Ndima Ya 24

Tshiitisi Tsha Uri Yesu A Ḓe kha Ḽifhasi

ḒUVHA ḽa Yesu Kapernaume e na vhafunziwa vhawe vhaṋa ḽo vha ḽi ḽa mishumo minzhi, a tshi phetha na vhathu vha Kapernaume vhe vha vha vha tshi khou mu ḓisela vhalwadze vhavho vhoṱhe uri vha fhodziwe vhukatini ha honoho vhusiku. Ho vha hu si na tshifhinga tsha uri a vhe e eṱhe.

Zwino ndi nga matsheloni-tsheloni a tevhelaho. Musi ḽi tshee luswiswi, Yesu u a vuwa a bvela nnḓa e eṱhe. U ya fhethu hu re thungo hune a nga kona u rabela Khotsi awe e eṱhe. Fhedzi u vha eṱhe ha Yesu a ho ngo vhuya ha ya ngafhi ngauri musi Petro na vhaṅwe vha tshi ṱhogomela uri haho, vha a bva vha yo mu ṱoḓa.

Musi vha tshi wana Yesu, Petro u ri: “Vhathu vhoṱhe vha khou U ṱoḓa.” Vhathu vha Kapernaume vha ṱoḓa Yesu a tshi dzula navho. Vha a livhuha vhukuma zwe a vha itela zwone! Fhedzi naa Yesu o ḓa shangoni zwihuluhulu u ḓo ita u fhodza ho raloho ha vhuṱolo? U ri mini nga ha zwenezwi?

U ya nga maṅwe mafhungo a Bivhili, Yesu u a fhindula vhafunziwa vhawe: “Kha ri yeni miḓini i re tsini, ndi yo funza na hone, ngauri ndi zwone zwe nda ḓela zwone.” Naho vhathu vha tshi khadeledza Yesu uri a dzule, u a vha vhudza: “Na miṅwe miḓini ndo pfi ndi yo amba mafhungo-maḓifha a muvhuso wa Mudzimu; ndo rumelwa zwenezwo.”

Ee, Yesu o ḓa kha ḽifhasi zwihuluhulu u ḓo funza nga ha Muvhuso wa Mudzimu, une wa ḓo hulisa dzina ḽa Khotsi awe na u fhelisa tshoṱhe malwadze a vhathu. Naho zwo ralo, u itela u ṋea vhuṱanzi ha uri o rumiwa nga Mudzimu, Yesu u fhodza lwa vhuṱolo. Kha miṅwaha ya maḓana yo fhiraho, Mushe na ene o ita vhuṱolo u itela u ṋea vhuṱanzi sa muḓinḓa wa Mudzimu.

Zwino musi Yesu a tshi ṱuwa Kapernaume u itela u ya u funza kha miṅwe miḓi, vhafunziwa vhawe vhaṋa vha ṱuwa nae. Vhenevha vhaṋa ndi Petro na murathu wawe Andrea, na Yohane na murathu wawe Yakobo. Ni ḓo elelwa uri nga vhege yo fhiraho, vho vha vho rambiwa uri vha vhe vhashumisani na Yesu vhane vha tshimbila nae vha u thoma.

Lwendo lwa Yesu lwa u funza kha ḽa Galilea na vhafunziwa vhawe vhaṋa lu bvelela zwavhuḓi nga maanḓa! Zwi re zwone ndi uri muvhigo wa mishumo yawe u phaḓalala na kha ḽoṱhe ḽa Siria. Magogo mahulu a bvaho Galilea, Yudea, na seli ha Mulambo wa Yorodane a tevhela Yesu na vhafunziwa vhawe. Marko 1:35-39; Luka 4:42, 43; Mateo 4:23-25; Ekisodo 4:1-9, 30, 31.

▪ Hu bvelela mini nga matsheloni a tevhelaho ḓuvha ḽe Yesu a vha o farakanea ngaḽo Kapernaume?

▪ Ndi ngani Yesu o rumelwa kha ḽifhasi, nahone vhuṱolo hawe vhu na ndivho ifhio?

▪ Ndi vhonnyi vhane vha ṱuwa na Yesu lwendoni lwawe lwa u funza kha ḽa Galilea, nahone hu aravhiwa hani kha mishumo ya Yesu?