Ndima Ya 111

Tshiga tsha Maḓuvha a Vhufhelo

ZWINO ndi Ḽavhuvhili nga masiari. Musi Yesu o dzula Thavhani ya Miṱwari, o sedza ngei fhasi nḓuni khethwa, Petro, Andrea, Yakobo, na Yohane vha ḓa khae vhe vhoṱhe. Vha khou vhilaela nga nnḓu khethwa, samusi Yesu a tshi kha ḓi bva u dzula o amba uri a hu nga sali tombo ḽi kha ḽiṅwe.

Fhedzi zwi vhonala vhe na zwinzhi mihumbuloni yavho musi vha tshi ḓa ha Yesu. Vhegeni dzi si nngana dzo fhiraho, o amba nga ha “u vha hone” hawe, tshifhinga tshine “Murwa-muthu a tshi vhó ḓo vhonala” ngatsho. Nahone u thomani o vha vhudza nga ha ‘u fhela ha maitele a zwithu.’ Nga zwenezwo vhaapostola vha ṱoḓa u ḓivha vhukuma.

Vha ri: “Ri vhudze; izwi zwithu zwi ḓo itea lini [u fheliswa ha Yerusalema na nnḓu khethwa yawo]; nahone tshiga tsha u vha hone hau na vhufhelo ha maitele a zwithu tshi ḓo vha tshifhio?” (NW) Zwi re zwone ndi uri mbudziso yavho ndi ya masia mararu. Ya u thoma, vha ṱoḓa u ḓivha nga ha vhufhelo ha Yerusalema na nnḓu khethwa yawo, na malugana na u vha hone ha Yesu maanḓani a Muvhuso, nahone mafheleloni nga ha vhufhelo ha maitele oṱhe a zwithu.

Nga phindulo yawe ndapfu, Yesu u fhindula zwipiḓa zwoṱhe zwiraru zwa heyi mbudziso. U ṋea tshiga tshine tsha sumbedza uri maitele a Tshiyuda a zwithu a ḓo fhela lini; fhedzi u ṋea zwinzhi. U dovha a ṋea tshiga tshine tsha ḓo fhaṱusa vhane vha ḓo vha vhafunziwa vhawe u itela uri vha ḓivhe zwa uri vha khou tshila tshifhingani tsha u vha hone hawe na u vha tsini ha vhufhelo ha maitele oṱhe a zwithu.

Musi miṅwaha i tshi ḓi ya, vhaapostola vha vhona u ḓadzea ha vhuporofita ha Yesu. Ee, zwithu zwe a dzula o amba zwi thoma u itea misini yavho. Nga zwenezwo, Vhakriste vhane vha kha ḓi tshila nga murahu ha miṅwaha ya 37, nga 70 C.E., a vha welwi vha sa zwi ḓivhi nga vhufhelo ha maitele a zwithu a Tshiyuda na nnḓu khethwa yayo.

Naho zwo ralo, u vha hone ha Kristo na vhufhelo ha maitele a zwithu a zwi itei nga 70 C.E. U vha hone hawe maanḓani a Muvhuso zwi itea ho no vha kale. Fhedzi lini? U ṱhogomela vhuporofita ha Yesu zwi a zwi dzumbulula.

Yesu u dzula o amba uri hu ḓo vha na “dzinndwa na mikosi ya nndwa.” U ri: “Lushaka lu ḓo vutshela lushaka,” nahone zwiḽiwa zwi ḓo ṱahela, hu ḓo vha na midzinginyo, na malwadze. Vhafunziwa vhawe vha ḓo vhengiwa vha vhulahwa. Hu ḓo vha na vhaporofita vha mazwifhi nahone vha xedza vhanzhi. Vhuvhi vhu ḓo anda, nahone lufuno lwa vhanzhi lu ḓo fhola. Nga tshenetsho tshifhinga, mafhungo maḓifha a Muvhuso wa Mudzimu a ḓo huwelelwa sa vhuṱanzi kha tshaka dzoṱhe.

Naho vhuporofita ha Yesu vhu tshi ḓadzea nga nḓila ṱhuku nga phanḓa ha u fheliswa ha Yerusalema nga 70 C.E., u ḓadzea huhulwane haho hu itea vhukatini ha u vha hone hawe na vhufheloni ha maitele a zwithu. U ṱolisisa ha vhuronwane zwiitea zwa shango u bva nga 1914 zwi dzumbulula uri vhuporofita vhuhulwane ha Yesu ho vha vhu tshi khou ḓadzea nga nḓila khulwane u bva nga wonoyo ṅwaha.

