Ndima Ya 85

U Ṱoḓa vho Xelaho

YESU u khou swela u ṱoḓa na u wana vhane vha ḓo shumela Mudzimu nga u ḓiṱukufhadza. Nga zwenezwo u a ṱoḓisisa nahone u amba na muṅwe na muṅwe nga ha Muvhuso, u katela na vhatshinyi vha ḓivheaho. Zwino vhathu vho raloho vha sendela khae vha thetshelesa.

Vha tshi vhona zwenezwi, Vhafarisei na vha maṅwalo vha sasaladza Yesu nge a dzula na vhathu vhane vha vha dzhia sa vha songo fanelaho. Vha a gungula: “A suyu, u ṱanganedza vha-ita-zwivhi a ḽa navho’.” Izwo vha zwi dzhiela fhasi vhukuma! Vhafarisei na vhamaṅwalo vha dzhia vhathu zwavho sa tshika i re nga fhasi ha milenzhe yavho. Zwi re zwone ndi uri vha shumisa ipfi ḽa Luheberu ‛am ha·’aʹrets, “vhathu vha shango [ḽifhasi],” vha tshi sumbedza uri vha vha nengwa lungafhani.

Kha ḽiṅwe sia, Yesu u fara muṅwe na muṅwe nga u mu ṱhonifha, nga vhuhwavho, na nga u mu pfela vhuṱungu. Nga zwenezwo, vhunzhi ha havha vha ḓiṱukufhadzaho, u katela na vhathu vha ḓivhelwaho vhuvhi, vha ḓiimisela u mu thetshelesa. Fhedzi hu pfi mini nga ha u sasaladza ha Vhafarisei musi Yesu a tshi ḓidina u itela u ṱhogomela vhane vha dzhiiwa vhe vha fhasi?

Yesu u fhindula u hanedza havho nga u shumisa tshifanyiso. U amba u ya nga nḓila ine Vhafarisei vha humbula ngayo, zwa nga vho luga nahone vho tsireledzea dangani ḽa Mudzimu, hu uri ‛am ha·’aʹrets vhane vha nyadziwa vho balangana nahone vho xela. Thetshelesani musi a tshi vhudzisa:

“Ndi nnyi muthu kha inwi, ané e na nngu dza ḓana, a ri u xedza iṅwe yadzo, a si sie dza mahumi maṱanu-na–maṋa na ṱhanu-na-nṋa sogani, a ya u tevhela yo xelaho, a vhuya a i wana? Huno musi ó i wana u ḓo i takulela kha mahaḓa awe ó takala. Ó swika nḓuni yawe u kuvhanganya dziṱhama na vhahura a vha vhudza a ri: Takalani na nṋe, ngauri ndo wana nngu yanga, ye ya vha yo xela.”

Zwenezwo Yesu u sumbedza uri mafhungo awe a shuma hani, a tshi ṱalutshedza: “Ndi a ni vhudza ndi ri, hu ḓo vha na dakalo ngei ṱaḓulu sa zwenezwo. Mu-ita-zwivhi muthihi a rembuluwaho u ḓo takalelwa u fhirisa vho lugaho vha mahumi maṱanu-na-maṋa na vhaṱanu-na-vhaṋa, vhané u rembuluwa vha si hu ṱoḓe.”

Vhafarisei vha ḓidzhia vho luga nahone vha sa ṱoḓi u rembuluwa. Musi vhaṅwe vhavho vha tshi sasaladza Yesu miṅwaha mivhili yo fhiraho nge a ḽa na wa lutho na vhaitazwivhi, o vha vhudza uri: “Ngauri a tho ngo ḓela vho lugaho, ndo ḓa u vhidza vha-ita-zwivhi.” Vhafarisei vha ḓiitaho vho lugaho, vhane vha vhona zwi songo fanela uri vha rembuluwe, a vha isi dakalo ngei ṱaḓulu. Fhedzi vhaitazwivhi vha rembuluwaho zwa vhukuma vha a ralo.

U itela u khwaṱhisa vhukuma mbuno ya uri u vhuyedzedzwa ha vhaitazwivhi zwi ḓisa dakalofulu vhukuma, Yesu u anetshela tshiṅwe tshifanyiso. U ri: “Kana musadzi ndi ufhio, ané e na fumi ḽa masheleni, a ri u xedza sheleni nthihi, a si funge lwenzhe a swiela nnḓu a ṱoḓa a tshi totola a vhuya a i wana? Huno musi ó i wana a kuvhanganya dziṱhama na vhahura a ri: Takalani na nṋe, ngauri ndo wana sheleni ye ya vha yo xela.”

Zwenezwo Yesu u a ṱalutshedza nga nḓila i fanaho. U bvela phanḓa uri: “Ndi a ni vhudza ndi ri: Kha vharuṅwa vha Mudzimu hu ḓo vha na dakalo sa zwenezwo, ḽa u takalela mu-ita-zwivhi o rembuluwaho.”

Uhu u ṱhogomela ha lufuno ha vharuṅwa vha Mudzimu hu swayea lungafhani musi hu tshi vhuyedzedzwa vhaitazwivhi vho xelaho! Zwihuluhulu izwi zwo ralo musi havha vhe vha vha vhe vha fhasi, ‛am ha·’aʹrets vha nyadziwaho mafheleloni vha tshi vha miraḓo ya Muvhuso wa Mudzimu wa ṱaḓulu. Nga zwenezwo, vha wana vhuimo ngei ṱaḓulu vhu fhiraho na ha vharuṅwa nga dzavho! Fhedzi nṱhani ha uri havha vharuṅwa vha vhe na vivho kana vha vha nyadze, nga u ḓiṱukufhadza vha takalela uri havha vhaitazwivhi vho sedzana na u kunda zwiimo vhutshiloni zwine zwa ḓo vha ita uri vha shume sa mahosi na vhotshifhe vha pfelaho vhuṱungu na vha re na khathutshelo. Luka 15:1-10; Mateo 9:13; 1 Vha-Korinta 6:2, 3; Ndzumbululo 20:6.

▪ Ndi ngani Yesu a tshi ḓikonanya na vhaitazwivhi vha ḓivhiwaho, nahone Vhafarisei vha mu sasaladza nga uri mini?

▪ Vhafarisei vha dzhia hani vhathu zwavho?

▪ Ndi zwifanyiso zwifhio zwine Yesu a zwi shumisa, nahone ri nga guda mini khazwo?

▪ Ndi ngani dakalo ḽa vharuṅwa ḽi ḽi swayeaho?