Ndima Ya 10

Nyendo dza u ya Yerusalema

TSHIMEDZI tsho swika. Nahone ndi tshifhinga tsha uri muṱa wa Yosefa, khathihi na khonani na mashaka, vha fare lwendo lwa ṅwaha muṅwe na muṅwe nga tshifhinga tsha tshimedzi lwa u ya Yerusalema u ita vhuṱambo ha Paseka. Musi vhe lwendoni lwa khilomithara dzine dzine dza nga vha 100, hu anzela u vha na dakalo. Zwino Yesu u na miṅwaha ya 12, nahone u sedza phanḓa kha vhuṱambo e na dzangalelo ḽo khetheaho.

Kha Yesu na muṱa wahawe, Paseka a tshi sokou vha tshithu tsha ḓuvha ḽithihi. Vha dovha vha dzula u itela Vhuṱambo ha maḓuvha a sumbe ha Tshinnkwa tshi si na Dini, tshine vha tshi dzhia sa tshipiḓa tsha tshifhinga tsha Paseka. Nga zwenezwo, lwendo lwoṱhe lwa u bva hayani Nazareta, u katela na u dzula Yerusalema, lu dzhia vhege dzine dza nga vha mbili. Fhedzi hoyu ṅwaha, nga ṅwambo wa zwiṅwe zwine zwa kwama Yesu, lu dzhia tshifhinga tshilapfu.

Hu vha na vhuleme lwendoni lwa u humela murahu u bva Yerusalema. Yosefa na Maria vha zwi dzhia uri Yesu u tshigwadani tsha mashaka na dzikhonani vhane vha khou tshimbila navho. Naho zwo ralo a si vhonale musi vha tshi ṱoḓa u eḓela vhusiku, huno vha mu ṱoḓa vhukati ha vhane vha khou tshimbila navho. A si vhe na hune a wanala hone. Ngauralo Yosefa na Maria vha humela murahu hafhu Yerusalema u mu ṱoḓa.

Vha mu ṱoḓa ḓuvha ḽoṱhe, fhedzi vha si mu wane. Na nga ḓuvha ḽa vhuvhili a vha mu wani. Mafheleloni, nga ḓuvha ḽa vhuraru, vha ya nḓuni khethwa. Henefho, kha iṅwe ya dziholo dzayo, vha vhona Yesu o dzula vhukati ha vhafunzi vha Vhayuda, a tshi khou vha thetshelesa nahone a tshi khou vha vhudzisa dzimbudziso.

Maria u a vhudzisa: “Murwa wanga! Izwi zwithu wo ri itela’ni? Vhona, khotsi-au na nṋe ro vhaisala ri tshi U ṱoḓa.”

Yesu u akhamadzwa ngauri a vho ngo ḓivha hune vha nga mu wana hone. U a vhudzisa: “Naa no nṱoḓela’ni? A ni zwi ḓivhi zwauri ndi fanela u vha kha zwi re zwa khotsi-anga naa?”

Yesu ha pfesesi uri ndi ngani vhabebi vhawe vha sa zwi ḓivhi. Nga zwenezwo, Yesu u vhuyelela hayani na vhabebi vhawe nahone u bvela phanḓa a tshi ḓiṱukufhadza khavho. U bvela phanḓa a tshi aluwa nga vhuṱali na ṋamani na u takalelwa nga Mudzimu na nga vhathu. Ee, u bva vhuṱukuni hawe, Yesu u vhea tsumbo yavhuḓi hu si nga u ṱoḓa madzangalelo a muya fhedzi, fhedzi na nga u ṱhonifha vhabebi vhawe. Luka 2:40-52; 22:7.

▪ Ndi lwendo lufhio lune Yesu na vha muṱa wahawe vha lu fara misi yoṱhe nga tshifhinga tsha tshimedzi, nahone lu dzhia tshifhinga tshingafhani?

▪ Hu itea mini vhukatini ha lwendo lwe vha vha nalwo musi Yesu e na miṅwaha ya 12?

▪ Yesu u vhea tsumbo ifhio kha vhaswa vha ṋamusi?