Ndima Ya 40

Ngudo ya U Khathutshela

YESU a nga kha ḓi vha a tshee Naini, he zwenezwino a vha o vusa vhafuni murwa wa tshilikadzi, kana khamusi o dalela muṅwe muḓi tsini na henefho. Mufarisei ane a pfi Simoni u tama u vhona zwavhuḓi ane a pfi u khou ita mishumo i mangadzaho nga u ralo. Nga zwenezwo a ramba Yesu uri a ḓe a ḽe zwiḽiwa nae.

A tshi dzhia tshenetsho tshifhinga sa tshine a ḓo shumela vhane vha ḓo vha vhe hone, Yesu u ṱanganedza honoho u rambiwa, samusi o ḓi tenda musi a tshi rambiwa nga vha lutho na nga vhaitazwivhi. Naho zwo ralo, musi a tshi dzhena nḓuni ya Simoni, Yesu ha ṱanganedzwi nga nḓila ya lufuno ine kanzhi ha farwa ngayo vhaeni.

Milenzhe i re zwiendani i a fhisa na u vha na tshika nga ṅwambo wa u tshimbila badani dzi re na buse, nahone ndi mukhuvha wavhuḓi wa u ṱanganedza vhaeni u ṱanzwa milenzhe ya vhaeni nga maḓi a rotholelaho. Fhedzi milenzhe ya Yesu a i ṱanzwiwi musi a tshi swika. Nahone ha iti na u kuvhatedziwa u itela u sumbedzwa uri u a ṱanganedziwa, zwine zwa vha mikhwa i ṱanganedziwaho. Nahone ha ḓodziwi mavhudzi awe nga mapfura u sumbedza u mu ṱanganedza sa mueni.

Musi hu tshi khou ḽiwa, musi vhaeni vho dzula ṱafulani, muṅwe mufumakadzi a songo rambiwaho a dzhena henefho nḓuni a tshi tou ṋenya. Henefho muḓini u ḓivhelwa matshilele a u ḓifara luvhi. U fanela u vha o pfa pfunzo dza Yesu, u katela na u ramba hawe ‘vhoṱhe vho lemedzwaho uri vha ḓe a vha rule.’ Nahone samusi o sudzuluswa zwihulwane nga zwe a vhona na zwe a pfa, zwino o ṱoḓa Yesu.

Onoyo mufumakadzi u dzula murahu ha Yesu ṱafulani nahone a gwadama milenzheni yawe. Musi miṱodzi yawe i tshi wela milenzheni yawe, u i fhuluṱa nga mavhudzi awe. U ita na u bvisa mapfura a nukhelelaho mudzioni wawe, nahone samusi a tshi kuvhatedza milenzhe yawe nga lufuno, u i shela mapfura. Simoni u sedza a tshi zwi nyadza. U a elekanya: “Uyu muthu ngavhe e muporofita, ndi musi a tshi ḓivha zwauri ndi musadzi-ḓe a mu kwamaho; ngauri ndi muita-zwivhi.”

A tshi ṱhogomela zwine a khou zwi humbula, Yesu u ri: “Simoni, ndi na mafhungo ané nda funa u U vhudza.”

U a fhindula: “Mufunzi, amba U bule.”

Yesu u a thoma: “Vhathu vhavhili vho vha vho ḽa mulandu ha munna wa mupfumi. Muṅwe o vha ó ḽa maḓana maṱanu a masheleni, muṅwe ó ḽa mahumi maṱanu fhedzi. Ha ri vhá si na tsha u lifha, a vha khathutshela vhoṱhe vhuvhili havho. Zwino, ndi ufhio wa avho vhavhili ane a ḓo mu funesa?”

Khamusi a tshi timatima yeneyo mbudziso ine ya vha khagala, Simoni u a fhindula: “Nṋe ndi ri ndi uyo we a mu khathutshela e na mulandu muhulu.”

Yesu u ri: “U amba zwone.” Huno musi a tshi rembuluwa a lavhelesa uḽa musadzi, a ri kha Simoni: “Uyu musadzi U a mu vhona? Ndo ḓa nḓuni yau, U si mphe maḓi a u ṱamba milenzhe; ene a nṱanzwa milenzhe nga miṱodzi yawe, a i moṋa nga mavhudzi awe. Iwe a wo ngo nkuvhatedza. Ene tshee a dzhena afha ha athu u litsha u kuvhatedza milenzhe yanga. Iwe a wo ngo nḓolisa ṱhóho nga mapfura. Ene o nḓolisa milenzhe uḽa mushonga.”

Nga zwenezwo onoyo mufumakadzi o ṋea vhuṱanzi ha u rembuluwa hu bvaho mbiluni kha u ḓifara hawe huvhi ha tshifhinga tsho fhiraho. Nga zwenezwo Yesu u phetha nga uri: “Ndi zwiné nda amba ngazwo’ nda ri: O hangwelwa zwivhi zwawe zwinzhi, ndi zwiné wa mu vhona ngazwo’ lufuno lwawe lu luhulu. Ngauri kha o hangwelwaho zwiṱuku na lufuno ndi luṱuku.”

Yesu ha khou vhuyafhedza na zwiṱukuṱuku u ḓifara huvhi. Nṱhani hazwo, hetshi tshiitea tshi khou dzumbulula u khathutshela hawe nga pfeseso vhathu vhane vha khakha vhutshiloni, fhedzi vhane vha sumbedza uri vha pfa vhuṱungu nga hazwo nahone vha ḓa ha Kristo uri a vha homolose. A tshi ṋea onoyo mufumakadzi tshihomolosi tsha vhukuma, Yesu u ri: “Wo hangwelwa zwivhi zwau. . . . Lutendo lwau lwo U tshidza; ṱuwa zwau wó rula mbilu.” Luka 7:36-50; Mateo 11:28-30.

▪ Yesu u ṱanganedzwa hani nga Simoni we a mu ramba?

▪ Ndi nnyi ane a ṱoḓa Yesu, nahone ndi ngani?

▪ Ndi tshifanyiso tshifhio tshine Yesu a tshi ita, nahone u tshi shumisa hani?