Ndima Ya 64

Ngudo kha U Hangwela

ZWI vhonala Yesu a tshi kha ḓi vha nḓuni ya Kapernaume na vhafunziwa vhawe. O vha a tshi khou haseledza navho uri vha fanela u piringulula hani vhuleme vhukati ha vhahavho, ngauralo Petro u a vhudzisa: “Murena, wa hashu a tshi ntshinya ndi ḓo mu hangwela ka-ngana?” Samusi vharangaphanḓa vha vhurereli ha Tshiyuda vho vha vha tshi linganyisela u hangwela luraru, zwi vhonala uri Petro u dzhia i u thakha huhulwane musi a tshi vhudzisa uri “ka-ṱanu-na-kavhili naa?”

Fhedzi muhumbulo wa u vhalela honoho u vhonala wo khakhea. Yesu u khakhulula Petro: “U songo ita ka-ṱanu-na-kavhili fhedzi; mu hangwele U ite mahumi maṱanu-na-mavhili a tshi vhalwa ka-ṱanu-na-kavhili.” U khou sumbedza uri a ho ngo fanela u vhalelwa zwifhinga musi Petro a tshi hangwela murathu wawe.

U itela u ombedzela kha vhafunziwa vhawe mbofho ya u vha vha hangwelaho, Yesu u vha vhudza tshifanyiso. Ndi tsha khosi ine ya ṱoḓa u vhalelana milandu na vhaḓinḓa vhayo. Muṅwe muḓinḓa u ḓiswa khae a tshi mu koloda maḓana a na ḓana a dzibonndo (denarii dza 60 000 000). A hu na iṅwe nḓila ine a nga i lifha ngayo. Ngauralo, samusi Yesu a tshi ṱalutshedza, khosi i laedza uri ene na musadzi wawe na vhana vhawe vha rengiswe hu kone u lixwa wonoyo mulandu.

A tshi pfa zwenezwo muḓinḓa a wa fhasi milenzheni yawe a mu humbela a ri: “U songo fhela mbilu nga nṋe; ndi ḓo U lifhela zwoṱhe!”

A tshi mu pfela vhuṱungu, muṋe wawe a si tsha mu vhila mulandu muhulwane une a vha nawo. Fhedzi hu si kale o ita nga u ralo, Yesu u a bvela phanḓa, onoyo muḓinḓa a wana muṅwe muḓinḓa ngae we a vha a tshi mu koloda masheleni a 100 fhedzi. Onoyo munna a tzhipa muḓinḓa ngae, a ri: “Ndifhele arali Ú na mulandu wanga.”

Fhedzi muḓinḓa ngae ha na tshelede. Zwenezwo a wa phanḓa ha muḓinḓa ngae ane a mu koloda, a tshi mu humbela: “U songo fhela mbilu nga nṋe, ndi ḓo U lifhela.” U fhambana na muṋe wawe, onoyo muḓinḓa ha vhi na khathutshelo, a kudza muḓinḓa ngae khothoni.

Ee, Yesu u a bvela phanḓa, vhaṅwe vhaḓinḓa vhe vha vhona zwe zwa itea vha ya vha vhudza muṋe wavho. O halifha, a vhidza onoyo muḓinḓa. U ri: “Muḓinḓa muvhi-ḓiwe! Mulandu uḽa iwe ndo U ṋea, nge wa nkhumbela. Khé na iwe Ú songo ḓivha u khathutshela muḓinḓa nga iwe, vhunga na nṋe ndo U khathutshela?” O halifha, muṋe wawe a mu kumedza kha vhashengedzi u vhuya u swika a tshi lifha mulandu wawe woṱhe.

Zwenezwo Yesu a phetha nga uri: “Khotsi-anga wa ṱaḓulu u ḓo ni ralo-vho, arali noṱhe ná sa hangwela vharathu vhaṋu nga mbilu dzaṋu dzi tshi zwi funa.”

Ndi tsumbo yavhuḓi lungafhani kha u hangwela! Musi hu tshi vhambedzwa mulandu muhulwane wa tshivhi we Mudzimu a ri hangwela wone, na vhukhakhi naho vhu vhungafhani vhune ra nga itelwa hone nga wahashu wa Mukriste ndi vhuṱuku vhukuma. Zwiṅwe hafhu, Yehova Mudzimu o ri hangwela zwifhinga zwinzhi-zwinzhi. Kanzhi, a ri vhuyi ra zwi limuha musi ri tshi mu khakhela. Nga zwenezwo, naa a ro ngo fanela u hangwela wahashu zwenezwo zwifhinga zwiṱuku, naho ri na tshiitisi tsho khwaṱhaho tsha u vhilaela? Humbulani uri Yesu o funza Pfunzoni yawe ya Thavhani uri Mudzimu ‘u ḓo ri hangwela milandu yashu arali ri tshi hangwela vha re na milandu kha riṋe.’ Mateo 18:21-35; 6:12; Vha-Kolosa 3:13.

▪ Ndi mini tshi itaho uri Petro a vhudzise mbudziso nga ha u hangwela wahawe, nahone ndi ngani a tshi nga dzhia nyeletshedzo yawe ya u hangwela muthu zwifhinga zwa sumbe i u thakha?

▪ Maaravhele a khosi kha khumbelo ya muḓinḓa wawe o fhambana hani na maaravhele kha khumbelo ya muṅwe muḓinḓa nga onoyo muḓinḓa ngae?

▪ Ri guda mini kha tshifanyiso tsha Yesu?