Tshiṅwe tshipiḓa tsha tshiga tshe Yesu a tshi ṋea ndi u vha hone ha “zwi nengisaho zwa phusuphusu.” Nga 66 C.E. hezwi zwi nengisaho zwo bvelela nga tshivhumbeo tsha “mmbi” ya Roma ye ya tanga Yerusalema nahone ya nyadza luvhondo lwa nnḓu khethwa. “Zwi nengisaho” zwo ima hune zwa si fanele u ima hone.

Kha u ḓadzea huhulwane ha tshiga, zwi nengisaho ndi Ndangano ya Dzitshaka na mutevheli wayo, Yuno. Heyi ndangulo ya mulalo wa shango, ḽa Vhudzhagane ḽi i dzhia sa i dzhiaho vhudzulo ha Muvhuso wa Mudzimu. Zwi nengisa lungafhani! Nga zwenezwo, nga u ya ha tshifhinga, mivhuso ya politiki i tshimbidzanaho na YUNO i ḓo vutshela ḽa Vhudzhagane (Yerusalema wa pfanyisedzo) nahone i ḓo ḽi fhelisa.

Nga zwenezwo Yesu u dzula o amba uri: “Hu ḓo vha na vhuṱungu vhuhulu, vhu sathu u vhoniwa tshee shango ḽa vha hone, u vhuya u swika zwino, huné hu si tsha ḓo dovha ha vha hone.” Samusi u fheliswa ha Yerusalema nga 70 C.E. vhukuma ho vha vhuṱungu vhuhulu, hu tshi vhigiwa uri ho vhulahwa vha dzimilioni, a si vhuṱungu vhuhulu vhu fhiraho ha Muḓalo wa Maḓi wa khungulu yoṱhe wa misini ya Naoxe. Ngauralo u ḓadzea huhulwane ha tshipiḓa tsha vhuporofita ha Yesu hu kha ḓi ḓo itea.

U Vha Na Tshivhindi Maḓuvhani a Vhufhelo

Musi Ḽavhuvhili, ḽa 11 Nisan, ḽi tshi vho kovhela, Yesu u bvela phanḓa u haseledza na vhaapostola vhawe malugana na tshiga tsha u vha hone hawe maanḓani a Muvhuso na vhufhelo ha maitele a zwithu. U vha sevha nga ha u tevhela Vhokristo vha mazwifhi. U amba uri hu ḓo itwa vhuḓidini, “zwi tshi itea hu khakhiswe na vho nangiwaho.” Fhedzi, u fana na magoni a vhonaho kule, havha vho nangiwaho vha ḓo kuvhangana hune ha vha na zwiḽiwa zwa muya zwa vhukuma, ndi uri kha Kristo wa ngoho musi a tshi vhonala. A vha nga ḓo xedzwa nahone vha kuvhanganywa na Vhokristo vha mazwifhi.

Vhokristo vha mazwifhi vha a kona u vha hone nga nḓila i vhonalaho. Zwo fhambanaho na zwenezwo, u vha hone ha Yesu hu ḓo vha hu sa vhonali. Hu ḓo itea nga tshifhinga tshi ofhisaho tsha ḓivhazwakale ya vhathu, samusi Yesu a tshi ri: “Ndi hone ḓuvha ḽi tshi ḓo swifhala, ṅwedzi wa litsha u vhonetshela.” Ee, heḽi ḽi ḓo vha ḽifhinga ḽa swiswi ḽihulu u bva tshee muthu a vha hone. Zwi ḓo nga ḓuvha ḽo swifhadzwa nga masiari, nahone zwa nga ṅwedzi a wo ngo vhonetshela vhusiku.

Yesu u bvela phanḓa: “Maanḓa a ḽiṱaḓulu a ḓo dzinginyea.” Nga zwenezwo u sumbedza uri maṱaḓulu a vhukuma a ḓo dzhia tshivhumbeo tshi ofhisaho. Maṱaḓulu ha nga ḓo sokou vha vhudzulo ha zwiṋoni, fhedzi a ḓo ḓala nga mabufho a nndwa, dzirokhethe, na zwiisa milaedza zwa tshikhalani. Nyofho na vhuvemu zwi ḓo fhira naho tshi tshini tshe tsha vhuya tsha tshenzhelwa kale kha ḓivhazwakale ya vhathu.

