Ndima Ya 132

Thungo ya Tshanḓa tsha U Ḽa tsha Mudzimu

U SHULULWA ha muyamukhethwa nga Pentekoste ndi vhuṱanzi ha uri Yesu o vhuyelela ṱaḓulu. Bono ḽe ḽa ṋewa mufunziwa Stefano nga murahunyana ḽi dovha ḽa sumbedza uri O swika henengei. Musi Stefano a sa athu u kanḓwa nga matombo nge a ṱanziela nga u fulufhedzea, o huwelela: “Vhonani, ndi vhona ḽiṱaḓulu ḽó vulea, Murwa-muthu ó ima nga thungo ya tshanḓa tsha u ḽa tsha Mudzimu!”

Musi e nga thungo ya tshanḓa tsha u ḽa tsha Mudzimu, Yesu u lindela ndaela i bvaho ha Khotsi awe i no ri: “Vhusa vhukati ha maswina au.” Fhedzi nga tshenetsho tshifhinga, u swikela a tshi dzhiela maswina awe vhukando, Yesu u ita mini? U a vhusa vhafunziwa vhawe vho ḓodzwaho, a tshi vha endedza kha mushumo wavho wa u huwelela na u vha lugisela, uri musi vho no vuwa vhafuni, vha vhe mahosi nae Muvhusoni wa Khotsi awe.

Sa tsumbo, Yesu u khetha Saulo (nga murahu o ḓo ḓivhea zwavhuḓi nga dzina ḽawe ḽa Tshiroma e Paulo) u ranga phanḓa nga mafulufulu mushumo wa u ita vhafunziwa kha maṅwe mashango. Saulo u swela Mulayo wa Mudzimu, fhedzi u kha ḓi fhuriwa nga vharangaphanḓa vha vhurereli ha Vhayuda. Nga zwenezwo, Saulo ha takaleli u vhulahwa ha Stefano fhedzi, fhedzi u ya Damaseko o ṋewa thendelo nga Kayafa tshifhe muhulu ya u vhofha munna na musadzi naho vhe vhafhio vhane a vha wana vhane vha vha vhatevheli vha Yesu a vha isa Yerusalema. Naho zwo ralo, musi Saulo e nḓilani, nga kathihi fhedzi u penyelwa nga tshedza tshihulu nahone a wela fhasi.

Ipfi ḽi bvaho fhethu hu sa vhonali ḽi a vhudzisa: “Saulo, Saulo, U ntovholela’ni?” Saulo u a vhudzisa: “Murena, U nnyi?”

Phindulo i ri: “Ndi nṋe Yesu ané wa mu tovhola.”

Saulo, we a vha o swingiswa nga tshedza tsha vhuṱolo, Yesu u mu vhudza uri a dzhene Damaseko nahone a lindele ndaela. Zwenezwo Yesu a vhonala nga bono kha Anania, muṅwe wa vhafunziwa vhawe. Malugana na Saulo, Yesu u vhudza Anania uri: “Uyo muthu ndi mudzio we nda ḓi-nangela wa u isa dzina ḽanga phanḓa ha vha nnḓa, na phanḓa ha mahosi na phanḓa ha vhana vha Isiraele.”

I ngoho, nga thuso ya Yesu, Saulo (ane zwino a vho ḓivhiwa e Paulo) na vhaṅwe vhaevangeli vha na mvelaphanḓa khulwane kha mushumo wavho wa u huwelela na u funza. Zwi re zwone ndi uri miṅwaha i ṱoḓaho u vha 25 nga murahu ha musi Yesu o no vhonala khae nḓilani ya u ya Damaseko, Paulo u ṅwala uri “mafhungo-maḓifha” o “huwelelwa kha zwivhumbwa zwoṱhe zwa tsini ha ḽiṱaḓulu.”

Nga murahu ha musi ho no fhela miṅwaha minzhi vhukuma, Yesu u ṋekedza Yohane, muapostola wawe ane a mu funesa mabono nga u tevhekana hao. A tshi shumisa enea mabono ane Yohane a a ṱalusa buguni ya Bivhili ya Ndzumbululo, zwi re zwone ndi uri ene u tshila u vhuya u swika a tshi vhona Yesu a tshi vhuya e maanḓani a Muvhuso. Yohane u amba uri ‘o vha e muyani’ musi a tshi iswa phanḓa tshifhingani tsha “ḓuvha ḽa Murena.” Iḽi “ḓuvha” ndi ḽifhio?

