Ndima Ya 46

O Kwama Nguvho Yawe

MAFHUNGO a u vhuya ha Yesu Miḓini ya Fumi a swika Kapernaume, nahone gogo ḽihulu ḽi kuvhangana thungo ha lwanzhe u itela u mu ṱanganedza. A zwi timatimisi uri vho zwi pfa uri o kaidza maḓumbu na u fhodza vhanna vhe vha vha vhe na mimuya mivhi. Zwino, musi a tshi tou swika vhugabeloni, vha a mu kuvhanganela, vhe na dzangalelo na u lavhelela tshiṅwe tshithu.

Muṅwe wa vhane vha khou vhilaelela u vhona Yesu ndi Yairo, muhulwane wa tshikolo. U wela milenzheni ya Yesu nahone a mu humbela lunzhi-lunzhi: “Ṅwananyana wanga u khou fa. Iḓá U vhee zwanḓa zwau kha ene uri a fhole a tshile.” Samusi e ene ṅwana wawe e eṱhe nahone a tshi tou vha na miṅwaha ya 12, ndi dzanga vhukuma kha Yairo.

Yesu u a tenda nahone, u fheletshedzwa nga gogo, u livha muḓini wa Yairo. Ri nga humbulela dakalo ḽa vhathu musi vho lavhelela vhuṅwe vhuṱolo. Fhedzi hu iswa ṱhogomelo kha muṅwe mufumakadzi kha gogo nga vhuleme hawe vhu vhavhaho.

Miṅwaha ya 12, hoyu mufumakadzi o vha a tshi khou tambula nga vhulwadze ha u fhalala malofha. O ya ṅangani nnzhi, a tshi shumisa tshelede yawe yoṱhe kha u ilafhiwa. Fhedzi ho ngo thusea; nṱhani hazwo, vhuleme hawe ha ṋaṋa.

Samusi ni tshi nga zwi pfesesa, nga nnḓa ha u mu kula nungo nga maanḓa, vhulwadze hawe vhu ita na u shonisa na u nyadzisa. Muthu kanzhi ha ambi vhathuni nga vhuṱungu ho raloho. Zwiṅwe hafhu, nga fhasi ha Mulayo wa Mushe u fhalala ha malofha hu ita uri mufumakadzi a vhe na tshika, nahone naho e nnyi ane a mu kwama kana nguvho yawe yo rothelwa nga malofha u fanela u ṱamba na u vha wa tshika ḓuvha ḽoṱhe.

Onoyo mufumakadzi o vha o pfa nga ha vhuṱolo ha Yesu nahone zwino o mu ṱoḓa. Nga ṅwambo wa u sa kuna hawe, o ita uri u fhira hawe nga vhukati ha gogo zwi si vhonale, a amba mbiluni yawe a ri: “Naho nda kwama nguvho yawe fhedzi, ndi ḓo fhola.” Musi a tshi ita nga u ralo, nga u ṱavhanya a pfa uri u fhalala ha malofha ho ima!

“Ndi nnyi o nkwamaho?” Eneo maipfi a Yesu a fanela u vha o tshusa onoyo mufumakadzi lungafhani! O vha a tshi nga zwi ḓivha hani? Petro u a fhindula: ‘Thovhela, magogo o u tanga nahone a khou u pwanyeledza, iwe u ri, ndi nnyi o nkwamaho?’

A tshi ṱinga-ṱinga a tshi ṱoḓa onoyo mufumakadzi, Yesu u a ṱalutshedza: “U hone o nkwamaho; ngauri ndo pfa maanḓa a tshi bva kha nṋe.” Vhukuma, a si u kwama ho ḓoweleaho, ngauri u fhodza hune ha itea hu kokodza maanḓa a Yesu.

Uḽa musadzi a tshi vhona o vhonololwa, a ḓa a wela phanḓa ha Yesu, o tshuwa nahone a tshi khou tetemela. Phanḓa ha vhathu vhoṱhe, u amba ngoho yoṱhe nga ha vhulwadze hawe na nḓila ine a kha ḓi bva u fhodzwa ngayo.

A tshi sudzuluswa nga u ḓiambulula ha onoyo mufumakadzi nga vhuḓalo, Yesu u a mu khuthadza nga u mu pfela vhuṱungu: “Ṅwana’nga lutendo lwau lwo U tshidza; ṱuwa zwau wó rula mbilu; ḽiṱhupho ḽau ḽo fhola tshoṱhe.” Ndi zwavhuḓi lungafhani u ḓivha uri We Mudzimu a mu khetha uri a vhuse ḽifhasi ndi muthu wa lufuno, a pfelaho vhuṱungu, ane a ṱhogomela vhathu khathihi na u vha na maanḓa a u vha thusa! Mateo 9:18-22; Marko 5:21-34; Luka 8:40-48; Levitiko 15:25-27.

▪ Yairo ndi nnyi, nahone ndi ngani a tshi ḓa ha Yesu?

▪ Ndi vhuleme vhufhio vhune muṅwe mufumakadzi a vha naho, nahone ndi ngani u ya ha Yesu u ṱoḓa thuso zwi tshi mu konḓela?

▪ Onoyo mufumakadzi u fhodzwa hani, nahone Yesu u mu khuthadza hani?