Nga zwenezwo, Yesu u amba uri “kha vhathu vha shango hu ḓo vha na u farakanea na u khakhelwa musi lwanzhe na lutsinga lwalwo zwi tshi bvuma. Vhathu vha ḓo femeleka nga nyofho na nga u dzula vhó lindela zwe zwa pfi zwi ḓo ḓa shangoni.” I ngoho, heḽi ḽifhinga ḽa swiswi ḽihulu ḽi sa athu u vha hone tshee muthu a vha hone ḽi ḓo isa kha tshifhinga tshine, sa zwine Yesu a ambisa zwone, hu ḓo vha na “lufayo lwa Murwa-muthu ṱaḓulu. Huno tshakha dzoṱhe dza ḽifhasi dzi ḓo lila.”

Fhedzi a si vhoṱhe vhane vha ḓo lila musi ‘Murwa-muthu a tshi ḓa e na maanḓa’ a u fhelisa maitele mavhi a zwithu. “Vhanangiwa” vha 144 000 vhane vha ḓo ṱanganela na Kristo Muvhusoni wawe wa ṱaḓulu, a vha nga lili, na khonani dzavho, dze Yesu u thomani a dzi vhidza uri ndi “dziṅwe nngu” dzawe. Hu sa londwi u tshila kha ḽifhinga ḽa swiswi ḽihulu kha ḓivhazwakale ya muthu, havha vha aravha khuthadzo ya Yesu: “Zwauralo zwi tshi thoma u vhonala, ni lilale, ni imise dziṱhóho dzaṋu, ngauri tshifhinga tsha u rengululwa tshi khou sendela.”

U itela uri vhafunziwa vhawe vhane vha ḓo vha vha tshi khou tshila vhukatini ha maḓuvha a vhufhelo vha kone u vhona vhutsini ha vhufhelo, Yesu u ṋea hetshi tshifanyiso: “Lavhelesani muhuyu na miri yoṱhe. Arali zwino i tshi ṱuma lurere, ni ri u lavhelesa na ḓivha nga yone zwauri tshilimo tsho no vha tsini. Na inwi-vho, arali ni tshi vhona izwo zwi tshi vho vha hone, ni ḓivhe zwauri muvhuso wa Mudzimu u tsini. Ngoho ndi a ni vhudza; lushaka holu a lu nga lovhi, zwoṱhe zwí sathu u vha hone.”

Nga zwenezwo, musi vhafunziwa vhawe vha tshi vhona mbonalo dzo fhamba-fhambanaho dza tshiga dzi tshi ḓadzea, vha fanela u limuha uri vhufhelo ha maitele a zwithu vhu tsini na uri Muvhuso wa Mudzimu hu si kale u ḓo fhelisa vhuvhi hoṱhe. Zwi re zwone ndi uri vhufhelo vhu ḓo vha hone vhukatini ha vhutshilo ha vhathu vhane vha ḓo vhona u ḓadzea ha zwithu zwoṱhe zwine Yesu a dzula o zwi amba! A tshi kwengweledza vhafunziwa vhawe vhe vha vha vha tshi ḓo tshila vhukatini ha eneo maḓuvha a vhufhelo a ndeme, Yesu u ri:

“Hone ḓi-thanyeleni, uri dzimbilu dzaṋu dzi sa ḓo lemedzwa nga vhupangwa na nga u nwesa na nga u vhilaelela vhutshilo vhuno, ḓuvha heḽo ḽa vhilula u ni ḓela. Ngauri ḽi ḓo nga tshifu u wela vhoṱhe vho dzulaho kha shango ḽoṱhe. Fhaṱuwani-ha, ni dzule ni tshi rabela, uri ni ḓo kona u ponyoka hezwo zwoṱhe, zwiné zwa ḓo vha hone, ni kone u ima phanḓa ha Murwa-muthu.”

Vhasidzana vho Thanyaho na Vha Matsilu

Yesu o vha a tshi khou ḓi fhindula mbudziso ya vhaapostola vhawe nga ha tshiga tsha u vha hone hawe maanḓani a Muvhuso. Zwino u ṋea mbonalo dziṅwe dza tshiga nga zwifanyiso zwiraru.

