Ndima Ya 107

Tshifanyiso tsha Vhuṱambo ha Mbingano

NGA zwifanyiso zwivhili, Yesu o bvukulula vha maṅwalo na vhotshifhe vhahulwane, nahone vha ṱoḓa u mu vhulaha. Fhedzi Yesu ha athu u fhedza ngavho. U bvela phanḓa u vha vhudza hafhu tshiṅwe tshifanyiso, nga uri:

“Muvhuso wa ṱaḓulu u fana na muthu wa khosi, we a itela murwa wawe vhuṱambo ha u vhinga. Ene a ruma vhaḓinḓa vhawe uri vha yo vhidza vho vhidzwaho, uri vha ḓe vhuṱamboni; vhone vha hana u ḓa.”

Yehova Mudzimu ndi Khosi ine ya lugiselela Murwa wayo, Yesu Kristo, vhuṱambo ha mbingano. Mafheleloni, muselwa wa vhatevheli vho ḓodzwaho vha 144 000 u ḓo ṱangana na Yesu ṱaḓulu. Vhalanda vha Khosi ndi vhathu vha Isiraele, vhe, nga u ḓiswa kha mulanga wa Mulayo nga 1513 B.C.E., vha wana tshibuli tsha u vha ‘muvhuso wa vho-tshifhe.’ Nga zwenezwo, nga tshenetsho tshifhinga, mathomoni vho engedzelwa honoho u rambelwa vhuṱambo ha mbingano.

Naho zwo ralo, u vhidzwa ha u thoma ha vho rambiwaho a ho ngo ḓivhadziwa u swika nga tshilimo tsha 29 C.E., musi Yesu na vhafunziwa vhawe (vhaḓinḓa vha khosi) vha tshi thoma mushumo wavho wa u huwelela Muvhuso. Fhedzi Vhaisiraele vha ṋama vhe vha wana heyi mbidzo nga vhaḓinḓa u bva nga 29 C.E. u swika nga 33 C.E. a vho ngo ḓa. Ngauralo Mudzimu o ṋea lushaka lwa vho rambiwaho tshiṅwe tshibuli, samusi Yesu a tshi anetshela:

“A dovha a ruma vhaṅwe vhaḓinḓa a ri: Vhudzani vho vhidzwaho ni ri: Zwiḽiwa zwanga ndo zwi lugisa, dziphulu dzanga na zwo noniswaho zwanga zwo ṱhavhiwa; zwoṱhe zwo lugiswa; iḓani vhuṱamboni ha u vhinga!” Heyi mbidzo ya vhuvhili ya u fhedza ya vho vhidzwaho yo thoma nga Pentekoste ya 33 C.E., musi muyamukhethwa u tshi shululelwa kha vhafunziwa vha Yesu. Heyi mbidzo yo bvela phanḓa u swika nga 36 C.E.

Naho zwo ralo, vhunzhi ha Vhaisiraele na vhone vho hana heyi mbidzo. Yesu u ri: “Vhone vha si zwi londe, vha ṱuwa, muṅwe a ya tsimuni yawe, muṅwe a ya mitengoni yawe.” Yesu u a bvela phanḓa: “Khosi ya sinyuwa; a ruma dzimmbi dzawe, dza yo vhulaha dziḽa dziphondi, a fhisa na muḓi wavho.” Hezwi zwo bvelela nga 70 C.E., musi Yerusalema u tshi wiswa nga Vharoma, nahone dzenedzo dziphondi dzo vhulahwa.

Nga zwenezwo Yesu u ṱalutshedza zwe zwa bvelela nga tshenetsho tshifhinga: “Ndi hone [khosi] a tshi vhudza vhaḓinḓa vhawe a ri: Vhuṱambo hanga muga ho lugiswa, vhavhidziwa vha ro vha vha songo fanelwa. Tshimbilani-ha ni ye mafhandeni a dzinḓila, ni vhidze vhenevho vhané na vha wana, vha ḓe vhaṱamboni.” Vhaḓinḓa vha ita nga u ralo, nahone “nnḓu ya vhuṱambo ya ḓala vho dzulaho.”

Hoyu mushumo wa u kuvhanganya vhaeni dzinḓilani nnḓa ha muḓi wa vho rambiwaho wo thoma nga 36 C.E. Mulangammbi wa Muroma Koronelio na vha muṱani wawe vho vha vhone vha u thoma u kuvhanganyiwa kha vha si Vhayuda vha songo rubaho. U kuvhanganyiwa ha vhenevha vha si Vhayuda, vhane vhoṱhe vha vha vha dzhielaho vhudzulo vhe mathomoni vha hana yeneyo mbidzo, ho bvela phanḓa u swika kha ḓana ḽa vhu-20 ḽa miṅwaha.

Ndi vhukatini ha ḓana ḽa vhu-20 ḽa miṅwaha he nnḓu ya vhuṱambo ha mbingano ya ḓala. Yesu u anetshela zwe zwa bvelela nga tshenetsho tshifhinga, nga uri: “Khosi a tshi dzhena u yo lavhelesa vho dzulaho, ya wana muthu hone, we a vha a songo ambara tshiambaro tsha vhuṱambo. A amba nae’ a ri: Wahashu! wo dzhena hani ngeno, Ú si na tshiambaro tsha vhuṱambo? Ene a fhumula. Ndi hone khosi i tshi amba na vhaḓinḓa ya ri: Mu vhofheni milenzhe na zwanḓa, ni mu kudze swiswini ḽa nnḓa-nnḓa, huné ha ḓo vha na zwililo na u shenganya maṋo.”

Muthu a si na tshiambaro tsha vhuṱambo u fanyisela Vhakriste vha khole-khole vha ḽa Vhudzhagane. Mudzimu ho ngo vhuya a vha ṱhogomela sa vha re na luswayo lwo fanelaho sa Vhaisiraele vha muya. Mudzimu ho ngo vhuya a vha ḓodza nga muyamukhethwa sa vha-ḽa-ifa vha Muvhuso. Ngauralo vha kudzelwa nnḓa swiswini hune vha ḓo lozwelwa hone.

Yesu u phetha tshifanyiso tshawe nga uri: “Ngauri vhavhidziwa ndi vhanzhi, vhanangiwa a vha gathi.” Ee, ho vha hu na vhanzhi vho rambiwaho kha lushaka lwa Isiraele uri vha vhe miraḓo ya muselwa wa Kristo, fhedzi ndi Vhaisiraele vha ṋama vha si gathi fhedzi vho nangiwaho. Vhunzhi ha vhaeni vha 144 000 vhe vha ṱanganedza malamba a u tshila ṱaḓulu vha sumbedza vhe si Vhaisiraele. Mateo 22:1-14; Ekisodo 19:1-6; Ndzumbululo 14:1-3.

▪ Ndi vhafhio vhe vha thoma u rambelwa vhuṱamboni ha mbingano, nahone vho rambiwa lini?

▪ Mbidzo yo ya lini lwa u thoma kha vho rambiwaho, nahone ndi vhonnyi vhaḓinḓa vhe vha shumiswa u i phaḓaladza?

▪ Mbidzo ya vhuvhili yo itwa lini, nahone ndi vhonnyi vhe vha rambiwa nga murahu?

▪ Ndi vhonnyi vhane vha fanyiselwa nga muthu a si na tshiambaro tsha vhuṱambo?

▪ Ndi vhonnyi vhanzhi vho vhidzwaho, na vha si gathi vho nangiwaho?