Ndima Ya 124

U A Kumedzwa nahone U A Ṱuwiswa

MUSI Pilato, a tshi sudzuluswa nga vhuimo ho dzikaho ha Yesu a shengedzwaho, u a dovha u lingedza u mu vhofholola, vhotshifhe vhahulwane vha a sinyuwesa. Vho ḓiimisela u sa tendela naho tshi tshifhio tshine tsha nga thivhela ndivho dzavho mmbi. Ngauralo vha a dovha u zhamba: “Mu vhambe! Mu vhambe!”

Pilato u a fhindula: “Mu dzhieni-ha vho-inwi, ni mu vhambe.” (Zwo fhambanaho na zwe vha zwi amba u thomani, Vhayuda vha nga vha na maanḓa a u vhulaha mavemu o tshinyaho zwihulwane vhukuma kha zwa vhurereli.) Zwenezwo, lune lwa nga vha lwa vhuṱanu, Pilato u ḓivhadza Yesu sa a si na mulandu, a tshi ri: “Nṋe, a thi wani mulandu kha ene.”

Musi Vhayuda vha tshi vhona uri milandu yavho ya zwa politiki a yo ngo vha na mvelelo, vha vho farelela kha mulandu wa zwa vhurereli wa samba we wa shumiswa mathomoni a tsengo ya Yesu phanḓa ha Magota. Vha ri: “Ri na mulayo une wa ri, o eḓanwa nga lufu, ngauri o ḓi-ita murwa wa Mudzimu.”

Hoyu mulandu ndi muswa kha Pilato, nahone u ita uri a tshuwese. Zwa zwino vho ṱhogomela uri Yesu a si muthu zwawe, samusi muloro wa musadzi wawe na maanḓa a vhumuthu ha Yesu a swayeaho zwi tshi sumbedza. Fhedzi ndi “murwa wa Mudzimu”? Pilato u a zwi ḓivha uri Yesu u bva Galilea. Naho zwo ralo, naa zwi nga konadzea uri o vhuya a tshila nga phanḓa? A tshi mu vhuyedzedza nḓuni ya tsengo, Pilato u a vhudzisa: “U wa ngafhi?”

Yesu u sokou fhumula. U thomani o vhudza Pilato uri ndi khosi, fhedzi Muvhuso wawe a si wa shango ḽino. Zwino a hu tshee na ṱhalutshedzo i bvelaho phanḓa ine ya nga shuma sa ndivho i shumaho. Naho zwo ralo, nga u sa fhindulwa Pilato u ḓiwana e wa fhasi, nahone u halifhela Yesu nga maipfi a no ri: “A U ambi na nṋe? A U ḓivhi zwauri maanḓa a u U vhamba na a u U vhofholola a kha nṋe?”

Yesu u fhindula nga u ṱhonifha: “Ndí zwanḓani zwau ndi ngauri maanḓa ayo wo tou fhiwa a tshi bva ṱaḓulu.” U khou ambela kha Mudzimu a tshi ṋea vhavhusi vha vhathu maanḓa a u langa mafhungo a kha ḽifhasi. Yesu u a engedza: “Na zwino mulandu muhulu u ḓo vha wa avho vho nkumedzaho iwe.” I ngoho, Kayafa tshifhe muhulu na vhatikedzi vhawe na Yudasi Isikariote vhoṱhe vha na mulandu muhulwane u fhira Pilato nga u fara Yesu luvhi.

A tshi kanukiswa zwihulu nga Yesu na nga u ofha uri Yesu a nga vha a tshi bva ha Mudzimu, Pilato u lingedza hafhu u mu vhofholola. Naho zwo ralo, Vhayuda vha sanda Pilato. Vha a dovholola mulandu wavho wa zwa politiki, vha tshi shushedza nga vhukwila: “Arali uyu wá mu vhofholola a U tsha ḓo vha khonani ya khosi; ngauri a ḓi-itaho khosi u lwa na khosi.”

