Ndima Ya 31

U Ṱhukhula Ṱhotshe nga Sabatha

NGA u ṱavhanya Yesu na vhafunziwa vhawe vha ṱuwa Yerusalema vha vhuyelela Galilea. Ndi nga tshimedzi, nahone masimuni hu na ṱhotshe kha maṱanga. Vhafunziwa vho farwa nga nḓala. Ngauralo vha ṱhukhula ṱhotshe vha ḽa. Fhedzi, samusi i Sabatha, zwine vha khou ita zwi a ṱhogomelwa.

Vharangaphanḓa vha vhurereli kha ḽa Yerusalema vho vha vha tshi kha ḓi bva u ṱoḓa u vhulaha Yesu o pomokiwa u pfuka Sabatha. Zwino Vhafarisei vha mu hwelela mulandu. Vha sola vha ri: “Vhona! Vhafunziwa vhau vha ita zwi songo fanelaho u itwa nga Sabatha.”

Vhafarisei vha amba uri u ṱhukhula ṱhotshe na u dzi swoṱa nga zwanḓa u itela u dzi ḽa ndi u kaṋa na u fhula. Fhedzi nḓila ya vhutevheleli ine vha ṱalutshedza ngayo zwine zwa vha mushumo zwo ita uri Sabatha i vhe muhwalo, ngeno hu uri yo vha yo itelwa uri i vhe tshifhinga tshi takadzaho, tsha u fhaṱiwa muyani. Ngauralo Yesu u ṱalutshedza nga tsumbo dza Maṅwalo u sumbedza uri Yehova Mudzimu ho ngo vhuya a tendela u shumisiwa ho raloho ha vhutevheleli nga maanḓa ha mulayo Wawe wa Sabatha.

Yesu u ri musi Davida na vhanna vhe vha vha vhe nae vho farwa nga nḓala, vho ima pfamoni vha ḽa zwinnkwa zwo kumedzwaho. Hezwo zwinnkwa zwo vha zwo no ḓi bviswa phanḓa ha Yehova nahone zwa dzhielwa vhudzulo nga zwiṅwe zwiswa, nahone nga ho ḓoweleaho zwo vha zwo vhetshelwa uri zwi ḽiwe nga vho-tshifhe. Naho zwo ralo, nga nṱhani ha zwiimo, Davida na vhanna vhe vha vha vhe nae a vho ngo haṱulwa nge vha zwi ḽa.

A tshi ṋekedza iṅwe tsumbo, Yesu u ri: “Na hone ni nga a ni athu u vhala milayoni zwauri vhotshifhé nḓuni khethwa nga maḓuvha a Sabatha vha ḓi pfuka mulayo, vha si vhe na mulandu.” Ee, naho hu nga Sabatha vhotshifhe vha ḓi bvela phanḓa u shidzha zwifuwo na miṅwe mishumo ya thembeleni vha tshi lugiselela zwiṱhavhelo zwa zwipuka! Yesu u ri: “Ndi a ni vhudza ndi ri: A fhiraho nnḓu khethwa u fhano.”

A tshi kaidza Vhafarisei, Yesu u a bvela phanḓa: “Ngavhe ni ṱalukanye uri ndi mini hu tshi pfi: Tshiné nda funa ndi khathutshelo, a si zwiṱhavhelo, ndi musi ní songo haṱula ngauralo, avha vhá si na mulandu.” Nga zwenezwo u a phetha: “Ngauri Murwa-muthu na ḓuvha ḽa Sabatha muṋe waḽo ndi ene.” Yesu u khou amba mini nga zwenezwo? Yesu u khou ambela kha vhuvhusi hawe ha Muvhuso wa mulalo ha miṅwaha ya tshigidi.

Nga miṅwaha ya 6 000 zwino, vhathu vho vha vha tshi khou tambula nga vhupuli vhu vhavhaho nga fhasi ha Sathane Diabolo, vhuvemu na nndwa i maitele a tshenetsho tshifhinga. Kha ḽiṅwe sia, vhuvhusi ha Sabatha khulwane ya Kristo vhu ḓo vha tshifhinga tsha u awela kha u tambula hoṱhe ho raloho na u tsikeledzwa. Mateo 12:1-8; Levitiko 24:5-9; 1 Samuele 21:1-6; Numeri 28:9; Hosea 6:6.

▪ Ndi mulandu ufhio we wa itelwa vhafunziwa vha Yesu, nahone Yesu u u fhindula hani?

▪ Ndi u kundwa hufhio ha Vhafarisei hune Yesu a hu ṱalusa?

▪ Ndi nga nḓila ifhio hune Yesu a vha ‘Muṋe wa Sabatha’?