U ḓadzea ha tshifanyiso tshiṅwe na tshiṅwe hu ḓo vhonala nga vhane vha tshila musi a tshi vha hone. U thoma tsha u thoma nga haya maipfi: “Na hone muvhuso wa ṱaḓulu u fana na vhasidzana vha fumi, vhe vha dzhia maḓenzhe avho, vha bva u yo ṱanganedza muhwe. Vhaṱanu vhavho o vha é matsilu, vhaṱanu vhó thanya.”

Nga mubulo u no ri “muvhuso wa ṱaḓulu u fana na vhasidzana vha fumi,” Yesu ha khou amba uri tshipiḓa tsha vhenevho vhane vha ḓo ḽa ifa ḽa Muvhuso wa ṱaḓulu ndi matsilu nahone tshiṅwe tshipiḓa tshavho ndi vho thanyaho! Hai, fhedzi u khou amba uri malugana na Muvhuso wa ṱaḓulu, hu na mbonalo yo raliho kana yo raḽaho, kana uri mafhungo malugana na Muvhuso a ḓo nga hezwi na zwiḽa.

Vhasidzana vha fumi vha fanyisela Vhakriste vhoṱhe vhane vha vha vha Muvhuso wa ṱaḓulu kana vhane vha ḓiamba nga u ralo. Yo vha i nga Pentekoste ya 33 C.E. musi tshivhidzo tsha Vhukriste tshi tshi fulufhedziswa mbingano na Muhwe o vuswaho vhafuni, a re na vhugala, Yesu Kristo. Fhedzi mbingano yo vha i tshi ḓo itea ṱaḓulu nga tshifhinga tshi ḓaho tshi songo ambiwaho.

Kha tshenetsho tshifanyiso, vhasidzana vha fumi vha a bva vhe na ndivho ya u ya u ṱanganedza muhwe nahone vha ṱanganele kha muduba wa mbingano. Musi a tshi swika, vha ḓo vhonetshela nḓila nga maḓenzhe avho, nga zwenezwo vha tshi mu hulisa musi a tshi ḓisa muselwa wawe nḓuni ye a lugiselelwa yone. Naho zwo ralo, Yesu u a ṱalutshedza: “Ngauri vha matsilu vha tshi dzhia maḓenzhe, a vho ngo ṱuwa na mapfura. Vho thanyaho vha fara mapfura nga midzio na maḓenzhe avho. Muhwe, a tshi lenga, vhoṱhe vha kumedza vha eḓela.”

U lenga ha muhwe hu sumbedza uri u vha hone ha Kristo sa Khosi i vhusaho hu ḓo vha hone ho no vha kale. Mafheleloni u ḓa khuluṋonini yawe nga 1914. Vhukatini ha vhusiku vhulapfu nga phanḓa ha zwenezwo, vhasidzana vhoṱhe vha eḓela. Fhedzi a vha sasaladziwi nga ṅwambo wa hezwi. U sasaladzwa ha vhasidzana vha matsilu ndi nge vha si vhe na mapfura kha midzio yavho. Yesu u ṱalutshedza nḓila ine vhasidzana vha vuwa ngayo musi muhwe a sa athu u swika: “Vhukati ha vhusiku ha ṱavhiwa mukosi wa u ri: Muhwe a suyu! Ibvani ni yo mu ṱanganedza! Ndi hone hu tshi vuwa vhaḽa vhasidzana vhoṱhe, vha penyisa maḓenzhe avho. Vha matsilu vha amba na vho thanyaho vha ri: Ri fhungudzeleni mapfura aṋu, ngauri maḓenzhe ashu a a dzima. Vho thanyaho vha fhindula vha ri: Aiwa! Ri nga ḓo ṱahelelwa roṱhe, riṋe na vho-inwi. Khwine iyani ha vharengisi, ni yo ḓi-rengela.”