Hu sa londwi mvelelo dzi tshusaho, Pilato u bvisela hafhu Yesu nnḓa. Nahone u a dovha u humbela: “Vhonani, khosi yaṋu!”

“Mu ṱuse! Mu ṱuse! Mu vhambe!”

Pilato u a vhudzisa o hanganea: “Naa ndi ḓo vhamba khosi yaṋu?”

Vhayuda vho sasaladza vhuvhusi ha Vharoma. I ngoho, vha nyadza vhuvhusi ha Roma! Naho zwo ralo, nga u tou hoya, vhotshifhe vhahulu vha ri: “Khosi yashu ndi Kesare; a ri na iṅwe.”

A tshi ofhela vhuimo hawe ha politiki na bvumo ḽawe, mafheleloni Pilato u ḓiṋekedzela ṱhoḓea dza Vhayuda dzine dza khou ya dzi tshi ṋaṋa. U a kumedza Yesu. Maswole vha bvula Yesu nguvho ya madzanga nahone vha mu ambadza nguvho yawe ya nga nnḓa. Musi Yesu a tshi iswa u vhambiwani, u hwaliswa danda ḽawe ḽa tshengedzo.

Zwino ndi vhukati ha matsheloni a Ḽavhuṱanu, nga Nisan 14; khamusi ḽi vho ṱoḓa u vha masiari. U bva tsha matsheloni-tsheloni a Ḽavhuṋa Yesu o vha a sa athu u eḓela, nahone o tambula tshengelo dzi vhavhaho nga u tevhekana hadzo. Zwi tou vha khagala uri zwino nungo dzawe dzi a fhela nga tshileme tsha heḽi danda. Ngauralo mufhiri wa gondo, muṅwe Simoni wa Kirene kha ḽa Afurika, u a kombetshedzwa uri a mu hwalele ḽone. Musi vha tshi khou ḓi tshimbila, vhathu vhanzhi, u katela na vhafumakadzi, vha khou tevhela, vho ṱungufhala nahone vha tshi lilela Yesu.

A tshi rembulutshela kha vhafumakadzi, Yesu u ri: “Inwi vhananyana vha Yerusalema, ni songo lilela nṋe; ḓi-lileleni, ni lilele na vhana vhaṋu. Ngauri hu ḓo ḓa maḓuvha ané vha ḓo ri: Mashudu, vha sí na vhana; mivhili i so ngo beba na maḓamu a so ngo mamisa. . . . Ngauri thanda nṋu vha tshi i ita zwingafha, yo omaho vha ḓo i ita zwinzani!”

Yesu u khou ambela kha thanda ine ya vha lushaka lwa Vhayuda, ine ya kha ḓi vha yo ṋukalanyana nga vhutshilo nga ṅwambo wa u vha hone ha Yesu na nga u vha hone ha vha masalela a vha mu tendaho. Fhedzi musi havha vha tshi bviswa kha lwonolwo lushaka, hu ḓo sala fhedzi thanda yo faho nga lwa muya, ee, ndangulo ya lushaka yo faho. Yawee, hu ḓo vha na zwililo lungafhani musi mmbi ya Vharoma, i tshi shuma sa vhahaṱuleli vha Mudzimu, u fhelisa lushaka lwa Vhayuda! Yohane 19:6-17; 18:31; Luka 23:24-31; Mateo 27:31, 32; Marko 15:20, 21.

▪ Ndi mulandu ufhio une vharangaphanḓa vha vhurereli vha u vhetshela Yesu musi milandu yavho ya zwa politiki i songo vha na mvelelo?

▪ Ndi ngani Pilato a tshi vha na nyofho khulu?

▪ Ndi vhonnyi vha re na tshivhi tshihulwane kha zwine zwa khou bvelela kha Yesu?

▪ Mafheleloni, vhotshifhe vha zwi itisa hani uri Pilato a kumedzele Yesu u vhulahwa?

▪ Yesu u vhudza vhafumakadzi vhane vha khou mu lilela mini, nahone u amba mini a tshi ambela kha thanda “nṋu” nahone ya dovha ya “oma”?