Ndima Ya 100

Tshifanyiso tsha Dzibonndo

KHAMUSI Yesu u tshee nḓuni ya Saxeo, he a ima hone musi e nḓilani i yaho Yerusalema. Vhafunziwa vhawe vha tenda uri musi vha tshi swika Yerusalema, u ḓo ḓivhadza uri ndi ene Messia nahone a imisa Muvhuso wawe. U itela u khakhulula haya mahumbulele na u sumbedza uri Muvhuso u tshee kule na u ḓa, Yesu u ita tshifanyiso.

U a anetshela: “Muṅwe muthu wa khosi o vhuya a ṱuwa a ya shangoni ḽa kule, a tshi ri ndi yo dzhena vhuhosi ha hone ndi kone u ḓo vhuya.” Yesu ndi ene “muthu wa khosi,” nahone ṱaḓulu ndi “shangoni ḽa kule.” Musi Yesu a tshi swika henengei, Khotsi awe u ḓo mu ṋea maanḓa a vhuhosi.

Naho zwo ralo, a sa athu u ṱuwa, onoyo muthu wa khosi u vhidza vhalanda vha fumi nahone a ṋea muṅwe na muṅwe bonndo, a ri: “Shumani ngadzo’, ndi ḓo vhuya.” Vhalanda vha fumi kha u ḓadzea ha u thoma vha imela vhafunziwa vha u thoma vha Yesu. Nga nḓila khulwane, vha fanyisela vhoṱhe vhane vha vha na tshilavhelelwa tsha u vha maḽaifa nae Muvhusoni wa ṱaḓulu.

Dzibonndo ndi zwipiḓa zwa tshelede zwi re na ndeme, iṅwe na iṅwe i ṱoḓaho u vha muholo wa miṅwedzi miraru wa mushumi wa masimuni. Fhedzi dzibonndo dzi imela mini? Nahone avha vhalanda vha ḓo ita bindu-ḓe ngadzo?

Dzibonndo dzi imela thundu dzine vhafunziwa vho ḓodzwaho vha nga dzi shumisa kha u bveledza vhaḽaifa vhanzhi vha Muvhuso wa ṱaḓulu u swikela Yesu a tshi vhuya sa Khosi Muvhusoni wo fulufhedziswaho. Musi o no vuswa vhafuni na musi o no vhonala kha vhafunziwa vhawe, o vha ṋea bonndo dza pfanyisedzo dza u ita vhafunziwa vho engedzeaho nahone nga zwenezwo vha tshi engedza tshigwada tsha Muvhuso wa ṱaḓulu.

Yesu u a bvela phanḓa: “Vhalanda [Vhadzulapo] vhone vho vha vha sa mu funi [hoyu muthu wa khosi]; vha ruma vhaḓinḓa vha mu tevhela, vha yo ri: A ri funi U tshi ri vhusa.” Vhadzulapo ndi Vhaisiraele, kana Vhayuda, hu sa katelwi na vhafunziwa vhawe. Musi Yesu o no ya ṱaḓulu, havha Vhayuda nga u tovhola vhafunziwa vhawe vho sumbedza uri a vha ṱoḓi a tshi vha khosi yavho. Nga heyi nḓila vho vha vha tshi khou ita u nga vhadzulapo vhe vha rumela vhaḓinḓa.

Vhalanda vha fumi vha shumisa hani bonndo dzavho? Yesu u a ṱalutshedza: “Ha ri musi a tshi vhuya, ó no dzhena vhuhosi ha ḽiḽa shango ḽiṅwe, a vhidza vhaḽa vhalanda vhe a vha ṋea mali, uri vha mu vhudze zwe vha shuma ngayo’. Ha ḓa wa u thoma a ri: Murena, bonndo yau yo bindula bonndo dzi ná fumi. Khosi ya amba nae’ ya ri: Ahee, mulanda wanga wavhuḓi! Wo fulufhedzea kha zwithu zwiṱuku; U ḓo vhusa miḓi i ná fumi. Wa vhuvhili a ḓa a ri: Murena, bonndo yau yo bindula bonndo ṱhanu. Na uyo a amba nae’ a ri: Iwe-ha U ḓo vhusa miḓi miṱanu.”

