa tsengoni ya Yesu phanḓa ha Pilato uri u ḓiita murwa wa Mudzimu. Nahone zwino o fushea uri Yesu ndi Murwa wa Mudzimu, ee, uri i ngoho ndi muthu wa bvumo we a vhuya a tshila.

Na vhaṅwe-vho vha a kanuka zwihulu nga hezwi zwiitea zwa vhuṱolo, nahone vha thoma u humela mahayani vha tshi ḓirwa dzikhana sa musumbedzo wa u pfa havho vhuṱungu na u shona. Vhane vha khou vhona zwenezwo vho ima kule ndi vhafunziwa vhanzhi vha Yesu vha vhasadzi vhane vha kwamea vhukuma nga hezwi zwiitea zwihulwane. Muapostola Yohane na ene u hone. Mateo 27:45-56; Marko 15:33-41; Luka 23:44-49; 2:34, 35; Yohane 19:25-30.

▪ Ndi ngani hu sa nga ambiwi uri mutshakavhili ndi wone wo itaho uri hu vhe na swiswi ḽa awara tharu?

▪ Nga u ṱavhanya musi a sa athu u fa, ndi tsumbo ifhio yavhuḓi ine Yesu a i ṋea u itela vha re na vhabebi vho no vhaho vhaaluwa?

▪ Ndi mibulo ifhio miṋa ya Yesu ya u fhedza musi a sa athu u fa?

▪ Ndi mini zwine mudzinginyo wa zwi ita, nahone u kheruwa ha ṅwenda wa nḓuni khethwa nga vhukati zwi sumbedza mini?

▪ Nduna ya mmbi ye ya vha i tshi khou langa henefho u vhulahwani i kwamea hani nga honoho vhuṱolo?