Ndima Ya 48

U Ṱuwa Nḓuni ya Yairo na U Dalela Hafhu Nazareta

YESU o vha o farakanea ḓuvha ḽoṱhe​—lwendoni lwa lwanzheni a tshi bva Miḓini ya Fumi, u fhodza mufumakadzi we a vha e na vhulwadze ha ṅombe, na u vusa ṅwananyana wa Yairo. Fhedzi ḓuvha a ḽi athu u kovhela. Zwi vhonala uri musi Yesu a tshi bva nḓuni ya Yairo, vhanna vhavhili vha mabofu vha khou mu tevhela, vha tshi vhidzelela: “Hee Murwa-Davida, ri khathutshele!”

Nga u vhidza Yesu uri ndi “Murwa-Davida,” nga zwenezwo havha vhanna vha khou sumbedza uri vha a tenda uri Yesu ndi muḽaifa wa khuluṋoni ya Davida, ndi ngazwo e Messia o fulufhedziswaho. Naho zwo ralo, zwi vhonala Yesu a tshi ḓiita u nga ri ha vha pfi vha tshi humbela u thuswa, khamusi a tshi linga u futelela havho. Fhedzi vhenevho vhanna vha si fhele mbilu. Vha tevhela Yesu hune a khou ya hone, huno musi a tshi dzhena nḓuni, na vhone vha dzhena nae.

Henefho Yesu u a vhudzisa: “Naa ni a tenda zwauri u ni ita zwenezwo ndi a zwi kona naa?”

Vha a fhindula nga fulufhelo vha ri: “Iina Murena.”

Ngauralo, a tshi kwama maṱo avho, Yesu u ri: “Zwe na tenda nga zwi vhe hone.” Nga u ṱavhanya vha vho kona u vhona! Zwenezwo Yesu a vha gogomedza a ri: “Ni vhone uri hu si vhe na muthu a zwi ḓivhaho.” Fhedzi nga ṅwambo wa dakalo, vha nyadza ndaela ya Yesu vha amba nga hae shangoni iḽo ḽoṱhe.

Musi vhenevho vhanna vha tshi ṱuwa, vhathu vha ḓisa muthu a re na muya muvhi we muya muvhi wa mu ita uri a vhe tshimuma. Yesu u pandela wonoyo muya muvhi, nahone nga u ṱavhanya onoyo munna a thoma u amba. Magogo a kanukiswa nga hovhu vhuṱolo, a ri: “Zwithu zwi ngaho izwi a zwi athu u vhonwa kha Vha-Isiraele na ka-thihi.”

Vhafarisei na vhone vha hone. A vha koni u hanedza honoho vhuṱolo, fhedzi nga u sa tenda havho huvhi vha dovha vha hanedza malugana na tshisima tsha mishumo ya maanḓa ya Yesu, vha tshi ri: “U pandela mimuya mivhi nga khosi ya yone mimuya mivhi.”

Nga u ṱavhanya nga murahu ha hezwi zwiitea, Yesu u vhuyelela muḓini wahawe wa Nazareta, zwino u ṱuwa na vhafunziwa vhawe. Hu ṱoḓaho u vha ṅwaha nga murahu, o vhuya a dalela tshiṅwe tshikolo nahone a funza henengei. Naho vhathu u thomani vho kanukiswa nga maipfi awe a takadzaho, nga murahu vho hanedza pfunzo yawe nahone vha lingedza u mu vhulaha. Zwino, nga khathutshelo, Yesu u lingedza hafhu u thusa vhenevho vhahawe.

Musi e huṅwe fhethu vhathu vho vha vha tshi ḓa ha Yesu, fhedzi hafha zwi vhonala vha sa ḓi. Ngauralo, nga Sabatha, u ya tshikoloni u ya u funza. Vhunzhi ha vhane vha mu pfa vha a kanuka. Vha a vhudzisa: “Vhuṱali uvhu na mishumo iyi o zwi wana ngafhi? Naa a si ene uḽa murwa wa mufhaṱi? Mme-awe naa ha pfi Maria? Vharathu vhawe a si Yakobo, na Yosefa, na Simoni, na Yuda? Dzikhaladzi dzawe dzoṱhe naa a dziho’ vhukati hashu? Izwi zwoṱhe o zwi wana ngafhi?”

Vha ri: ‘Yesu u ḓi nga naho e nnyi a re muḓini, ro mu vhona a tshi aluwa, nahone ri ḓivha vha muṱani wahawe. A nga vha hani Messia?’ Ngauralo hu sa londwi vhuṱanzi hoṱhe​—vhuṱali hawe vhuhulwane na vhuṱolo—​vha a mu landula. Nga ṅwambo wa u mu ḓivhesa havho, na mashaka awe vha a khukhulisea ngae, vha tshi ita uri Yesu a phethe nga uri: “Iṱali muporofita a tshi ḓi nyadziwa muḓini wa hawe na hayani hawe.”

Vhukuma, Yesu u mangadzwa nga u sa vha havho na lutendo. Ngauralo ha tsha ita na vhuṱolo na vhuthihi nga nnḓa ha u vhea zwanḓa kha vha si gathi vhane vha lwala na u vha fhodza. Mateo 9:27-34; 13:54-58; Marko 6:1-6; Yesaya 9:6.

▪ Nga u vhidza Yesu uri ndi “Murwa-Davida,” ndi mini zwine vhanna vha mabofu vha sumbedza uri vha a zwi tenda?

▪ Ndi ṱhalutshedzo ifhio ya vhuṱolo ha Yesu ye Vhafarisei vha i farelela?

▪ Ndi ngani i khathutshelo uri Yesu a vhuyelele Nazareta u thusa vha re henefho?

▪ Yesu u ṱanganedzwa hani Nazareta, nahone ndi ngani?