Mulanda a re na bonndo dza fumi u fanyisela tshigwada tsha vhafunziwa u bva nga Pentekoste ya 33 C.E. u swikela zwino u katela na vhaapostola. Mulanda we a bindulisa nga bonndo ṱhanu na ene u imela tshenetsho tshigwada vhukatini ha tshenetsho tshifhinga, tshine u ya nga zwibuli zwine vha vha nazwo na vhukoni havho, vha engedza thundu dza khosi kha ḽifhasi. Zwenezwo zwigwada zwivhili zwi funza mafhungo-maḓifha nga u fhisea, nahone nga zwenezwo, vhanzhi vhane vha vha na mbilu dzavhuḓi vha vha Vhakriste. Vha ṱahe vha vhenevho vhalanda vho bvelela zwavhuḓi kha bindu ḽavho nahone vha bindulisa zwe vha vha vhe nazwo.

Yesu u bvela phanḓa: “Wa vhuraru a ḓa a ri: Murena, vhona bonndo yau ngei. Ndo vha ndo i putela ṅwendani; ndo vha ndi tshi U ofha, ngauri U muthu wa vhuhali; U dzhia he U si vhee; U kaṋa he U si zwale. Khosi ya mbo ri: U ḓo wana mulandu nga zwe mulomo wau wa amba, mulanda muvhi-ḓiwe! Wo zwi ḓivha uri ndi muthu wa vhuhali, ané nda dzhia he ndi si vhee, ané nda kaṋa he ndi si zwale. Wo kundwa nga’ni u isa mali yanga ha vhadzia-u-bindulisa mali? uri musi ndi tshi vhuya ndi swiswulule na zwe ya bindula. A vhudza vhe vha vha vho ima henefho a ri: Mu dzhieleni iyo bonndo ni i fhe uḽa wa bonndo dza fumi.”

Kha mulanda muvhi, u xelelwa nga bonndo ya pfanyisedzo zwi amba u xelelwa nga vhudzulo hawe ngei Muvhusoni wa ṱaḓulu. Ee, u xelelwa nga ndugelo ya u vhusa, zwa nga u vhusa miḓi ya fumi kana miḓi miṱanu. Ṱhogomelani hafhu uri mulanda ha ambiwi uri ndi muvhi nge a ita vhuvhi, fhedzi nṱhani hazwo nge a kundwa u shuma u itela u engedza lupfumo lwa muvhuso wa muṋe wawe.

Musi bonndo ya mulanda muvhi i tshi ṋewa mulanda wa u thoma, vhaṅwe vha a hanedza: “Murena, huufha e na fumi ḽa bonndo?” Naho zwo ralo, Yesu u a fhindula: “O no vhaho nazwo’, u ḓo ṋewa; a sí na, u ḓo dzhielwa na zwiné a vha nazwo’. Hone aḽa maswina anga, e a ri: Ri hana u vhuswa nga iwe, a dzhieni ni a vhulahe ndi tshi zwi vhona.” Luka 19:11-27; Mateo 28:19, 20.

▪ Ndi mini tshi itaho uri Yesu a ite tshifanyiso nga ha dzibonndo?

▪ Muthu wa khosi ndi nnyi, nahone shango ḽine a ya khaḽo ndi ḽifhio?

▪ Vhalanda ndi vhonnyi, nahone ndi mini tshine tsha imelwa nga dzibonndo?

▪ Vhadzulapo ndi vhafhio, nahone vha sumbedza hani vengo ḽavho?

▪ Ndi ngani muṅwe mulanda a tshi pfi ndi muvhi, nahone u xelelwa hawe nga bonndo zwi amba mini?