Ndima Ya 74

Nyeletshedzo I Ṋewa Marita, na Ndaela nga ha Thabelo

VHUKATINI ha mushumo wa vhuḓinḓa ha Yesu ngei Yudea, u dzhena muḓini wa Bethania. Hafha ndi hune Marita, Maria, na khaladzi avho Lazaro vha dzula hone. Khamusi Yesu o vhona havha vhararu u thomani ha vhuḓinḓa hawe nahone zwino o no vha khonani yavho ya tsini-tsini. Naho zwo ralo, Yesu u ya hayani ha Marita nahone ene a mu ṱanganedza.

Marita u khou swela u funda Yesu nga zwa khwine-khwine zwine a vha nazwo. I ngoho, ndi ndugelo khulwane vhukuma u dalelwa nga Messia o fulufhedziswaho muḓini wau! Ngauralo Marita u farekanea nga u lugiselela zwiḽiwa zwa nṱha na u ita uri zwithu zwi tshimbile zwavhuḓi u itela uri Yesu a ḓiphine nahone a ḓigeḓe.

Kha ḽiṅwe sia, Maria murathu wa Marita u dzula fhasi milenzheni ya Yesu u khou mu thetshelesa. Hu si kale, Marita u ḓa ha Yesu a ri khae: “Murena, naa a U zwi londi, murathu wanga a tshi ndaṱedza nda shuma ndí ndoṱhe? Mu vhudze uri a ḓe a mpfarise.”

Fhedzi Yesu a si vhudze Maria naho tshi tshini. Nṱhani hazwo, a kaidza Marita nga u vhilaelesa hawe nga ha zwithu zwi vhonalaho. A mu laya nga vhulenda a ri: “Marita, Marita, U a vhilaela, U ḓi-netisa nga zwinzhi. Tshililelwa nga tshi vhe tshithihi.” Yesu u khou amba uri a zwi ṱoḓei uri muthu a fhedze tshifhinga tshilapfu a tshi khou lugiselela zwiḽiwa zwinzhi-zwinzhi. Zwiṱuku-ṱuku kana ndilo nthihi yo eḓana.

U ḓiimisela ha Marita ndi havhuḓi; u ṱoḓa u vha ṋemuḓi a ṱanganedzaho vhaeni. Naho zwo ralo, nga u vhilaelesa hawe zwithu zwi vhonalaho, u khou ṱahela ndayo i bvaho ha Murwa wa Mudzimu nga dzawe! Ngauralo Yesu u fhedza nga uri: “Tshililelwa nga tshi vhe tshithihi; Maria o nanga mukovhe wavhuḓi; wonoyo ha nga dzhielwi.”

Nga murahu, nga muṅwe musi, muṅwe mufunziwa a vhudzisa Yesu a ri: “Murena, ri funze u rabela, vhunga na Yohane o funza vhafunziwa vhawe.” Khamusi hoyu mufunziwa o vha e siho musi Yesu a tshi vha funza tsumbo ya thabelo ṅwaha na tshipiḓa wo fhiraho Pfunzoni yawe ya Thavhani. Ngauralo Yesu u dovholola ndaela dzawe, fhedzi a bvela phanḓa u ṋea tshifanyiso u itela u ombedzela ṱhoḓea ya u futelela thabeloni.

Yesu u a thoma: “Ndi ufhio kha inwi ané a vha na khonani yawe; ya ḓa ha ene vhusiku vhuhulu ya ri: Khonani yanga, mphe zwinnkwa zwiraru, ngauri hu na khonani yanga o ḓaho ha nṋe e lwendoni, huno a thi na tsha u mu bikela ngatsho’. Uḽa wa ngomu nḓuni naa a nga fhindula a ri: Litsha u ndina; vothi ḽo no valwa; na vhana vhanga vho no vha vhulaloni na nṋe; a thi koni u vuwa nda U ṋea! a nga ralo naa? Nṋe ndi ri: arali á sa vuwa a mu fha nge uḽa a vha khonani yawe, u ḓo vuwa a mu ṋea zwiné a humbela, a tshi itela luhumbela lwawe.”

Nga hohu u vhambedza Yesu ha khou amba uri Yehova Mudzimu ha funi u aravha dzikhumbelo, samusi zwo vha zwo ralo nga khonani ya kha mafhungo awe. Hai, fhedzi u khou fanyisa uri arali khonani i sa funi i tshi nga kona u aravha luhumbelo lu sa tumuwi, Khotsi ashu wa ṱaḓulu wa lufuno ene-ha! Ngauralo Yesu u a bvela phanḓa: “Na nṋe ndi ri: Dzulani ni tshi humbela, ndi hone ni tshi ḓo fhiwa; dzulani ni tshi ṱoḓa, ndi hone ni tshi ḓo wana; dzulani ni tshi omba-omba, ndi hone ni tshi ḓo vulelwa. Ngauri muṅwe na muṅwe ane a humbela u ḓo ṱanganedza, na a ṱoḓaho u ḓo wana, nahone muṅwe na muṅwe a omba-ombaho u ḓo vulelwa.”​—NW.

Zwenezwo Yesu a amba nga ha vhokhotsi vha songo fhelelaho, vha re na tshivhi, a tshi ri: “Ndi ufhio kha inwi a re khotsi, ané a ri u humbelwa tshisevho nga ṅwana wawe, a mu ṋea ṋowa? A humbela gumba, a mu ṋea phame? Huufha inwi ni re vhavhi, ni tshi ḓivha u ṋea vhana vhaṋu zwifhiwa zwavhuḓi! Khotsi wa ṱaḓulu u ni fhira kule-kule. Vha mu humbelaho u ḓo vha fha Muya-mukhethwa.” Vhukuma, ndi khuthadzo i ṱuṱuwedzaho vhukuma ine Yesu a i ṋea ya u futelela thabeloni. Luka 10:38–11:13.

▪ Ndi ngani Marita a tshi tou ḓidina nga u rali a tshi lugiselela Yesu?

▪ Maria u ita mini, nahone ndi ngani Yesu a tshi khoḓa ene nṱhani ha u khoḓa Marita?

▪ Ndi mini tshi itaho uri Yesu a dovholole ndaela dzawe nga ha thabelo?

▪ Yesu u fanyisa hani ṱhoḓea ya u futelela thabeloni?