Ndima Ya 112

Paseka ya Yesu ya u Fhedza I Tsini

MUSI Ḽavhuvhili, ḽa 11 Nisan, ḽi tshi kovhela, Yesu u fhedza u funza vhaapostola Thavhani ya Miṱwari. Ḽo vha ḽi ḓuvha ḽa u farakanea na ḽi netisaho vhukuma! Zwino, khamusi a tshi khou humela Bethania u yo eḓela hone, u vhudza vhaapostola vhawe: “Ni a ḓivha zwauri ho sala maḓuvha mavhili, ndi hone hu tshi ḓa vhuṱambo ha Paseka. Huno Murwa-muthu u ḓo kumedzwa u pfi a vhambiwe.”

Yesu zwi vhonala uri u fhedza ḓuvha ḽi tevhelaho, Ḽavhuraru, ḽa 12 Nisan, o awela zwavhuḓi na vhaapostola vhawe. Nga ḓuvha ḽa nga phanḓa, o kaidza vharangaphanḓa vha vhurereli khagala, nahone u ṱhogomela uri vha khou ṱoḓa u mu vhulaha. Ngauralo nga Ḽavhuraru ha tshimbili khagala, samusi a sa ṱoḓi naho tshi tshini tshi tshi mu thithisa kha u pembelela hawe Paseka na vhaapostola vhawe nga madekwana a tevhelaho.

Nga tshenetsho tshifhinga, vhotshifhe vhahulu na vhahulwane vha vhathu vho kuvhangana tshivhamboni tsha tshifhe muhulu, Kayafa. Vha tshi vhaiswa nga u vutshela Yesu nga tsha mulovha, vha khou ita ndugiselelo dza u mu fara nga vhukwila na u mu vhulaha. Naho zwo ralo vha ḓi dzula vha tshi ri: “Hone, ri songo zwi ita zwino hú na vhuṱambo, uri vhathu vha sa ḓo ri vutshela.” Vha khou ofha vhathu, vhane Yesu a ḓiphina nga u takalelwa ngavho.

Musi vhenevho vharangaphanḓa vha vhurereli vha tshi khou ita tshimbevha tsha u vhulaha Yesu luvhi, vha swikelwa nga mueni. Zwi vha mangadzaho ndi uri ndi muṅwe wa vhaapostola vha Yesu nga dzawe, Yudasi Iskariote, we khae Sathane a dzhenisa muhumbulo muvhi wa u ambulula Muṋe wawe! Vho takala lungafhani musi Yudasi a tshi vhudzisa: “Ni ḓo mpha’ni arali nda mu kumedza zwanḓani zwaṋu?” Vha tenda vho takala u mu fha maseṱha a 30, mutengo wa phuli u ya nga mulanga wa Mulayo wa Mushe. U bva zwenezwo, Yudasi u ṱoḓa tshibuli tshavhuḓi tsha u ambulula Yesu khavho hu si na vhathu tsini.

Ḽa 13 Nisan ḽi thoma musi Ḽavhuraru ḽi tshi kovhela. Yesu o vhuya a tshi bva Yeriko nga Ḽavhuṱanu, ngauralo hovhu ndi vhusiku ha vhurathi na ha u fhedza vhune a vhu fhedza e Bethania. Ḓuvha ḽi tevhelaho, Ḽavhuṋa, hu fanela u itwa ndugiselelo dza u fhedza dza Paseka, ine ya thoma ḽi tshi tou kovhela. Ndi musi une ngwana ya Paseka ya fanela u ṱhavhiwa nahone ya ṱhaṱhiwa yoṱhe. Vha ḓo itela ngafhi vhuṱambo, nahone ndi vhafhio vhane vha ḓo ita dzindugiselelo?

Yesu ho ngo ṋekedza zwenezwo zwidodombedzwa, khamusi u itela uri Yudasi a si vhudze vhotshifhe vhahulu uri vha fare Yesu tshifhingani tsha vhuṱambo ha Paseka. Fhedzi zwino, khamusi musi ḽi tshi fhefha nga Ḽavhuṋa, nga u ṱavhanya Yesu u ruma Petro na Yohane vhe Bethania, u ri: “Tshimbilani ni yo ri lugisela ngwana ya Paseka, ri ḽe.”

Vha a vhudzisa: “U funa ri tshi i lugisa ngafhi?”

Yesu u a ṱalutshedza: “Hu ḓo ri ni tshi dzhena muḓini, na ṱangana na muthu o hwalaho mvuvhelo ya maḓi; ni mu tevhele ni ye nḓuni iné a ḓo dzhena khayo’; ni ambe na muṋe wa nnḓu ni ri: Mufunzi u ri nnḓu i ngafhi iné nda ḓo ḽa Paseka khayo’ na vhafunziwa vhanga? U ḓo ni sumbedza nnḓu khulu yo adziwaho maalo. Henefho ni lugise.”

A zwi timatimisi uri muṋe wa nnḓu ndi mufunziwa wa Yesu we khamusi a lavhelela khumbelo ya Yesu ya u shumisa nnḓu yawe kha hetshi tshiitea tsho khetheaho. Naho zwo ralo, musi Petro na Yohane vha tshi swika Yerusalema, vha wana zwoṱhe zwi nga nḓila ye Yesu a dzula o amba ngayo. Ngauralo vhuvhili havho vha vhona uri ngwana yo luga na uri ndugiselelo dziṅwe dzoṱhe dzo itwa u itela ṱhoḓea dza vha 13 vhane vha ḓo vha hone Pasekani, Yesu na vhaapostola vhawe vha 12. Mateo 26:1-5, 14-19; Marko 14:1, 2, 10-16; Luka 22:1-13; Ekisodo 21:32.

▪ Zwi vhonala uri Yesu u ita mini nga Ḽavhuraru, nahone ndi ngani?

▪ Ndi muṱangano wa mini wo farwaho muḓini wa tshifhe muhulu, nahone ndi ngani Yudasi a tshi dalela vharangaphanḓa vha vhurereli?

▪ Ndi vhonnyi vhane Yesu a vha ruma Yerusalema nga Ḽavhuṋa, nahone uri vha ite mini?

▪ Vhenevha vho rumiwaho vha wana mini zwine zwa dovha zwa dzumbulula maanḓa a Yesu a vhuṱolo?