Ndima Ya 4

O Vhifha Muvhilini fhedzi Ho Ngo Vhingwa

MARIA u kha ṅwedzi wawe wa vhuraru o vhifha muvhilini. Ni ḓo humbula uri o fhedza maḓuvha awe a u thoma a u vhifha hawe muvhilini o dalela Elisabetha, fhedzi zwino o vhuyelela hayani Nazareta. Zwenezwino vhuimo hawe vhu ḓo ḓivhea hoṱhe muḓini wa hayani ha hawe. I ngoho, u kha vhuimo vhu lemelaho lungafhani!

Zwine zwa ita uri vhuimo vhu vhe vhu konḓaho ndi uri Maria o fulufhedzisa u vha musadzi wa Yosefa wa muvhaḓi. Nahone u a zwi ḓivha uri, nga fhasi ha mulayo wa Mudzimu kha Vhaisiraele, musadzi o fulufhedzisanaho na muṅwe munna, fhedzi a tendela u vha vhushakani ha u ṱangana nga dzimbeu na muṅwe munna u fanela u kanḓwa nga matombo u swikela a tshi fa. U ḓo ṱalutshedza Yosefa hani u vhifha hawe muvhilini?

Samusi Maria o ṱuwa miṅwedzi miraru, ri nga vha na vhungoho ha uri Yosefa u ṱoḓa u mu vhona. Musi vha tshi ṱangana, zwi vhonala uri Maria u mbo ḓi mu phulela eneo mafhungo. A nga ita zwoṱhe nga hune a kona ngaho u itela u mu ṱalutshedza uri o vhifha muvhilini nga muyamukhethwa wa Mudzimu. Fhedzi, samusi ni tshi nga zwi humbula, hezwi zwi a konḓa vhukuma uri Yosefa a zwi tende.

Yosefa u ḓivha bvumo ḽavhuḓi ḽine Maria a vha naḽo. Nahone zwi tou vha khagala uri u a mu funa vhukuma. Naho zwo ralo, hu sa londwi zwine a nga ḓiambela, vhukuma zwi vhonala uri o vhifhiswa muvhilini nga muṅwe munna. Naho zwo ralo, Yosefa ha ṱoḓi a tshi kanḓwa nga matombo u swikela a tshi fa kana uri a shoniswe khagala. Ngauralo u humbula u mu ṱala tshiphirini. Nga eneo maḓuvha, vhathu vho fulufhedzisanaho vho vha vha tshi dzhiiwa sa vho vhinganaho, nahone u ṱala ho vha hu tshi ṱoḓea u itela u fhelisa u fulufhedzisana havho.

Nga murahu, musi Yosefa a tshi kha ḓi elekanya enea mafhungo, u ya u lala. Muruṅwa wa Yehova u ḓa khae muloroni nahone u ri: “U songo ofha u ṱanganedza Maria musadzi wau; ngauri é muthu wa thovhela, ndi zwi bvaho kha Muya mukhethwa. Ú ḓo beba murwa, ané wa ḓo mu ira dzina ḽa Yesu, ngauri ndi ene ane a ḓo tshidza vhathu vhawe zwivhini zwavho.”

Musi Yosefa a tshi vuwa, o takala lungafhani! A sa vhuyi a lenga-lenga u ita nga he muruṅwa a laedza ngaho. U dzhia Maria a mu ḓisa muḓini wawe. Zwi re zwone ndi uri heyi nyito ya khagala i shuma sa vhuṱambo ha mbingano, i tshi ṱhogomelisa uri zwino Yosefa na Maria vho vhingana lwa mulayo. Fhedzi Yosefa ha vhi na vhushaka ha u ṱangana nga dzimbeu na Maria samusi a kha ḓi vha o vhifha muvhilini nga Yesu.

Vhonani! Maria o vhifhesa muvhilini, naho zwo ralo Yosefa u khou mu ṋamedza mbongola. Vha khou ya ngafhi, nahone ndi ngani vha tshi khou fara lwendo musi Maria a tshi vho ṱoḓou beba? Luka 1:39-41, 56; Mateo 1:18-25; Doiteronomio 22:23, 24.

▪ Vhuimo ha muhumbulo wa Yosefa ndi vhufhio musi a tshi ḓivha uri Maria o vhifha muvhilini, nahone ndi ngani?

▪ Yosefa a nga ṱala hani Maria musi vha sa athu u vhingana?

▪ Ndi nyito ifhio ya khagala ine ya shuma sa vhuṱambo ha mbingano ya Yosefa na Maria?