Mapfura a fanyisela zwine zwa ita uri Vhakriste vha dzule vha tshi penya sa zwivhonetsheli. Hezwi ndi Ipfi ḽa Mudzimu ḽo hevhedzwaho, ḽine Vhakriste vha farelela khaḽo, khathihi na muyamukhethwa, une wa vha thusa u pfesesa ḽeneḽo Ipfi. Mapfura a muya a konisa vhasidzana vho thanyaho uri vha vhonetshele musi vha tshi ṱanganedza muhwe nga muduba wa tshimima tsha mbingano. Fhedzi tshigwada tsha vhasidzana vha matsilu, kha vhone, kha midzio yavho, a vha na mapfura a muya a ṱoḓeaho. Ngauralo Yesu u ṱalusa zwine zwa itea:

“Musi [vhasidzana vha matsilu] vhó ṱuwa, vhó ya u renga, muhwe a ḓa. Vho dzulaho vhó ḓi-lugisa vha dzhena nae’ dzipfamoni, vothi ḽa hoṋiwa. Ngavhuya ha ḓa na vhasidzana vho salaho, vha ri: Murena, Murena, ri vulele! Ene a vha fhindula a ri: Ngoho, ndi a ni vhudza: a thi ni ḓivhi!”

Musi Kristo o no dzhena Muvhusoni wawe wa ṱaḓulu, tshigwada tsha vhasidzana vho thanyaho tsha Vhakriste vha ngoho vho ḓodzwaho tshi a vuwa kha ndugelo dzatsho dza u phaḓaladza tshedza shangoni ḽi re na swiswi tshi tshi renda Muhwe o vhuyaho. Fhedzi vhane vha fanyiselwa nga vhasidzana vha matsilu a vho ngo ḓiimisela u lugiselela hohu u renda ha u ṱanganedza. Ngauralo musi hetshi tshifhinga tshi tshi swika, Kristo ha vha vuleli muṋango uri vha dzhene tshimimani ṱaḓulu. U vha litsha nnḓa swiswini ḽa shango ḽa vhukati ha vhusiku, uri vha fheliswe na vhaṅwe vhaitazwivhi vhoṱhe. Yesu u phetha nga uri: “Fhaṱuwani-ha, ngauri a ni ḓivhi ḓuvha na tshikhathi.”

Tshifanyiso tsha Dzitalente

Yesu u isa phanḓa nyambedzano yawe na vhaapostola vhawe Thavhani ya Miṱwari nga u vha vhudza tshiṅwe tshifanyiso, tsha vhuvhili kha mutevhe wa zwiraru. Nga murahu ha maḓuvha a si gathi, musi e Yeriko, o ṋea tshifanyiso tsha dzitalente u itela u sumbedza uri Muvhuso wo vha u tshee kule. Tshifanyiso tshine a tshi ṱalusa zwino, naho tshi na mbonalo dzo vhalaho dzine dza fana, kha u ḓadzea hatsho tshi ṱalutshedza mishumo ya musi Kristo e maanḓani a Muvhuso. Tshi fanyisa uri vhafunziwa vhawe vha fanela u shuma musi vha tshee kha ḽifhasi u itela u engedza “thundu yawe.”

Yesu u a thoma: “Zwi nga [ndi uri zwiimo zwi tshimbidzanaho na Muvhuso] munna we a ri ndi fara lwendo, a vhidza vhalanda vhawe, a vha kumedza thundu yawe.” Yesu ndi munna we musi a sa athu u ya kule ngei ṱaḓulu, a ṋea vhalanda vhawe​—vhafunziwa vhane vha vha vha Muvhuso wa ṱaḓulu—​thundu yawe. Hedzi thundu a si thundu dza vhukuma, fhedzi dzi imela tsimu yo limiwaho ye khayo a lavhelela u vha na vhafunziwa vhanzhi.

Yesu u ṋea vhalanda vhawe thundu dzawe nga u ṱavhanya musi a sa athu u ya ṱaḓulu. U zwi itisa hani? Nga u vha ruma uri vha ḓi bvela phanḓa u shuma tsimuni yawe yo limiwaho nga u huwelela mulaedza wa Muvhuso zwipiḓani zwa kule zwa ḽifhasi. Samusi Yesu a tshi ri: “Muṅwe a mu fha maḓana maṱanu, muṅwe mavhili, muṅwe ḽithihi. A vha fha a tshi eḓanya nungo dzavho; a kona u ṱuwa.”