U guda nga vhulondi vhuporofita ha Bivhili, u katela na vhuporofita ha Yesu malugana na maḓuvha a vhufhelo, zwi dzumbulula uri “ḓuvha ḽa Murena” ḽo thoma nga ṅwaha wa 1914 wo vhumbaho ḓivhazwakale, ee, kha wonoyu murafho! Ngauralo ho vha hu nga 1914 he Yesu a vhuya a sa vhonali, a sa koni u vhonwa nga vhathu vhoṱhe nahone hu tshi tou vha vhashumeli vhawe fhedzi vha fulufhedzeaho vha ṱhogomelaho u vhuya hawe. Nga wonoyo ṅwaha Yehova o ṋea Yesu ndaela ya u vhusa vhukati ha maswina awe!

A tshi thetshelesa ndaela ya Khotsi awe, Yesu o kunakisa maṱaḓulu, nga u shakulela Sathane na madimoni awe kha ḽifhasi. Musi o no vhona izwi zwi tshi bvelela kha bono, Yohane u pfa ipfi ḽi bvaho ṱaḓulu ḽi tshi huwelela: “Zwino vhutshidzi na maanḓa na vhuhosi ha Mudzimu washu zwo bvelela na nungo dza Muḓodzwa wawe.” Ee, nga 1914 Kristo o thoma u vhusa sa Khosi!

Ndi mafhungo maḓifha lungafhani kha vhagwadameli vha Yehova vha re ṱaḓulu! Vha a khadeledzwa: “Takalani-ha inwi maṱaḓulu na vho dzulaho hone!” Fhedzi vhuimo ha vha re kha ḽifhasi ho tou ita hani? Ipfi ḽi bvaho ṱaḓulu ḽi bvela phanḓa: “Yawee! ḽifhasi na lwanzhe! Ngauri Diabolo o tsela henengeo ha vho inwi e na mbiti khulu, a tshi zwi ḓivha zwauri o salelwa nga tshifhinga tshiṱuku.”

Zwino ri kha tshenetsho tshifhinga tshiṱuku. Zwino vhathu vha khou khethekanyelwa u dzhena shangoni ḽiswa ḽa Mudzimu kana u fheliswa. Ngoho ndi ya uri hune na ḓo fhelela hone zwi ḓo ya nga uri zwino ni khou aravha hani kha mafhungo maḓifha a Muvhuso wa Mudzimu ane a khou huwelelwa ḽifhasi ḽoṱhe nga fhasi ha vhulivhisi ha Kristo.

Musi u khethekanywa ha vhathu ho no fhela, Yesu Kristo u ḓo shuma sa Mushumi wa Mudzimu u itela u fhelisa ḽifhasi ḽa maitele oṱhe a zwithu a Sathane na vhoṱhe vhane vha a tikedza. Yesu u ḓo khunyeledza hohu u bviswa ha vhuvhi hoṱhe nndwani ine Bivhilini ya vhidzwa Haramagedo, kana Aramagedo. Nga murahu, Yesu, Muthu wa bvumo kha fhethu hoṱhe a re tsini na Yehova Mudzimu nga ene muṋe, u ḓo fara Sathane na madimoni awe nahone a vha valela miṅwaha ya tshigidi “mugodini,” ndi uri vhuimoni ha u nga vho fa vha sa iti tshithu. Mishumo 7:55-60; 8:1-3; 9:1-19; 16:6-10; Psalme ya 110:1, 2; Vha-Heberu 10:12, 13; 1 Petro 3:22; Luka 22:28-30; Vha-Kolosa 1:13, 23; Ndzumbululo 1:1, 10; 12:7-12; 16:14-16; 20:1-3; Mateo 24:14; 25:31-33.

▪ Musi Yesu o no gonya ṱaḓulu, u dzula ngafhi, nahone u lindela mini?

▪ Yesu u vhusa vhafhio musi o no gonyela ṱaḓulu, nahone vhuvhusi hawe vhu vhonala hani?

▪ “Ḓuvha ḽa Murena” ḽo thoma lini, nahone ho itea mini mathomoni aḽo?

▪ Ndi mushumo ufhio wa u khethekanya une wa khou bvela phanḓa ṋamusi une wa kwama muṅwe na muṅwe washu nga dzawe, nahone u khethekanywa hu khou itwa kha mutheo ufhio?

▪ Musi mushumo wa u khethekanya wo no fhela, ndi zwiitea zwifhio zwine zwa ḓo tevhela?