Ndima Ya 127

O Vhulungwa nga Ḽavhuṱanu​—Tshalo A Tshi Na Tshithu nga Swondaha

ZWINO ndi nga tshitheu nga Ḽavhuṱanu, nahone Sabatha ya Nisan 15 i ḓo thoma nga tshikovhelelo. Tshitumbu tsha Yesu tsho nembelela kha danda, fhedzi mavemu mavhili o mu tangaho a kha ḓi tshila. Masiari a Ḽavhuṱanu a vhidzwa U Ḓilugisa ngauri ndi musi vhathu vha tshi lugisa zwiḽiwa na u fhedzisa mushumo naho u ufhio wo ṱavhanyiswaho une u sa nga kone u lindela u swikela hu tshi fhira Sabatha.

Zwino Sabatha ine ya vho ṱoḓa u thoma a si Sabatha yo ḓoweleaho (ya ḓuvha ḽa vhusumbe ḽa vhege) fhedzi, fhedzi i dovha ya vha Sabatha “khulu.” I vhidzwa nga u rali ngauri Nisan 15, ine ya vha ḓuvha ḽa u thoma ḽa Vhuṱambo ha Zwinnkwa zwi Si Na Dini ha maḓuvha a sumbe (nahone i dzula i Sabatha, hu sa londwi uri vhu ḓa nga ḓuvha ḽifhio ḽa vhege), i vha hone nga ḓuvha ḽithihi na Sabatha yo ḓoweleaho.

U ya nga Mulayo wa Mudzimu, zwitumbu a zwo ngo fanela u litshwa zwo nembelela vhusiku hoṱhe kha danda. Ngauralo Vhayuda vha humbela Pilato uri u fa ha havho vha khou shengedzwaho hu ṱavhanyiswe nga u vunḓa milenzhe yavho. Nga zwenezwo, maswole vha vunḓa milenzhe ya mavemu mavhili. Fhedzi vhunga musi zwi tshi vhonala uri Yesu o fa, milenzhe yawe a i vunḓiwi. Hezwi zwi ḓadzisa luṅwalo lu no ri: “Ni songo mu vunḓa shambo.”

Naho zwo ralo, u fhelisa u timatima naho hu hufhio ha uri Yesu o fa, muṅwe wa maswole u phula lurumbu lwawe nga pfumo. Pfumo ḽi rungekanya hune mbilu yawe ya vha hone, nahone nga u ṱavhanya hu bva malofha na maḓi. Muapostola Yohane, ane a vha ṱhanzi yo zwi vhonaho, u vhiga uri hezwi zwi ḓadza luṅwe luṅwalo lu no ri: “Vha ḓo vhona we vha mu runga.”

Ane a dovha a vha hone henefho u vhulahwani ndi Yosefa a bvaho muḓini wa Arimathia, muraḓo u ḓivhaleaho wa Magota. O hana u tikedza khothe khulwane malugana na u shengedza Yesu lu si lwa khaṱulokwayo. Vhukuma Yosefa ndi mufunziwa wa Yesu, naho o vha a tshi khou ofha u ḓiṱalusa sa mufunziwa. Naho zwo ralo, zwino, u sumbedza tshivhindi nahone u ya ha Pilato u humbela tshitumbu tsha Yesu. Pilato u vhidza nduna i langaho, nahone musi nduna yo no khwaṱhisa uri Yesu o fa, Pilato a tendela tshitumbu tshi tshi dzhiiwa.

Yosefa u dzhia tshitumbu nahone u tshi putela nga ṅwenda u si na tshika a tshi tshi lugisela u tshi vhulunga. U thuswa nga Nikodemo, muṅwe muraḓo wa Magota. Na ene Nikodemo o kundwa u sumbedza lutendo lwawe kha Yesu nga ṅwambo wa u ofha u xelelwa nga vhuimo hawe. Fhedzi zwino u ḓisa tshiputo tshi re na mushonga une wa nga vha phaundu dza Roma dza ḓana (khilogiramu dza 33) na mishonga ya tshikhopha i ḓuraho vhukuma. Tshitumbu tsha Yesu tshi putelwa nga miṅwenda i re na yeneyo mishonga, samusi i maitele a Vhayuda a u lugisa zwitumbu u itela u zwi vhulunga.