Talente dza malo​—thundu dza Kristo—​nga zwenezwo dzi a kovhekanywa u ya nga vhukoni, kana u ya nga vhumuya ha vhalanda. Vhalanda vha imela zwigwada zwa vhafunziwa. Kha ḓana ḽa u thoma ḽa miṅwaha, tshigwada tshe tsha ṱanganedza talente ṱhanu zwi tou vha khagala uri tsho vha tshi tshi katela na vhaapostola. Yesu u bvela phanḓa u anetshela uri vhalanda vhe vha ṱanganedza talente ṱhanu na vhe vha ṱanganedza mbili vhuvhili havho vho dzi andisa nga u huwelela havho Muvhuso na u ita vhafunziwa. Naho zwo ralo, mulanda we a ṱanganedza talente nthihi o i dzumba mavuni.

Yesu u a bvela phanḓa: “Hó no vha kale muṋe wa vhaḽa vhalanda a vhuya, a thoma u vhalelana navho’.” Hezwo zwo itea nga ḓana ḽa vhu-20 ḽa miṅwaha, nga murahu ha miṅwaha ya 1 900, musi Kristo a tshi vhuya u vhalelana navho, vhukuma, ho vha “hó no vha kale.” Zwenezwo Yesu u a ṱalutshedza:

“Ha sendela uḽa o kumedzwaho maḓana maṱanu, a ḓisa aḽa maḓana maṱanu é a bindula, a ri: Muṋe wanga! wo vha wo mpha maḓana maṱanu; maṅwe maḓana maṱanu ngea é nda bindula. Muṋe wawe a ri: Ahee, mulanda wanga wavhuḓi a fulufhedzeaho. U fulufhedzea kha zwiṱuku; iḓá U vhuse zwihulwane. Dzhena dakaloni ḽa muṋe wau.” Mulanda we a ṱanganedza talente mbili na ene o bindulisa talente dzawe-vho, nahone a khoḓiwa-vho a fhiwa malamba nga u ralo.

Naho zwo ralo, avha vhalanda vha fulufhedzeaho vha dzhena hani dakaloni ḽa Muṋe wavho? Ee, dakalo ḽa Muṋe wavho, Yesu Kristo, ndi ḽa u ṱanganedza Muvhuso musi a tshi ya kule ngei ṱaḓulu ha Khotsi awe. Vhalanda vha fulufhedzeaho vha musalauno, vha na dakalofulu nge vha ṋewa vhuṅwe vhuḓifhinduleli ha Muvhuso, nahone musi vha tshi fhedza buḓo ḽavho ḽa kha ḽifhasi, vha ḓo vha na dakalofulu ḽa u vuswa vha ya Muvhusoni wa ṱaḓulu. Fhedzi hu pfi mini nga ha mulanda wa vhuraru?

Hoyu mulanda u a gungula: “Muṋe wanga, ndo vha ndi tshi U ḓivha zwauri U muthu wa tshiṱuhu . . . Ndo ofha, nda dzumba ḓana ḽau mavuni. Mali yau ngei.” Onoyo mulanda u hana nga khole u shuma tsimuni nga u huwelela na u ita vhafunziwa. Ngauralo muṋe wawe u mu vhidza ‘mulanda muvhi, mubva’ nahone a mu haṱula: “Mu dzhieleni ḓana ḽawe . . . mu khurumedzeleni swiswini ḽa nnḓa-nnḓa, hune ha ḓo vha na zwililo na u shenganya maṋo.” Vhane vha vha tshigwada tsha mulanda muvhi, vho khurumedzelwaho nnḓa, vha dzhielwa dakalo naho ḽi ḽifhio ḽa muya.

Hezwi zwi vhea ngudo khulwane kha riṋe roṱhe vhane ra ḓiamba uri ri vhatevheli vha Kristo. Arali vha tshi ṱoḓa u khoḓiwa ngae na u ṋewa malamba, nahone vha iledze u khurumedzelwa nnḓa swiswini na u fheliswani tshoṱhe, vha fanela u shuma u itela u engedza thundu ya Muṋe wavho wa ṱaḓulu nga u ṱanganela nga vhuḓalo kha mushumo wa u huwelela. Naa ni a fhisea kha iḽi sia?

