Ndima Ya 21

Tshikoloni tsha Hayani ha Yesu

A ZWI timatimisi uri ho takalwa Nazareta musi Yesu a tshi humela hayani. Musi a tshi ṱuwa u itela u yo lovhedzwa nga Yohane tshifhinga tshi ṱoḓaho u fhira ṅwaha nga phanḓa, Yesu o vha a tshi ḓivhiwa sa muvhaḓi. Fhedzi zwino u ḓivhiwa hoṱhe sa mudzia vhuṱolo. Vhathu vha hune a dzula hone vha fhisetshela u mu vhona a tshi ita miṅwe ya heyi mishumo i mangadzaho vhukati havho.

U lavhelela havho hu a ṋaṋa musi Yesu, u ya nga mukhuvha wawe, a tshi ya tshikoloni tsha henefho. Vhukati ha yeneyo tshumelo, u a takuwa u itela u vhala, nahone u ṋekedzwa luṅwalo lwa muporofita Yesaya. U wana fhethu hune ha amba nga We a ḓodzwa nga muya wa Yehova, ṋamusi henefho fhethu Bivhilini yashu ndi kha ndima ya 61.

Musi o no vhala nga ha nḓila ye Onoyu a vha a tshi ḓo huwelela ngayo u vhofhololwa ha mathubwa, u bonyololwa ha maṱo a mabofu, na nga ha ṅwaha wa Yehova u takadzaho, Yesu u humisela lwonolwo luṅwalo kha muḓinḓa nahone a dzula fhasi. Maṱo oṱhe o mu lavhelesa. Zwenezwo u a amba, khamusi tshifhinga tshilapfu, a tshi ṱalutshedza: “Ṋamusi, zwo ṅwalwaho afha zwi tshi pfala nḓevheni dzaṋu, ndi uri zwo khunyelela.”

Vhathu vha mangadzwa nga ‘mafhungo awe a vhulenda’ vha amba nga tshavho vha ri: “Naa uyu a si murwa wa Yosefa?” Fhedzi a tshi ḓivha uri vha ṱoḓa u vhona a tshi ita vhuṱolo, Yesu u a bvela phanḓa: “Iṱali ni tshi ḓo ḓi mbudza murero une wa ri: Mudengu ḓi-dengule! na ri: Zwe ra pfa vha tshi ri zwo itwa ngei Kapernaume, zwi ité na fhano muḓini wa hau.” Zwi vhonala uri vhe vha vha vhe vhahura vha Yesu vha humbula uri u fhodza ho vha hu tshi fanela u thoma hayani, u itela u vhuyedza vhathu vha hawe u thoma. Ngauralo vha pfa vho nyadziwa nga Yesu.

A tshi ṱhogomela zwine vha humbula, Yesu u anetshela iṅwe ḓivhazwakale yo teaho. U amba uri kha ḽa Isiraele ho vha hu na tshilikadzi nnzhi misini ya Elia, fhedzi Elia ho ngo rumiwa na kha nthihi yadzo. Nṱhani hazwo, o ya kha tshilikadzi ya Sidoni ye ya vha i si Muisiraele, he a ita vhuṱolo vhu tshidzaho. Na misini ya Elisa, ho vha hu na vha mapele vhanzhi, fhedzi Elisa o fhodza Naamani wa Siria fhedzi.

Vho sinyuswa nga hohu u vhambedzwa ha ḓivhazwakale vha sa hu takaleli hune ha bvukulula u ḓiṱoḓela zwavho havho na u shaya lutendo, vha re tshikoloni vha a takuwa vha sukumedzela Yesu nnḓa ha muḓi. Henefho, luwani lwa thavha ye muḓi wa Nazareta wa fhaṱiwa khayo, vha lingedza u mu posela khalwo. Fhedzi Yesu u a ponyoka nahone a ṱuwa o tsireledzea. Luka 4:16-30; 1 Dzikhosi 17:8-16; 2 Dzikhosi 5:8-14.

▪ Ndi ngani ho takalwa Nazareta?

▪ Vhathu vha humbula mini nga nyambo ya Yesu, fhedzi zwino ndi mini tshine tsha vha ita uri vha sinyuwe nga u rali?

▪ Ndi mini zwine vhathu vha lingedza u ita Yesu?