Ndima Ya 114

Tshilalelo Tsha Khumbudzo

MUSI Yesu o no ṱanzwa milenzhe ya vhaapostola vhawe, u redza luṅwalo lwa Psalme ya 41:9, a tshi ri: “A ḽaho vhuswa hanga u nkanda nga milenzhe.” Nga zwenezwo, a tshi khou dinalea muyani, u a ṱalutshedza: “Muṅwe waṋu u ḓo ṋyambulula.”

Vhaapostola vha thoma u ṱungufhala vha amba na Yesu nga muthihi nga muthihi: “Kani ndi nṋe?” Na Yudasi Iskariote u a ṱanganela kha u vhudzisa. Yohane, o dzulaho tsini ha Yesu ṱafulani, u ḓitika nga khana ya Yesu a vhudzisa: “Murena, ndi nnyi?”

Yesu u a fhindula: “Ndi muṅwe wa inwi vha fumi na vhavhili; ndi uyo ane a ḓo thotha na nṋe ludongoni. Murwa-muthu ene u ḓo ya zwawe nga he maṅwalo a mu amba. Khombo! muthu uyo ane a ambulula Murwa-muthu. Khwine ho vha hu musi muthu uyo á so ngo vhuya a bebwa.” Nga murahu ha zwenezwo, Sathane u dovha a dzhena kha Yudasi, a tshi shumisa tshibuli tshi re mbiluni yawe, i re mmbi. Nga murahu vhusiku honoho, Yesu u vhidza Yudasi zwo tea uri ndi “ṅwana o xelaho.”

Zwino Yesu u vhudza Yudasi: “Zwiné wa ita ṱavhanya U zwi ite.” A hu na na muthihi wa vhaapostola ane a pfesesa zwine Yesu a amba. Vhaṅwe vha humbula uri samusi Yudasi a tshi fara tshikwama tsha tshelede, Yesu u khou mu vhudza uri: “A renge zwiné vha ḓo ḽa maḓuvhani a vhuṱambo,” kana uri o vha a tshi fanela u yo ṋea vhatshinyali.

Musi Yudasi o no bva, Yesu u thoma vhuṱambo vhuswa nga ho fhelelaho, kana khumbudzo, na vhaapostola vhawe vha fulufhedzeaho. U dzhia tshinnkwa, a rabela a tshi livhuha, a tshi ṅwatekanya, a vha ṋea, a tshi ri: “Ṱanganedzani, ni ḽe.” U a ṱalutshedza: “Ndi muvhili wanga u ṋekedzwaho lufuni nga mulandu waṋu. Ni ite ngauralo, uri hu vhe u ṋyelelwa.”

Musi muṅwe na muṅwe o no ḽa tshinnkwa, Yesu u dzhia tshinwelo tsha veine, zwi vhonala uri ndi tshinwelo tsha vhuṋa tshine tsha shumiswa tshumeloni ya Paseka. U dovha a tshi livhuha, a vha ṋekedza, a ri vha nwe, nahone u a bula: “Ndi tshone tshinwelo tsha mulanga muswa wa malofha anga a shululwaho nga mulandu waṋu.”

Zwi re zwone ndi uri heyi ndi khumbudzo ya lufu lwa Yesu. Ṅwaha muṅwe na muṅwe nga ḽa 14 Nisan i fanela u dovhololwa, samusi Yesu a tshi ri, u itela u mu humbula. Zwi ḓo humbudza vhane vha vha hone vhuṱamboni zwe Yesu na Khotsi awe wa ṱaḓulu vha zwi ita u itela u ṋekedza vhathu tsha u ponyoka khaṱulo ya lufu. Kha Vhayuda vhe vha vha vhatevheli vha Yesu, honoho vhuṱambo vhu ḓo dzhiela vhudzulo Paseka.

Mulanga muswa, une wa itwa u shumaho nga malofha a Yesu o shululwaho, u dzhiela vhudzulo mulanga wa kale wa Mulayo. Mupfumedzanyi wavho vhukati ha zwigwada zwivhili ndi Yesu Kristo​—kha ḽiṅwe sia, Yehova Mudzimu, nahone kha ḽiṅwe, Vhakriste vha 144 000 vho bebwaho nga muya. Nga nnḓa ha u itela u hangwelwa ha zwivhi, wonoyo mulanga u tendela u vhumbwa ha lushaka lwa ṱaḓulu lwa vhotshifhe vha re mahosi. Mateo 26:21-29; Marko 14:18-25; Luka 22:19-23; Yohane 13:18-30; 17:12; 1 Vha-Korinta 5:7.

▪ Ndi vhuporofita vhufhio ha Bivhili vhune Yesu a vhu redza malugana na khonani, nahone u vhu shumisa hani?

▪ Ndi ngani vhaapostola vho ṱungufhala nga maanḓa, nahone muṅwe na muṅwe wavho u vhudzisa mini?

▪ Yesu u vhudza Yudasi uri a ite mini, fhedzi vhaṅwe vhaapostola vha dzhia hani idzi ndaela?

▪ Ndi vhuṱambo vhufhio vhune Yesu a vhu thoma musi Yudasi o no ṱuwa, nahone vhu na ndivho ifhio?

▪ Ndi zwifhio zwigwada zwa mulanga muswa, nahone wonoyo mulanga u ḓadzisa mini?