Ndima Ya 75

Tshisima tsha Dakalo

VHUKATINI ha vhuḓinḓa hawe ngei Galilea, Yesu o ita vhuṱolo, nahone zwino u a vhu dovholola Yudea. Sa tsumbo, u pandela muya muvhi kha muthu we wa mu ita tshimuma. Magogo a a kanuka, fhedzi vhasasaladzi vha ḓi vusa khani samusi zwo vha zwo ralo na ngei Galilea. Vha ri: “U pandela mimuya mivhi nga Beelsebulu muhulwane wa mimuya mivhi.” Vhaṅwe vha ṱoḓa vhuṱanzi vhuhulwane ha u ṱalula Yesu, nahone vha lingedza u mu linga uri a vha ṋee vhuṱolo vhu bvaho ṱaḓulu.

A tshi ḓivha zwine vha khou humbula, Yesu u fhindula Vhagalilea nga nḓila i fanaho na ye a fhindula vhasasaladzi ngei Yudea ngayo. U amba uri muvhuso muṅwe na muṅwe wo fhandakanaho u ḓo wa. U a vhudzisa: “Naa muvhuso wa Sathane arali wó fhandakana nga vhukati hawo, u ḓo lalama hani?” U sumbedza uri vhasasaladzi vhawe vha khomboni nga uri: “Ndi tshi pandela mimuya mivhi nga munwe wa Mudzimu, ndi uri muvhuso wa Mudzimu wo ḓa ha inwi.”

Vhane vha vhona vhuṱolo ha Yesu vha fanela u aravha sa zwe vhe vha vhona Mushe a tshi ita vhuṱolo maḓanani a miṅwaha o fhiraho vha aravhisa zwone. Vho huwelela vha ri: “Dzó ṅwalwa nga munwe wa Mudzimu!” Wo vha u “munwe wa Mudzimu” we wa ṅwala kha mbaba dza matombo Milayo ya Fumi. Nahone “munwe wa Mudzimu”​—muya wawe mukhethwa, kana maanḓa a shumaho—​ndi wone une wa ita uri Yesu a pandele mimuya mivhi na u fhodza vhalwadze. Ngauralo Muvhuso wa Mudzimu wo ḓa kha havha vhasasaladzi, samusi Yesu, Khosi yo nangiwaho ya Muvhuso, e vhukati havho.

Zwenezwo Yesu a fanyisa uri vhukoni hawe ha u pandela mimuya mivhi ndi vhuṱanzi ha uri u na maanḓa u fhira Sathane, samusi zwo ralo nga muthu a tshi kunda muhali a re na mafumo o lindaho muḓi wawe. U dovholola tshifanyiso tshe a tshi vhudza Vhagalilea malugana na muya muvhi wa tshika. Muya wonoyo u bva muthuni, fhedzi musi onoyo muthu o sokou litsha honoho vhudzulo vhu si na zwo lugaho, muya u vhuya na miṅwe ya sumbe, nahone vhuimo vhu vha vhuvhi u fhira u thomani.

Musi vha tshi khou thetshelesa hedzi pfunzo, muṅwe musadzi we a vha e vhukati ha gogo a ṱuṱuwedzea u amba nga ipfi ḽihulu a ri: “Mashudu, muvhili wo U hwalaho na maḓamu e wa mama one!” Samusi lutamo lwa musadzi muṅwe na muṅwe wa Muyuda lu u vha mme a muporofita nahone zwihuluhulu Messia, zwi a pfala uri hoyu musadzi o vha a tshi nga amba hezwi. Zwi vhonala uri o humbula uri Maria u fanela u vha o takala nga ho khetheaho nge a vha mme a Yesu.

Naho zwo ralo, Yesu u khakhulula nga u ṱavhanya onoyo musadzi malugana na tshisima tsha vhukuma tsha dakalo. U a fhindula: “Nangoho, vha na mashudu [“vha a takala,” NW] vhané vha pfa mafhungo a Mudzimu vha a vhulunga.” Yesu ho ngo vhuya a amba uri Maria, mme awe u fanela u ṋewa khuliso yo khetheaho. Nṱhani hazwo, o sumbedza uri dakalo ḽa vhukuma ḽi wanala nge wa vha mushumeli a fulufhedzeaho wa Mudzimu, hu si kha mbofho dza zwithu zwi vhonalaho kana zwe wa zwi ita.

Samusi o zwi ita Galilea, Yesu u ḓi bvela phanḓa u sola vhathu vha Yudea nge vha humbela vhuṱolo vhu bvaho ṱaḓulu. U vha vhudza uri a hu na vhuṱolo vhune vha ḓo vhu ṋewa nga nnḓa ha ha Yona. Yona o vha vhuṱolo nga u dzula hawe thumbuni ya khovhe maḓuvha mararu na nga u funza hawe nga tshivhindi, zwe zwa ita uri Vhaninive vha rembuluwe. Yesu u ri: “Huno vhonani, a fhiraho Yona u fhano.” Zwi ngaho zwenezwo, khosi ya musadzi ya Sheba yo kanukiswa nga vhuṱali ha Salomo. Yesu u dovha a ri: “Huno vhonani, a fhiraho Salomo u fhano.”

Yesu u ṱalutshedza uri musi muthu a tshi funga luvhone, ha lu dzumbi kana a lu tiba nga mudzio, fhedzi u lu vhea kha tshiṱomambone u itela uri vhathu vha vhone tshedza. Khamusi u khou ambela uri u funza na u ita vhuṱolo phanḓa ha havha vhathu vha tshipimbi kha vho mu thetshelesaho zwi nga u dzumba tshedza tsha luvhone. Maṱo a vhenevho vho sedzaho ho ngo tsha, nga zwenezwo ndivho ya honoho vhuṱolo a i ḓadzisei.

Yesu u kha ḓi bva u pandela muya muvhi nahone o ita uri tshimuma tshi ambe. Hezwi zwi fanela u ṱuṱuwedza vhathu vha re na maṱo o tshaho, maṱo a u renda hetshi tshiitea tsha vhugala na u ḓivhadza mafhungo maḓifha! Naho zwo ralo, a zwo ngo ralo nga havha vhasasaladzi. Nga zwenezwo Yesu u phetha nga uri: “Lavhelesa-ha uri tshedza tshi re kha iwe tshi si vhe swiswi. Arali zwino muvhili wau woṱhe ú wa tshedza, ú si na na huṱuku hu re swiswi, U ḓo vha wa tshedza woṱhe sa musi tshedza tsha lupenyo tshi tshi U vhonetshela.” Luka 11:14-36; Ekisodo 8:18, 19; 31:18; Mateo 12:22, 28.

▪ Ho itea mini musi Yesu o no fhodza muṅwe muthu?

▪ “Munwe wa Mudzimu” ndi mini, nahone Muvhuso wa Mudzimu wo swikela vhathetshelesi vha Yesu hani?

▪ Tshisima tsha dakalo ḽa vhukuma ndi tshifhio?

▪ Muthu a nga vha na iṱo ḽo tshaho hani?