Musi Kristo a tshi Vhuya e Maanḓani a Muvhuso

Yesu u tshee na vhaapostola vhawe Thavhani ya Miṱwari. A tshi fhindula mbudziso yavho nga ha u vha hone hawe na vhufhelo ha maitele a zwithu, zwino u vha vhudza tshifanyiso tsha u fhedza kha mutevhe wa zwifanyiso zwiraru. Yesu u a thoma: “Musi Murwa-muthu a tshi ḓo ḓa é vhurenani hawe, vharuṅwa vhoṱhe vhe nae’, u ḓo dzula kha khuluṋoni ya vhurena hawe.”

Vhathu a vha koni u vhona vharuṅwa vhe vhugalani havho ha ṱaḓulu. Ngauralo u vhuya ha Murwa-muthu, Yesu Kristo, e na vharuṅwa, hu fanela u vha hu sa vhonali maṱoni a vhathu. U vhuya hu itea nga ṅwaha wa 1914. Fhedzi u itela ndivho ifhio? Yesu u a ṱalutshedza: “Hu ḓo kuvhangana tshakha dzoṱhe phanḓa hawe, ene a vha khethekanya vhunga mulisa a tshi khethekanya nngu na mbudzi. Huno nngu dzi ḓo ima thungo ya tsha u ḽa, mbudzi dza ima thungo ya monde.”

A tshi ṱalutshedza zwine zwa ḓo itea kha vha re kha sia ḽa vho tondiwaho, Yesu u ri: “Ndi hone khosi i tshi ḓo amba na vha thungo ya tshanḓa tshawe tsha u ḽa a ri: Iḓani vhafhaṱutshedzwa vha Khotsi-anga, iḽani vhufa ha vhuhosi he nda ni lugisela tshee shango ḽa tikiwa.” Vhane vha vha nngu vha hetshi tshifanyiso a vha nga vhusi na Kristo ṱaḓulu, fhedzi vha ḓo ḽa ifa ḽa Muvhuso nga muhumbulo wa u vha vhalanda vhawo vha kha ḽifhasi. “Tshee shango ḽa tikiwa” ndi musi Adamu na Eva vha tshi thoma u vha na vhana vhe vha vha vha tshi nga kona u vhuyelwa nga ndugiselelo dza Mudzimu dza u rengulula vhathu.

Fhedzi ndi ngani nngu dzi tshi iswa kha tshanḓa tsha u ḽa tsha vho tondiwaho tsha Khosi? Khosi i a fhindula: “Ngauri ndo pfa nḓala na mpha zwiḽiwa, ndo pfa ḓora na mpha nda nwa, ndo vha mueni na nṱanganedza. Ndo vha ndi fhedzi na ṋyambadza, ndo vha muhoṱa na nṱola, ndo vha ndi khothoni na ḓa ha nṋe.”

Samusi vhane vha vha nngu vho vha vhe fhano kha ḽifhasi, vha ṱoḓa u ḓivha uri vho vha vha tshi nga ita hani iyo mishumo yavhuḓi kha Khosi ya ṱaḓulu. Vha a vhudzisa: “Murena, ro U vhona lini Ú na nḓala ra U fusha, Ú na ḓora ra U nwisa? Ro U vhona lini Ú mueni ra U ṱanganedza, Ú fhedzi ra U ambadza? Ro U vhona lini Ú muhoṱa namusi Ú khothoni ra ḓa ha iwe?”

Khosi i a fhindula: “Ngoho, ndi a ni vhudza ndi ri: Henefho he na zwi ita muṅwe wa vharathu vhanga vhenevha vhaṱuku-ṱuku, no ita nṋe.” Vharathu vha Kristo ndi vho salaho kha ḽifhasi vha 144 000 vhane vha ḓo vhusa nae ṱaḓulu. Nahone Yesu u ri musi vha tshi vha fara zwavhuḓi, zwi ḓi nga musi vha tshi fara ene zwavhuḓi.

Lu tevhelaho, Khosi i amba na dzimbudzi. “Nṱutsheleni inwi no semiwaho, iyani muliloni u sa dzimi, wo lugiselwaho Diabolo na vharuṅwa vhawe. Ngauri ndo pfa nḓala ni si mphe zwiḽiwa, ndo pfa ḓora ni si mphe nda nwa. Ndo vha mueni ni si nṱanganedze, ndo vha ndi fhedzi ni si ṋyambadze, ndí muhoṱa namusi ndi khothoni ni si nṱole.”

