Ndima Ya 121

Phanḓa ha Magota, Nga Murahu A Iswa ha Pilato

ḒUVHA ḽi vho tsha. Petro o no landula Yesu lwa vhuraru, nahone miraḓo ya Magota yo no fhedza mulingo wayo wa u goḓa nahone ya balangana. Naho zwo ralo, nga u ṱavhanya musi ḽi tshi tou vha maḓautsha a Ḽavhuṱanu, vha a kuvhangana hafhu, zwino holoni yavho ya Magota. Ndivho yavho hu nga kha ḓi vha hu u ṱoḓa u ita uri tsengo ya vhusiku i vhe mulayoni. Musi Yesu a tshi ḓiswa phanḓa havho, vha amba samusi vho zwi amba vhukatini ha vhusiku: “Ri vhudze arali U Kristo.”

Yesu u a fhindula: “Ndá ni vhudza, a ni nga tendi; Ndá ni vhudzisa, a ni fhinduli tshithu.” Naho zwo ralo, nga tshivhindi Yesu u amba zwine a vha zwone, a tshi ri: “Ndi zwone zwiné Murwa-muthu zwino a vho ḓo ya u dzula thungo ya tshanḓa tsha u ḽa tsha maanḓa a Mudzimu.”

Vhoṱhe vha ṱoḓa u ḓivha: “Naa U murwa wa Mudzimu?”

Yesu u a fhindula: “No bula, ngauri ndi nṋe!”

Kha havha vhanna vho ḓiimiselaho u vhulaha, heyi phindulo yo eḓana. Vha i dzhia sa samba. Vha vhudzisa vha ri: “Ri kha ḓi ṱoḓela’ni vhuṱanzi. Ro zwi pfa riṋe vhaṋe zwi tshi bva mulomoni wawe.” Ngauralo vha vhofha Yesu, vha mu ṱuwisa, nahone vha mu isa ha muvhusi wa Roma Pontio Pilato.

Yudasi, muambululi wa Yesu, o vha a tshi khou vhona zwine zwa khou itea. Musi a tshi vhona uri Yesu o sandiwa, u a ḓisola. Ngauralo u ya ha vhotshifhe vhahulu na vhahulwane u humisela maseṱha a 30, a tshi ṱalutshedza uri: “Ndo tshinya; ndo fheṱa malofha a sí na mulandu.”

Vha sa mu pfeli vhuṱungu vha fhindula vha ri: “Ri ḓo zwi ri’ni? Ndi mafhungo au.” Ngauralo Yudasi a laṱa maseṱha nḓuni khethwa nahone a ṱuwa nahone a lingedza u ḓihunga. Naho zwo ralo, zwi vhonala uri davhi ḽine Yudasi a vhofhelela thambo khaḽo ḽi a vunḓea, nahone muvhili wawe u wela matomboni ngei fhasi, he wa fhanduwa nga vhukati.

Vhotshifhe vhahulu a vha na vhuṱanzi uri vha nga ita mini nga maseṱha. Vha fhedza nga uri: “A zwo ngo fanela u ṋewa Mudzimu, ngauri zwo renga malofha.” Ngauralo, vho no langana nga tshavho, vha renga nga aḽa maseṱha tsimu ya muvhumbi wa dzikhali uri vha swiṱe vhaeni khayo. Nga zwenezwo tsimu ya vhidzwa u pfi “Tsimu ya Malofha.”

Hu tshee nga matsheloni vhukuma musi Yesu a tshi iswa nḓuni ya muvhusi. Fhedzi Vhayuda vhe vha mu fheletshedza vha hana u dzhena ngauri vha tenda uri honoho u vha tsini na Vhannḓa hu ḓo vha shata tshika. Ngauralo uri a kone u amba navho, Pilato u bvela nnḓa. U a vhudzisa: “Uyu muthu ni ḓa u mu hwelela mulandu-ḓe?”

Vha fhindula vha ri: “Ngavhe e si mutshinyi, ndi misi rí so ngo mu ḓisa kha iwe.”

Pilato a tshi shavha u ḓihwesa mulandu, a fhindula a ri: “Mu dzhieni-ha vhoinwi, ni mu sengise nga mulayo waṋu.”

Vhayuda vha tshi sumbedza u ḓiimisela havho u vhulaha vha hwelela vha ri: “Huufha ró dzivhiswa u vhulaha muthu!” I ngoho, arali vho vha vho vhulaha Yesu vhukati ha Vhuṱambo ha Paseka, zwi vhonala uri zwo vha zwi tshi ḓo vusa khakhathi vhathuni, samusi vhanzhi vha tshi dzhiela Yesu nṱha. Fhedzi arali vha nga ita uri Vharoma vha mu vhulahe nga mulandu wa zwa politiki, hezwi zwi ḓo ita uri vhuḓifhinduleli havho vhu si vhonale kha vhathu.

Ngauralo vharangaphanḓa vha vhurereli, vha sa khou bula tsengo yavho ya u thoma musi vha tshi ḓo sasaladza Yesu sa musemi, zwino vha ṋea milandu yo fhamba-fhambanaho. Vha mu pomoka nga mulandu u re na masia mararu vha ri: “Uyu ri mu wana [1] a tshi fhiriṱanya vhathu vhashu; [2] u dzivhisa u bvisela khosi muthelo; [3] u ri: Ndi nṋe Kristo, ndi khosi.”

Ndi mulandu wa uri Yesu u ḓiita khosi une wa kwama Pilato. Nga zwenezwo, a dzhena nḓuni hafhu, a vhidza Yesu, nahone u a mu vhudzisa: “Naa U khosi ya Vha-Yuda?” Nga maṅwe maipfi, naa wo vunḓa mulayo nga u ḓiita khosi i lwisanaho na Kesare?

Yesu u ṱoḓou ḓivha uri ndi zwingafhani zwine Pilato a vho zwi ḓivha nga hae, ngauralo a mu vhudzisa a ri: “Ḽiné wa amba ndi ḽau naa? Kana ndi zwe vhaṅwe vha ṋyamba ha iwe?”

Pilato u sumbedza u mu nyadza nahone e na lutamo lwa u ḓivha dzimbuno. U a aravha: “Kani ndi Mu-Yuda nṋe? Ndi vhathu vha-hau na vho-tshifhé vhahulu vha U kumedzaho nṋe. Wo ita’ni?”

Yesu ha vhuyi a lingedza u tinya heyi khani, ine ya vha ya vhuhosi. A zwi timatimisi uri phindulo ine Yesu zwino a i ṋea i akhamadza Pilato. Luka 22:66–23:3; Mateo 27:1-11; Marko 15:1; Yohane 18:28-35; Mishumo 1:16-20.

▪ Magota vho kuvhangana hafhu nga matsheloni vhe na ndivho ifhio?

▪ Yudasi u fa nga nḓila-ḓe, nahone ho itwa mini nga maseṱha a 30?

▪ Nṱhani ha u mu vhulaha vhone vhaṋe, ndi ngani Vhayuda vha tshi ṱoḓa Vharoma vha tshi vhulaha Yesu?

▪ Ndi milandu ifhio ine Vhayuda vha i itela Yesu?