Ndima Ya 2

O Huliswa A Sa Athu U Bebwa

MUSI muruṅwa Gabriele o no vhudza musidzana Maria uri u ḓo beba ṅwana wa mutukana ane a ḓo vha khosi ya lini na lini, Maria u a vhudzisa: “Izwo zwi ḓo itea hani, huufha ndí sa ḓivhi munna?”

Gabriele u a ṱalutshedza: “Muya mukhethwa u ḓo ḓa kha iwe; maanḓa a Wa-Ṱaḓulu-ṱaḓulu a ḓo vha murunzi wau; ndi zwiné Mukhethwa ane a ḓo bebiwa nga iwe a ḓo pfi Murwa wa Mudzimu ngazwo’.”

U thusa Maria uri a tende mulaedza wawe, Gabriele u bvela phanḓa: “Huno vhona, shaka ḽau Elisabetha na ene ndi muthu wa thovhela; u ḓo beba murwa ngeno ó no vha wa maḓuvha; huno uno wo no vha ṅwedzi wawe wa vhuṱanu-na-vhuthihi; ndi ene we a vha a tshi pfi ha bebi. Ngauri Mudzimu a huna tshithu tshiné a sa tshi kone.”

Maria u ṱanganedza maipfi a Gabriele. Nahone maaravhele awe ndi afhio? U a huwelela: “Vhona, ndi mulanda wa Murena; nga zwi vhe hone zwe wa amba.”

Nga u ṱavhanya musi Gabriele a tshi tou ṱuwa, Maria u a ḓilugisa nahone u ya u dalela Elisabetha, ane a dzula na munna wawe, Sakaria, dzithavhani dza shangoni ḽa Yuda. U bva hayani ha Maria Nazareta, holwu ndi lwendo lulapfu khamusi lwa maḓuvha mararu kana maṋa.

Musi Maria mafheleloni a tshi swika muḓini wa Sakaria, u a dzhena nahone a lumelisa. Nga zwenezwo, Elisabetha u ḓadzwa nga muyamukhethwa, nahone u amba na Maria uri: “Nga hu rendwe iwe kha vhasadzi vhoṱhe, nga hu rendwe na mbebo ya muvhili wau. Naa ndi itwa hani ndi tshi dalelwa nga mme-a Murena wanga? Ngauri, vhona, ipfi ḽa musi U tshi nthesha ḽi tshi dzhena nḓevheni dzanga, ṅwana a re muvhilini wanga o tamba nga dakalo.”

Musi a tshi pfa hezwi, Maria u aravha nga u livhuha hu bvaho mbiluni: “Mbilu yanga i hulisa Murena. Muya wanga u ḓi-phiṋa nga Mudzimu, Mutshidzi wanga. Ngauri o vhona vhuheḓana ha mulanda wawe. Vhona, zwino ndi vho ḓo pfi Wa-Mashudu nga mirafho yoṱhe. Ngauri Wa-Maanḓa o ṋyita zwithu zwihulu.” Naho zwo ralo, hu sa londwi u tondwa hune a khou hu sumbedzwa, Maria u isa khuliso yoṱhe ha Mudzimu. U ri: “Ané ene dzina ḽawe ḽa vha ḽikhethwa; Ané tshilidzi tshawe tsha ḓo vha tsha mirafho na mirafho kha vha mu ofhaho.”

Maria u bvela phanḓa u renda Mudzimu nga luimbo lwo hevhedzwaho lwa vhuporofita, a tshi ḓivhadza uri: “O ita maanḓa nga tshanḓa tshawe; u balanganya vha ḓi-hudzaho nga mihumbulo ya dzimbilu dzavho. Vhavhusi u a vha wisa vhe kha khuluṋoni dzavho, a hulisa vhaheḓana. Vha nḓala u vha ḓadza zwivhuya; vhapfumi u vha humisa vhó dzimiwa. U farisa muṱhannga wawe, Isiraele, ú ralo a tshi elelwa tshilidzi; vhunga ó vhudza vho-khotsi-ashu Abrahamu na vhana vhawe; u ḓo ḓi tshi elelwa na lini na lini.”

Maria u dzula na Elisabetha hune ha nga vha miṅwedzi miraru, nahone lu sa timatimisi ndi muthusi muhulwane vhukatini ha dzenedzi dzivhege dza u fhedza dza u ḓihwala ha Elisabetha. I ngoho ndi zwavhuḓi uri vhenevha vhafumakadzi vhavhili vha fulufhedzeaho, vhoṱhe vho vhifhaho muvhilini nga thuso ya Mudzimu, vha nga vha vhe vhoṱhe kha tshenetshi tshifhinga tsho fhaṱutshedzwaho tsha vhutshilo havho!

Naa no ṱhogomela u huliswa he Yesu a hu ṋewa na musi a sa athu u bebwa? Elisabetha o mu vhidza “Murena wanga,” nahone ṅwana wawe a sa athu u bebwa o tamba nga dakalo musi Maria a tshi bvelela lwa mathomo. Kha ḽiṅwe sia, nga murahu vhaṅwe vho fara Maria na ṅwana wawe a sa athu u bebwa nga khulisonyana, samusi ri tshi ḓo zwi vhona. Luka 1:26-56.

▪ Ndi mini tshine Gabriele a tshi amba u itela u thusa Maria u pfesesa uri u ḓo vha hani muthu wa thovhela?

▪ Yesu o huliswa nga nḓila-ḓe musi a sa athu u bebwa?

▪ Ndi mini tshine Maria a tshi amba musi a tshi renda Mudzimu nga luimbo lwa vhuporofita?

▪ Maria u dzula tshifhinga tshingafhani na Elisabetha, nahone ndi ngani zwi zwo teaho uri Maria a dzule na Elisabetha vhukatini ha itshi tshifhinga?