Naho zwo ralo, vhane vha vha mbudzi vha a gungula: “Murena, ro U vhona lini Ú na nḓala, Ú na ḓora, Ú mueni, Ú fhedzi, Ú muhoṱa, Ú khothoni, ri si U shumele?” Mbudzi dzi haṱulwa kha mutheo u fanaho u fana na une nngu dza haṱulwa zwavhuḓi ngawo. Yesu u a fhindula: “Henefho he ni si zwi ite muṅwe wa havha vhaṱuku-ṱuku, na nṋe a no ngo ṋyita.”

Ngauralo u vha hone ha Kristo maanḓani a Muvhuso, hu sa athu u fhela ano maitele mavhi a zwithu nga vhuṱungu vhuhulu, tshi ḓo vha tshifhinga tsha khaṱulo. Mbudzi dzi “ḓo ṱutshela u shengedzwani hu sa fheli; vho lugaho vhone [nngu] vha ḓo ya u tshila tshoṱhe.” Mateo 24:2–25:46; 13:40, 49; Marko 13:3-37; Luka 21:7-36; 19:43, 44; 17:20-30; 2 Timotheo 3:1-5; Yohane 10:16; Ndzumbululo 14:1-3.

▪ Ndi mini tshine tsha vusa mbudziso ya vhaapostola, fhedzi zwi vhonala vhe na mini hafhu mihumbuloni yavho?

▪ Ndi tshipiḓa tshifhio tsha vhuporofita ha Yesu tshine tsha ḓadzea nga 70 C.E., fhedzi ndi mini tshine tsha si itee nga tshenetsho tshifhinga?

▪ Vhuporofita ha Yesu vhu ḓadzea lini lwa u thoma, fhedzi vhu ḓadzea nga nḓila khulwane lini?

▪ Zwi nengisaho ndi zwifhio kha u ḓadzea hazwo ha u thoma na ha u fhedza?

▪ Ndi ngani vhuṱungu vhuhulu vhu sa ḓadzei lwa u fhedza musi hu tshi fheliswa Yerusalema?

▪ Ndi zwiimo zwifhio zwa shango zwine zwa swaya u vha hone ha Kristo?

▪ Ndi lini hune ‘tshaka dzoṱhe dza ḓo lila,’ fhedzi vhatevheli vha Kristo vha ḓo vha vha tshi khou ita mini?

▪ Ndi tshifanyiso tshifhio tshine Yesu a tshi ṋea u itela u thusa vhafunziwa vhawe vha tshifhinga tshi ḓaho u vhona musi vhufhelo vhu tsini?

▪ Ndi u kwengweledza hufhio hune Yesu a hu ṋea vhafunziwa vhawe vhane vha ḓo vha vha tshi khou tshila maḓuvhani a vhufhelo?

▪ Ndi vhafhio vhane vha fanyiselwa nga vhasidzana vha fumi?

▪ Tshivhidzo tsha Vhukriste tsho fulufhedziswa lini u vhingana na muhwe, fhedzi muhwe u swika lini u itela u dzhia muselwa wawe u ya munyanyani wa mbingano?

▪ Mapfura a imela mini, nahone u vha nao zwi ita uri vhasidzana vho thanyaho vha ite mini?

▪ Munyanya wa mbingano u itelwa ngafhi?

▪ Ndi malamba afhio mahulwane ane vhasidzana vha matsilu vha xelelwa ngao, nahone khaṱulo yavho ndi ifhio?

▪ Ndi ngudo ifhio ine tshifanyiso tsha dzitalente tsha funza yone?

▪ Vhalanda ndi vhonnyi, nahone thundu ine vha ṋewa yone ndi mini?

▪ Muṋe u ḓa lini u itela u vhalelana thundu navho, nahone u wana mini?

▪ Ndi dakalo ḽifhio ḽine vhalanda vha fulufhedzeaho vha dzhena khaḽo, nahone hu itea mini kha mulanda wa vhuraru, a re muvhi?

▪ Ndi ngani u vha hone ha Kristo hu tshi fanela u vha hu sa vhonali, nahone nga tshenetsho tshifhinga u ita mushumo ufhio?

▪ Ndi nga nḓila ifhio ine vhane vha vha dzinngu vha ḽa ifa ḽa Muvhuso?

▪ “Tshee shango ḽa tikiwa” ndi lini?

▪ Vhathu vha haṱulwa u ya nga mutheo ufhio naho vhe dzinngu kana dzimbudzi?