Nga zwenezwo tshitumbu tshi ladzwa tshaloni tshiswa tsha Yosefa tshe tsha korwa kha tombo tsimuni i re nga henefho tsini. Mafheleloni, tombo ḽihulwane ḽi phiguluselwa u vala tshenetsho tshalo. U itela u vuledza u vhulunga nga phanḓa ha Sabatha, u lugisa tshitumbu hu a ṱavhanyiswa. Nga zwenezwo, Maria Magdalena na Maria mme a Yakobo Muṱuku, vhe khamusi vha vha vha tshi khou ḓi thusa nga ndugiselelo, vha humela hayani nga u ṱavhanya u lugisa mishonga na zwiḓolo zwa mapfura zwo engedzeaho. Nga murahu ha Sabatha, vha dzudzanya u shuma tshitumbu tsha Yesu nga ho engedzeaho u itela uri tshi dzule tshifhinga tshilapfu.

Ḓuvha ḽi tevhelaho, ḽine ḽa vha Mugivhela (ḽa Sabatha), vhotshifhe vhahulu na Vhafarisei vha a ya ha Pilato nahone vha ri: “Murena, ro elelwa zwe uḽa mudzia-u-fhura vhathu a amba á kha ḓi tshila a ri: Ndi ḓo vuwa hó fhela maḓuvha mararu! Ndi zwiné ra ri: Laedza uri tshalo tshi lindwe hu vhuye hu swike ḓuvha ḽa vhuraru, uri vhafunziwa vhawe vha sa ḓo ḓa vha mu tswa vha kona u vhudza vhathu vha ri: O vuwa vhafuni! Mazwifhi ayo a vho ḓo vhifha a fhira a kale.”

Pilato u a fhindula: “Vhalindi ngevho. Tshimbilani ni yo linda nga huné na ḓivha.” Ngauralo vha a ya nahone vha ita uri vhiḓa ḽi vhe ḽo tsireledzeaho nga u kandisa tombo nga luswayo na u vhea maswole a Vharoma uri vha linde.

Nga matsheloni-tsheloni a Swondaha Maria Magdalena na Maria mme a Yakobo, u katela na Salome, Yohana, na vhaṅwe vhafumakadzi, vha ḓisa mishonga tshaloni u itela u ḓodza tshitumbu tsha Yesu. Vhe nḓilani vha ri nga tshavho: “Ndi nnyi ané a ḓo ri phigulusela tombo a ḽi bvisa muṋangoni wa tshalo?” Fhedzi vha tshi swika, vha wana uri ho vha na mudzinginyo nahone muruṅwa wa Yehova o phigulusela tombo kule. Vhalindi vho ṱuwa, nahone tshalo a tshi na tshithu! Mateo 27:57–28:2; Marko 15:42–16:4; Luka 23:50–24:3, 10; Yohane 19:14, 31–20:1; 12:42; Levitiko 23:5-7; Doiteronomio 21:22, 23; Psalme ya 34:20; Sakaria 12:10.

▪ Ndi ngani Ḽavhuṱanu ḽi tshi pfi ḽa U Ḓilugisa, nahone Sabatha “khulu” ndi mini?

▪ Ndi maṅwalo afhio ane a ḓadzea malugana na tshitumbu tsha Yesu?

▪ Yosefa na Nikodemo vha ita mini malugana na u vhulungwa ha Yesu, nahone vha na vhushaka vhufhio na Yesu?

▪ Vhotshifhe vha humbela Pilato mini, nahone u aravha hani?

▪ Hu itea mini nga Swondaha nga matsheloni-tsheloni?